ຕອນບ່າຍວັນທີ 18 ກຸມພາ 2021, ທີ່ສະພາແຫ່ງຊາດ ໄດ້ມີພິທີຖະແຫຼງຂ່າວ ການກະກຽມຄວາມພ້ອມຮອບດ້ານ ໃຫ້ແກ່ການດຳເນີນການເລືອກຕັ້ງສະມາຊິກສະພາແຫ່ງຊາດ ຊຸດທີ IX ແລະ ສະມາຊິກສະພາປະຊາຊົນແຂວງ, ນະຄອນຫຼວງ ຊຸດທີ II ໃນທົ່ວປະເທດ ໂດຍທ່ານ ປອ ສົມພູ ດວງສະຫວັນ,​ຄະນະປະຈໍາສະພາແຫ່ງຊາດ, ກໍາມະການອະນຸກໍາມະການເລຂານຸການ,ໂຄສົກຂອງຄະນະກໍາມະການເລືອກຕັ້ງລະດັບຊາດ ຕໍ່ສື່ມວນຊົນ.

ໂດຍປະຕິບັດຕາມລັດຖະທຳມະນູນ, ກົດໝາຍວ່າດ້ວຍສະພາແຫ່ງຊາດ ແລະສະພາປະຊາຊົນຂັ້ນແຂວງ, ກົດໝາຍວ່າດ້ວຍການເລືອກຕັ້ງ ແລະ ມະຕິຂອງກົມການເມືອງສູນກາງພັກ ວ່າດ້ວຍການເພິ່ມທະວີການຊີ້ນຳ-ນຳພາຂອງພັກຕໍ່ການເລືອກຕັ້ງ ສສຊຊຸດທີ IX ແລະ ສສຂ ຊຸດທີ II (ສະບັບເລກທີ 118/ກມສພ, ລົງວັນທີ 7/9/2020). ຜ່ານມາຄະນະປະຈໍາສະພາແຫ່ງຊາດ ໄດ້ມີມະຕິຕົກລົງແຕ່ງຕັ້ງຄະນະກຳມະການເລືອກຕັ້ງລະດັບຊາດ (ສະບັບເລກທີ 32/ຄປຈ, ລົງວັນທີ 13/5/2020) ແລະ ປະກາດໂດຍລັດຖະດຳລັດຂອງປະທານປະເທດ (ສະບັບເລກທີ 124/ປປທ, ລົງວັນທີ 22/7/2020);​ ຫຼັງຈາກນັ້ນ, ຄະນະກໍາມະການເລືອກຕັ້ງລະດັບຊາດໄດ້ອອກມະຕິ ວ່າດ້ວຍການແຕ່ງຕັ້ງ ແລະ ການເຄື່ອນໄຫວຂອງບັນດາອະນຸກໍາມະການ (ສະບັບເລກທີ 01/ຄລຊ, ລົງວັນທີ 20/8/2020) ຊຶ່ງປະກອບມີ 5 ອະນຸກໍາມະການ ທີ່ເປັນເສນາທິການໃຫ້ແກ່ຄະນະກໍາມະການເລືອກຕັ້ງລະດັບຊາດໃນການກະກຽມ ແລະ ດໍາເນີນການເລືອກຕັ້ງ ແລະ ໄດ້ມີຄຳແນະນຳ ໃຫ້ດຳເນີນການແຕ່ງຕັ້ງຄະນະກຳມະການເລືອກຕັ້ງຂັ້ນແຂວງ, ຂັ້ນເມືອງ ແລະ ບັນດາອະນຸກຳມະການ ເພື່ອເປັນເສນາທິການໃຫ້ແກ່ຄະນະກຳມະການເລືອກຕັ້ງຂັ້ນຂອງຕົນ ໃນການກະກຽມວຽກງານຮອບດ້ານໃຫ້ແກ່ການດຳເນີນການເລືອກຕັ້ງສະມາຊິກສະພາແຫ່ງຊາດ ຊຸດທີ IX ແລະ ສະມາຊິກສະພາປະຊາຊົນຂັ້ນແຂວງ ຊຸດທີ II.

ຄະນະກຳມະການເລືອກຕັ້ງລະດັບຊາດໄດ້ຄົ້ນຄວ້າ, ກວດກາ, ພິຈາລະນາ ແລະ ຕົກລົງຮັບຮອງເອົາຜູ້ອອກສະໝັກຮັບເລືອກຕັ້ງ ແລະ ປະກາດຈຳນວນ, ລາຍຊື່ ແລະ ຄຸນລັກສະນະຂອງຜູ້ອອກສະໝັກຮັບເລືອກຕັ້ງເປັນສະມາຊິກສະພາແຫ່ງຊາດຊຸດທີ IX ແລະ ສະມາຊິກສະພາປະຊາຊົນຂັ້ນແຂວງຊຸດທີ II ຢ່າງເປັນທາງການ. ໃນນັ້ນ, ຜູ້ສະໝັກເປັນສະມາຊິກສະພາແຫ່ງຊາດມີ 224 ທ່ານ, ຍິງ 49 ທ່ານ ເລືອກເອົາ 164 ທ່ານ ແລະ ສະມາຊິກສະພາປະຊາຊົນຂັ້ນແຂວງມີ 789 ທ່ານ, ຍິງ 227 ທ່ານ ເລືອກເອົາ 492 ທ່ານ

ຈຸດປະສົງຂອງການຖະແຫຼງຂ່າວໃນຄັ້ງນີ້ ແມ່ນເພື່ອແຈ້ງໃຫ້ທົ່ວສັງຄົມໄດ້ຊາບ ກ່ຽວກັບການກະກຽມຄວາມພ້ອມຮອບດ້ານໃຫ້ແກ່ການດຳເນີນການປ່ອນບັດເລືອກຕັ້ງສະມາຊິກສະພາແຫ່ງຊາດຊຸດທີ IX ແລະສະມາຊິກສະພາປະຊາຊົນແຂວງ, ນະຄອນຫຼວງ ຊຸດທີ II ທີ່ຈະໄດ້ຈັດຕັ້ງປະຕິບັດໃນຂອບເຂດທົ່ວປະເທດໃນວັນອາທິດ, ວັນທີ 21 ກຸມພາ 2021ທີ່ຈະມາເຖິງນີ້.

ຄະນະກຳມະການເລືອກຕັ້ງລະດັບຊາດ ໄດ້ເອົາໃຈໃສ່ຊີ້ນຳ-ນຳພາ ບັນດາອະນຸກຳມະການໃນການຈັດຕັ້ງປະຕິບັດພາລະບົດບາດ, ສິດ ແລະ ໜ້າທີ່ຂອງຕົນ ໃນການກະກຽມວຽກງານຮອບດ້ານໃຫ້ແກ່ການດຳເນີນການເລືອກຕັ້ງ, ອະນຸກໍາມະການຕ່າງໆຂອງຄະນະກຳມະການເລືອກຕັ້ງລະດັບຊາດ ແລະ ຄະນະກຳມະການເລືອກຕັ້ງຂັ້ນທ້ອງຖິ່ນ ກໍ່ໄດ້ຜັນຂະຫຍາຍບັນດາມະຕິ ແລະ ຄຳແນະນຳຕ່າງໆ ກ່ຽວກັບວຽກງານການເລືອກຕັ້ງ ທັງສູນກາງ ແລະ ທ້ອງຖິ່ນ.

ມາຮອດປັດຈຸບັນ ການກະກຽມຄວາມພ້ອມດ້ານຕ່າງໆ ໃຫ້ແກ່ການເລືອກຕັ້ງສະພາແຫ່ງຊາດຊຸດທີ ຊຸດທີ IX ແລະ ສະມາຊິກສະພາປະຊາຊົນຂັ້ນແຂວງຊຸດທີ II ແມ່ນໄດ້ດຳເນີນມາດ້ວຍຄວາມຮັບຜິດຊອບການເມືອງ, ຄວາມເປັນເຈົ້າການ ແລະ ເຕັມໄປດ້ວຍບັນຍາກາດອັນຟົດຟື້ນຂອງທົ່ວພັກ-ລັດ, ທົ່ວປວງຊົນລາວໃນຂອບເຂດທົ່ວປະເທດ, ແລະ ມີຄວາມພ້ອມຢ່າງຮອບດ້ານເພື່ອຮັບປະກັນໃຫ້ແກ່ການດຳເນີນການປ່ອນບັດເລືອກຕັ້ງ ສາມາດດຳເນີນໄປຕາມແຜນການ ແລະ ກຳນົດເວລາທີ່ວາງໄວ້ ໃນວັນອາທິດ,​ ວັນທີ 21​ ກຸມພາ 2021ຢູ່ໃນຂອບເຂດທົ່ວປະເທດ.

Medialaos MMD (ແຫຼ່ງຂໍ້ມູນຈາກ: ສະພາແຫ່ງຊາດ)