ໃນຕອນເຊົ້າຂອງວັນທີ 18 ກຸມພາ 2021ນີ້ ຢູ່ທີ່ຫ້ອງປະຊຸມພະແນກຖະແຫຼງຂ່າວ,ວັດທະນະທຳ ແລະ ທ່ອງທ່ຽວແຂວງສະຫວັນນະເຂດໄດ້ຈັດຊຸດຝຶກອົບຮົມການນຳໃຊ້ຖານຂໍ້ມູນລວມຂອງກະຊວງຖະແຫຼງຂ່າວ,ວັດທະນະທຳ ແລະ ທ່ອງທ່ຽວ ໂດຍໃຫ້ກຽດເຂົ້າຮ່ວມຂອງ ທ່ານ ບົວໄລ ພານຸວົງ ວ່າການຫົວໜ້າຫ້ອງການກະຊວງ ຖວທ,ທ່ານ ຈັນທະໜອມ ພິລາວົງ ຮອງຫົວໜ້າພະແນກ ຖວທ ແຂວງ, ມີບັນດາພະນັກງານຂະແໜງການ,ກອງວິຊາການ,ພ້ອມດ້ວຍວິຊາການເຮັດວຽກກ່ຽວກັບເອກກະສານອ້ອມຂ້າງພະແນກເຂົ້າຮ່ວມ.

ທ່ານ ນໍລະເດດ ນັນທະວົງ ຫົວໜ້າຫ້ອງການບໍລິຫານ ພະແນກ ຖວທ ແຂວງ ໄດ້ລາຍງານກ່ຽວກັບການນຳໃຊ້ລະບົບຖານຂໍ້ມູນລວມຂອງກະຊວງ ຖວທ ຢູ່ພະແນກ ຖວທ ແຂວງ ວ່າ:ຕໍ່ກັບການຈັດຕັ້ງປະຕິບັດໜ່ວຍ ຈໍລະຈອນ ເອກະສານ ໂດຍການນຳໃຊ້ລະບົບ ຖານຂໍ້ມູນລວມຂອງກະຊວງ ຖວທ ພະແນກຖະແຫຼ່ງຂ່າວ,ວັດທະນະທຳ ແລະ ທ່ອງທ່ຽວ ແຂວງ ສະຫວັນນະເຂດ ໃນໄລຍະຜ່ານມາ ແມ່ນໄດ້ເລີ່ມຈັດຕັ້ງປະຕິບັດ ພາຍຫຼັງທີ່ໄດ້ຮັບຝຶກອົບຮົມດ້ານວິຊາການ ໃນຄັ້ງວັນທີ 13-14 ພະຈິກ 2019 ເປັນຕົ້ນມາ ແລະ ສາມາດສັງເກດໄດ້ໂດຍສັງລວມການຈັດຕັ້ງປະຕິບັດຕົວຈິງແມ່ນໄດ້ມີການປະສານ ສະເພາະແຕ່ ຂັ້ນພະແນກ ກັບກະຊວງ ໃນນີ້ແມ່ນການປະສານກ່ຽວກັບ ບົດສະຫລຸບ ແລະ ຂໍ້ມູນບາງດ້ານເທົ່ານັ້ນ ສ່ວນລະຫວ່າງ ພະແນກກັບບັນດາຂະແໜງການ ແລະ ກອງວິຊາການແມານຍັງບໍ່ສາມາດຈັດຕັ້ງປະຕິບັດໄດ້ ທັງນີ້ກໍ່ເນື່ອງຈາກວ່າ: ຢູ່ບັນດາຂະແໜງການ ແລະ ກອງວິຊາການຍັງບໍ່ທັນມີຄວາມພ້ອມເປັນຕົ້ນແມ່ນ:ອຸປະກອນຮັບໃຊ້ເຄື່ອງມືຄອມພິວເຕີ້ບໍ່ມີ,ລະບົບອິນເຕີເນັດ ບໍ່ທັນປະກອບໃຫ້ ຫລື ມີກໍ່ບໍ່ສະຖຽນ,ບຸກຄະລາກອນທີ່ຈະຮັບຜິດຊອບຍັງບໍ່ທັນພ້ອມ (ຍັງມີວຽກຫລາຍ),ຂັ້ນພະແນກຍັງບໍ່ທັນໄດ້ສ້າງເວັບໄຊທີ່ເປັນສູນລວມໄດ້ ເພື່ອສະດວກໃນການປະສານງານ,ສຳລັບຢູ່ຂັ້ນພະແນກຜູ້ທີ່ຮັບຜິດຊອບສະເພາະໄດ້ຍົກຍ້າຍໄປຮັບໜ້າທີ່ໃໝ່ເພື່ອເປັນການອຳນວຍຄວາມສະດວກໃນການປະສານວຽກໃນຜ່ານມາແມ່ນໄດ້ນຳໃຊ້ສື່ ວັອດແອັບ ໂດຍການສະແກນບາຄົດ.
ຈາກນັ້ນ ທ່ານ ຈັນທະໜອມ ພິລາວົງກະກໍ່ໄດ້ກ່າວມີຄຳເຫັນວ່າ: ວຽກກ່ຽວກັບເອກກະສານເປັນວຽກໜຶ່ງທີ່ສຳຄັນ ເພາະລັດທະບານ ໄດ້ມີດຳລັດອອກມາ ຍ້ອນມີຄວາມສຳຄັນ ແລະ ມີຜົນສັກສິດໃນການນຳໃຊ້ໃນປະຈຸບັນ, ການສ້າງເອກກະສານບໍ່ແມ່ນເລື່ອງງ່າຍ, ຈະໃຫ້ບັນດາເອກະສານທີ່ສ້າງໃຫ້ຖືກຕາມລໍາດັບທີ່ວາງອອກ, ດ້ວຍຄວາມເປັນຈິງຢູ່ແຂວງ ກໍ່ຍັງປະຕິບັດບໍ່ໄດ້, ກ່ຽວກັບວຽກງານເອກະສານ ຢູ່ແຂວງ ກໍ່ໄດ້ຜ່ານການອົບຮົມມາຄັ້ງໜຶ່ງແລ້ວ, ສະນັ້ນທາງກະຊວງຈຶ່ງມີແຜນລົງກວດກາການຝຶກອົບຮົມວ່າເຮັດໄດ້ສ່ຳໃດ ແລະ ຈະໄດ້ນຳພາເຮັດໃຫມ່, ຫຼັກໆແມ່ນຈະໄດ້ສ້າງຖານຂໍ້ມູນດັ່ງນັ້ນຈຶ່ງໄດ້ ຮຽກຮ້ອງມາຍັງບັນດາທ່ານ ທີ່ເຮັດວຽກກ່ຽວກັບເອກະສານອ້ອມຂ້າງພະແນກໃຫ້ເອົາໃຈໃສ່ໃນການຝຶກອົບຮົມຄັ້ງນີ້ໃຫ້ບັນລຸຜົນຕາມຄາດໝາຍທີ່ວາງໄວ້.

ໂອກາດນີ້ ທ່ານ ບົວໄລ ພານຸວົງ ກໍ່ໄດ້ສະເໜີ ຈຸດປະສົງຫຼັກໆ, ກໍ່ເພື່ອລົງມາຕິດຕາມກວດກາ ປະເມີນຜົນຂອງການຊົມໃຊ້ຖານຂໍ້ມູນທີ່ຫ້ອງການກະຊວງຂຽນໂປຣແກຣມອອກມາຝຶກອົບຮົມໃຫ້ບັນດາແຂວງ ແລະ ຂອບເຂດ ທົ່ວປະເທດ ຈັດຕັ້ງປະຕິບັດຜ່ານມາ ເປັນແນວໃດ ແລະ ມີການພັດທະນາແນວໃດເພື່ອແນະນຳເພີ່ມຕື່ມ,ເພື່ອຈະຍົກໃຫ້ເຫັນໄດ້ ຄວາມໝາຍຄວາມສຳຄັນຂອງຖານຂໍ້ມູນ,ເພື່ອແນະນຳສ້າງຄວາມເຂົ້າໃຈໃນການເຮັດບົດສະຫຼຸບລາຍງານວຽກງານຕ່າງໆ ທີ່ຈະປະຕິບັດ ໃນແຕ່ລະເດືອນຈາກທ້ອງຖິ່ນ, ລາຍງານຫາສູນກາງ, ຈາກສູນກາງກໍ່ຄືກະຊວງສະຫຼຸບສັງລວມທົ່ວປະເທດເພື່ອລາຍງານລັດທະບານ ແລະ ກົມການເມືອງ ເພື່ອແກ້ໄຂຂໍ້ສະເໜີຕ່າງໆຂອງທ້ອງຖິ່ນ ແລະ ເພື່ອຟັງຄວາມຄິດເຫັນການສະເໜີແລກປ່ຽນວຽກງານຫ້ອງການກໍ່ຄືຂອດປະສານງານໃນໄລຍະຜ່ານມາ,ເພື່ອເກັບກຳຄືນບັນດາກົມກອງຕ່າງໆທີ່ລົງມາເຮັດວຽກັບທ້ອງຖິ່ນ ສອດຄ່ອງ ແລະ ຖືກຕ້ອງແນວໃດ, ມີຂໍ້ສະດວກ-ຂໍ້ຫຍຸ້ງຍາກແນວໃດ, ເພື່ອຈະໄດ້ຕອບຂໍ້ຂ້ອງໃຈເຊິ່ງກັນແລະກັນ, ຖ້າບັນຫາໃດແກ້ໄຂບໍ່ໄດ້ກໍ່ຈະໄດ້ບັນທຶກ ແລະ ໄປສະເໜີ ການນຳຂອງກະຊວງ ເພື່ອຊອກຫາຊ່ອງທາງແກ້ໄຂ ແລະ ເພື່ອຄວາມເປັນເອກະພາບກັນ.
ຈາກນັ້ນ ຍັງໄດ້ຮັບຟັງລາຍງານໂຄງການປະເມີນຖານຂໍ້ມູນເອກະສານທາງການຈາກວິຊາການໄອທີ ພະແນກຄຸ້ມຄອງເອກະສານຕື່ມອີກ.