ວັນທີ 17 ກຸມພາ 2021 ທີ່ສະໂມສອນໃຫຍ່ຂອງເມືອງໂພນໄຊແຂວງຫຼວງພະບາງ ທ່ານ ທອງຈັນ ລັດຕະນະປະດິດ ເຈົ້າເມືອງໂພນໄຊ ພ້ອມດ້ວຍຄະນະ ແລະ ກໍາມະການ-ອານຸກໍາມະການເລືອກຕັ້ງຂັ້ນເມືອງ ພ້ອມດ້ວຍພະນັກງານຫຼັກແຫຼ່ງ ໄດ້ຕ້ອນຮັບ ທ່ານ ຄຳຂັນ ຈັນທະວີສຸກ ເຈົ້າແຂວງຫຼວງພະບາງ ແລະ ຄະນະ ທີ່ໄດ້ລົງເຄື່ອນໄຫວຊີ້ນຳ ແລະກວດກາຄືນວຽກງານການກະກຽມກ່ອນການເລືອກຕັ້ງສະພາແຫ່ງຊາດ ຊຸດທີ IX ແລະສະພາປະຊາຊົນແຂວງຊຸດທີ II ຢູ່ເມືອງໂພນໄຊ.

ການລົງມາຢ້ຽມຢາມຂອງທ່ານເຈົ້າແຂວງໃນຄັ້ງນີ້ ທ່ານ ທອງຈັນ ລັດຕະນະປະດິດ ເລຂາພັກເມືອງ-ເຈົ້າເມືອງໂພນໄຊ ກໍໄດ້ກ່າວລາຍງານສະພາບລວມກການກຽມປ່ອນບັດເລືອກຕັ້ງ ໃຫ້ຊາບວ່າ: ທົ່ວເມືອງໂພນໄຊມີພົນລະເມືອງລວມທັງໝົດ 35.660 ຄົນ, ຍິງ 17.496 ຄົນ, ມີ 5.828 ຄອບຄົວ, ມີໜ່ວຍປ່ອນບັດລວມ 65 ໜ່ວຍ, ໃນນີ້ມີຜູ້ໃຊ້ສິດປ່ອນບັດຕາມສຳມະໂນຄົວ 18.09 3 ຄົນ, ຍິງ 8.899 ຄົນ, ກວມເອົາ 50,73% ຂອງຈຳນວນພົນລະເມືອງທັງໝົດ, ຜູ້ທີ່ສາມາດປ່ອນບັດຕົວຈິງຢູ່ໃນບ້ານ 16.630 ຄົນ, ຍິງ 8.236 ຄົນ ກວມ 91.91% ຜູ້ມີສິດປ່ອນບັດຢູ່ທ້ອງຖິ່ນອື່ນ 1.225 ຄົນ, ຍິງ 536 ຄົນ ກວມ 3,43%, ຜູ້ໄປເຮັດວຽກຢູ່ຕ່າງປະເທດ 136 ຄົນ, ຍິງ 69 ຄົນ ກວມ 0,38%. ພາຍຫຼັງໄດ້ຮັບຄຳແນະນຳ ຂອງຄະນະກຳມະການເລືອກຕັ້ງລະດັບຊາດ ແລະ ແຈ້ງການຂອງຄະນະກຳມະການເລືອກຕັ້ງຂັ້ນແຂວງ ສະບັບເລກທີ 02/ຄປລຄ ລົງວັນທີ 7 ທັນວາ 2020 ເມືອງໂພນໄຊ ໄດ້ອອກຂໍ້ຕົກລົງແຕ່ງຕັ້ງຄະນະປະຈຳການ, ຄະນະກຳມະການເລືອກຕັ້ງ, ຄໍາແນະນໍາຂອງຄະນະປະຈຳການເລືອກຕັ້ງຂັ້ນເມືອງ ຊຶ່ງໄດ້ກຳນົດເອົາບຸກຄະລາກອນ ເຂົ້າໃນວົງເລືອກຕັ້ງ ສສຂ ຊຸດທີ II ຈຳນວນ 5 ທ່ານ, ຍິງ 1 ທ່ານ, ສຳເລັດການເຊື່ອມຊຶມເອກະສານໃຫ້ແກ່ຄະນະກຳມະການເລືອກຕັ້ງຂັ້ນເມືອງ ແລະ ຫົວໜ່ວຍປ່ອນບັດໃນທົ່ວເມືອງມີຜູເຂົ້າຮ່ວມ 15.893 ຄົນ, ຍິງ 7,952 ຄົນ,ກວມ 95.56% ແລະໄດ້ຮ່ວມກັນສ້າງຂະບວນການອອກແຮງງານຕາມເທດສະບານເມືອງ ແລະ ແຕ່ລະຈຸດໜ່ວຍປ່ອນບັດໃຫ້ມີຄວາມສະອາດ ແລະໄດ້ລົງເກັບກຳຂໍ້ມູນຢູ່ແຕ່ລະບ້ານ ຈຳນວນ 3 ຄັ້ງ ພ້ອມທັງແຕ່ງຕັ້ງຄະນະກຳມະການຮັບຜິດຊອບຢູ່ແຕ່ລະບ້ານ,ສໍາເລັດການກະກຽມເອກະສານຕ່າງໆ ແລະ ຝຶກອົບຮົມໃຫ້ແຕ່ລະໜ່ວຍປ່ອນບັດເລືອກຕັ້ງ,ສຳເລັດລົງໂຄສະນາຫາສຽງຂອງຜູ້ສະມັກເລືອກຕັ້ງ, ຜູ້ຮັບສະມັກ ສສຂ ລົງໂຄສະນາຫາສຽງຢູ່ 3 ຈຸດ ແລະຜູ້ຮັບສະມັກ ສສຊ ລົງໂຄສະນາຫາສຽງຢູ່ 2 ຈຸດ, ໄດ້ຈັດຕັ້ງໜ່ວຍປ້ອງກັນ-ກອງຫຼອນເວນຍາມຕະຫຼອດ 24 ຊົ່ວໂມງ.ສຳເລັດຂຶ້ນບັນຊີໜ່ວຍປ່ອນບັດ ແລະບັນຊີຜູ້ມີສິດເລືອກຕັ້ງໃນທົ່ວເມືອງສຳເລັດ 100%.

ໃນກອງປະຊຸມຍັງໄດ້ຮັບຟັງຄຳແນະນຳຈາກ ທ່ານສິງຕັນ ໄຊລືຊົ່ງ ຮອງປະທານສະພາປະຊາຊົນແຂວງ ແລະທ່ານ ຄຳຫຼ້າ ລຽນປະດິດ ປະທ່ານກວດກາພັກ-ລັດແຂວງ ໂດຍໄດ້ເນັ້ນໃຫ້ເອົາໃຈໃສ່ແຕ່ລະຈຸດປ່ອນບັດ ແລະກວດຄືນຈຳນວນຄົນຜູ້ມີຊິດປ່ອນບັດເລືອກຕັ້ງ ແລະເຂັ້ມງວດໃນການເຜີຍແຜ່ຂໍ້ມູນຂ່າວສານທາງໂຊຊ່ຽວ ເພື່ອຮັບປະກັນທາງດ້ານລະບຽບການເລືອກຕັ້ງໃຫ້ເຂັ້ມງວດ. ໂອກາດດັ່ງກ່າວ ທ່ານ ຄໍາຂັນ ຈັນທະວີສຸກ ເຈົ້າແຂວງຫຼວງພະບາງກໍ່ໄດ້ມີບາງຄຳເຫັນຊີ້ນຳ ຕໍ່ຄະນະບໍລິຫານງານພັກເມືອງ ແລະຄະນະຮັບຜິດຊອບການປ່ອນບັດເລືອກຕັ້ງ ໃຫ້ເອົາໃຈໃສ່ເຊື່ອມຊຶມ ແລະຜັນຂະຫຍາຍບັນດາມະຕິແຕ່ລະຂັ້ນ ເຂົ້າໃນແຕ່ລະຂົງເຂດຢ່າງລະອຽດໃນໄລຍະ 5 ປີຕໍ່ໜ້າ,ໃຫ້ຄະນະພັກກວດຄືນແຜ່ນພັດທະນາເມືອງ 5 ປີ ໂດຍສົມທຽບມະຕິກອງປະຊຸມໃຫຍ່ຄັ້ງທີ VIII ຂອງແຂວງ ແລະ ກອງປະຊຸມຂອງລັດຖະບານໄດ້ຮັບຮອງ, ໂດຍອີງໃສ່ສະພາບເງື່ອນໄຂທ່າແຮງຂອງເມືອງທີ່ສາມາດເຮັດໄດ້, ກໍານົດເປັນລະອຽດຢ່າງມີຈຸດສຸມ,ມີການແບ່ງວຽກງານວິຊາສະເພາະໃຫ້ບຸກຄົນຮັບຜິດຊອບ ແລະ ເປັນເອກະພາບກັນໃນການຈັດຕັ້ງປະຕິບັດໃຫ້ໄດ້ຮັບຜົນສໍາເລັດ.ນອກນັ້ນ ໃຫ້ເອົາໃຈໃສ່ ຮູບແບບຂອງການປ່ອນບັດແຕ່ລະຈຸດ ເພື່ອປ້ອງກັນພະຍາດໂຄວິດ-19 ແລະໃຫ້ຮັກສາຄວາມສະຫງົບປອດໄພຢ່າງເຂັ້ມງວດ.

ຫຼັງຈາກນັ້ນທ່ານ ເຈົ້າແຂວງຫຼວງພະບາງ ແລະ ຜູ້ເຂົ້າຮ່ວມ ກໍໄດ້ລົງໄປຢ້ຽມຢາມ-ກວດກາໜ່ວຍປ່ອນບັດບ້ານປາກງາ ເພື່ອຮັບປະກັນຄວາມພ້ອມ ໃຫ້ໄດ້ຮັບປະສິດທິພາບ ແລະໄດ້ຮັບຜົນສຳເລັດຕາມຄາດໝາຍທີ່ວາງໄວ້ຕື່ມອີກ.