ໃນຕອນເຊົ້າຂອງວັນທີ 18 ກຸມພາ 2021 ນີ້ ໄດ້ມີພິທີເປີດ ສະຖາບັນການເງິນຈຸລະພາກ ທີ່ບໍ່ຮັບເງີນຝາກ ໂພທິໄຊ ຈຳກັດ ຂື້ນຢ່າງເປັນທາງການ ຢູ່ທີ່ບ້ານໂພນທອງ ເມືອງແປກ ແຂວງຊຽງຂວາງ, ພາຍໃຕ້ການເປັນປະທານຂອງທ່ານ ນາງ ມາລາຈິດ ໂພທິເດດ, ໂດຍເປັນກຽດເຂົ້າຮ່ວມພິທີ ຂອງທ່ານ ໜໍບີຫາ ຕົ່ງປາວ ຮອງເລາຂາພັກແຂວງຊຽງຂວາງ, ທ່ານ ກົງທະນູ ອຸ່ນສະຫວັນ ເຂລາພັກເມືອງ ເຈົ້າເມືອງໆແປກ, ທ່ານ ວິສອນ ໄຊສົງຄາມ ຫົວໜ້າທະນາຄານແຫ່ງ ສປປ ລາວ ສາຂາພາກເໜືອ ແຂວງຊຽງຂວາງ ຕະຫຼອດຮອດຜູ້ຕາງໜ້າຈາກບັນດາພະແນກການອ້ອມຂ້າງແຂວງ-ເມືອງ, ບັນດາທະນາຄານ, ວິສາຫະກິດ ແລະ ແຂກຖືກເຊີນເຂົ້າຮ່ວມ.

ໃນພິທີ ທ່ານ ນາງ ມາລາຈິດ ໂພທິເດດ ຕາງໜ້າຄະນະປະທານສະຖາບັນການເງິນຈຸລະພາກ ທີ່ບໍ່ຮັບເງີນຝາກ ໂພທິໄຊ ຈຳກັດ ຂື້ນລາຍການການສ້າງຕັ້ງສະຖາບັນໂດຍສັງເຂບ ແລະຄວາມເປັນມາຂອງສະຖາບັນຕໍ່ພິທີໂດຍທ່ານໃຫ້ຮູ້ວ່າ: ໃນລະຫວ່າງປີ 2018-2019 ຜ່ານມານີ້ ເຫັນວ່າຂະບວນການພັດທະນາທາງທຸລະກິດຂະໜາດນ້ອຍ, ຂະໜາດກາງຢູ່ພາຍໃນແຂວງ ໄດ້ມີຄວາມສົນໃຈຕໍ່ການລົງທຶນໃສ່ການຜະລິດຢູ່ພາຍໃນຫລາຍຂື້ນກວ່າເກົ່າ, ການປັບປຸງຊີວິດການເປັນຢູ່ຂອງພະນັກງານ, ທະຫານ, ຕຳຫຼວດ ແລະພໍ່ແມ່ປະຊາຊົນ ກໍ່ມີການເພີ່ມຂື້ນ ມີຄວາມຮຽກຮ້ອງຕ້ອງການທາງດ້ານທຶນຮອນ ຂອງແຕ່ລະພາກສ່ວນຍັງມີສູງ, ເພື່ອມາພັດທະນາຊີວິດການເປັນຢູ່ຂອງຕົນເອງ, ການເຂົ້າຫາແຫຼ່ງທຶນຈາກສະຖາບັນການເງິນມະຫາພາກໃນເງື່ອນໄຂຫຼາຍຢ່າງກໍ່ບໍ່ສາມາດເຂົ້າເຖີງໄດ້. ສະນັ້ນ, ຈີ່ງເກີດມີແນວຄິດຢາກສ້າງຕັ້ງສະຖາບັນການເງິນຈຸລະພາກຂື້ນ.

ຈຸດປະສົງ, ເພື່ອຢາກໃຊ້ທຶນຮອນທີ່ຕົນເອງມີໃຫ້ເກີດປະໂຫຍດຕໍ່ຕົນເອງ ແລະສັງຄົມໄດ້ຊົມໃຊ້, ໂດຍເປັນການປ່ອຍເງິນກູ້ທົ່ວໄປ ຢູ່ບໍລິເວນບັນດາເມືອງ ຂອງແຂວງຊຽງຂວາງ ແລະ ປ່ອຍເງິນກູ້ຈຸລະພາກຂະໜາດນ້ອຍ ແລະກາງ, ປ່ອຍໃຫ້ປະຊາຊົນຜູ້ທຳການຜະລິດ-ຄ້າຂາຍ, ພະນັກງານ, ທະຫານ-ຕຳຫລວດ ຜູ້ທີ່ມີເງື່ອນໄຂຄົບຖ້ວນ. ສະຖາບັນການເງິນຈຸລະພາກໂພທິໄຊ ປະກອບມີ: ຄະນະບໍລິຫານ, ອໍານວຍການ, ຄະນະກຳມະການກວດກາພາຍໃນ, ສິນເຊື້ອ, ບັນຊີ-ເງີນສົດ,ບໍລິຫານ-ການຕະຫຼາດ, ມີຂາຫຸ້ນ3 ຂາ ແລະ ມີທຶນຈົດທະບຽນໃນເບື້ອງຕົ້ນ3 ພັນ ລ້ານກີບ. ຈາກນັ້ນ, ໃນພິທີໄດ້ຜ່ານຂໍ້ຕົກລົງ ວ່າດ້ວຍການອະນຸຍາດດຳເນີນທຸລະກິດ ໃຫ້ແກ່ສະຖາບັນການເງິນຈຸລະພາກ ທີ່ບໍ່ຮັບເງີນຝາກ ໂພທິໄຊ ຈຳກັດ ແລະກໍ່ໄດ້ມອບໃບອະນຸຍາດດຳເນີນທຸລະກິດ ໃຫ້ແກ່ສະຖາບັນການເງິນຈຸລະພາກ ທີ່ບໍ່ຮັບເງີນຝາກ ໂພທິໄຊ ເປັນກຽດກ່າວມອບໂດຍທ່ານ ວິສອນ ໄຊສົງຄາມ ແລະ ກ່າວຮັບໂດຍທ່ານ ນາງ ມາລາຈິດ ໂພທິເດດ. ພ້ອມນັ້ນ, ຄະນະປະທານ ແລະແຂກທີ່ເຂົ້າຮ່ວມໄດ້ພ້ອມກັນຕັດແຖບຜ່າ, ລັ່ນຄ້ອງ ເປີດພິທີຢ່າງເປັນທາງການ ເພື່ອເປັນສິລິມຸງຄຸນຕື່ມອີກ.