ບັນດາຜູ້ສະໝັກຮັບເລືອກຕັ້ງສະມາຊິກສະພາປະຊາຊົນຂັ້ນແຂວງ (ສສຂ) ຊຸດທີ II ປະຈໍາເຂດເລືອກຕັ້ງ ເມືອງທ່າແຕງ ແຂວງເຊກອງ ໄດ້ສໍາເລັດການເຄື່ອນໄຫວລົງໂຄສະນາຫາສຽງຢູ່ແຕ່ລະໜ່ວຍເລືອກຕັ້ງຂອງຕົນໃນຂອບເຂດທົ່ວເມືອງ ພາຍຫຼັງໄດ້ດໍາເນີນມາແຕ່ວັນທີ 9 ກຸມພາ.
ໃນການລົງໂຄສະນາຫາສຽງຢູ່ແຕ່ລະຈຸດນັ້ນ, ຜູ້ສະໝັກຮັບເລືອກຕັ້ງ ສສຂ ນອກຈາກໄດ້ສະເໜີປະຫວັດຄວາມເປັນມາ, ໜ້າທີ່ຮັບຜິດຊອບ, ຜົນງານການເຄື່ອນໄຫວວຽກງານ ແລະຄວາມຫວັງຂອງຕົນໃນການປະຕິບັດໜ້າທີ່ເປັນຕົວແທນແຫ່ງສິດ ແລະຜົນປະໂຫຍດຂອງປະຊາຊົນໃນຕໍ່ໜ້າແລ້ວ, ຍັງໄດ້ສຶກສາອົບຮົມໃຫ້ຜູ້ມີສິດເລືອກຕັ້ງຮັບຮູ້ເຂົ້າໃຈແຈ້ງ ກ່ຽວກັບທາດແທ້ລະບອບການເມືອງຂອງປະເທດເຮົາ, ທັງນີ້ ກໍເພື່ອເຮັດໃຫ້ຜູ້ມີສິດປ່ອນບັດເລືອກຕັ້ງ ຮັບຮູ້ເຂົ້າໃຈກ່ຽວກັບຄວາມຮຽກຮ້ອງຕ້ອງການທາງດ້ານໂຄງປະກອບຂອງສະພາແຫ່ງຊາດຊຸດທີ IX ແລະສະພາປະຊາຊົນຂັ້ນແຂວງຊຸດທີ II ເພື່ອເຊີດຊູຄວາມຕື່ນຕົວທາງດ້ານການເມືອງຂອງປະຊາຊົນລາວບັນດາເຜົ່າ, ໃຫ້ປະຕິ ບັດສິດເປັນເຈົ້າຂອງປະເທດຊາດ, ເປັນພົນລະເມືອງລາວທີ່ດີ ໂດຍໄປໃຊ້ສິດປ່ອນບັດເລືອກຕັ້ງເອົາຜູ້ທີ່ມີມາດຖານ, ເງື່ອນໄຂຖືກຕ້ອງຄົບຖ້ວນ ແບລະມີຄວາມຮູ້ຄວາມສາມາດເຂົ້າເປັນສະມາຊິກສະພາແຫ່ງຊາດຊຸດທີ IX ແລະສະມາຊິກສະພາປະຊາຊົນແຂວງເຊກອງຊຸດທີ II.
ເຂດເລືອກຕັ້ງທີ 16 ແຂວງເຊກອງມີຜູ້ລົງສະໝັກຮັບເລືອກຕັ້ງເປັນສະມາຊິກສະພາແຫ່ງຊາດຊຸດທີ IX ຈໍານວນ 9 ທ່ານ, ເລືອກເອົາ 6 ທ່ານ ແລະຜູ້ສະໝັກເລືອກຕັ້ງເປັນສະມາຊິກສະພາປະຊາຊົນແຂວງຊຸດທີ II ຈໍານວນ 30 ທ່ານ, ເລືອກເອົາ 21 ທ່ານ ເຊິ່ງໃນນີ້ສະເພາະເຂດເລືອກຕັ້ງເມືອງທ່າແຕງມີຜູ້ລົງສະໝັກ 7 ທ່ານ, ເລືອກເອົາ 5 ທ່ານ.