ໃນລະຫວ່າງວັນທີ 11-12 ກຸມພາ 2021 ນີ້ ຄະນະສະຫະພັນກຳມະບານແຂວງສະຫວັນນະເຂດ ຍັງໄດ້ສືບຕໍ່ເຄື່ອນໄຫວປາຖະກະຖາເລົ່າມູນເຊື້ອວັນສ້າງຕັ້ງສະຫະພັນກຳມະບານລາວ ຄົບຮອບ 65 ປີ ຢູ່ທີ່ກຳມະບານຮາກຖານທະນາຄານສົ່ງເສີມກະສິກຳ, ອົງການໄອຍະການປະຊາຊົນແຂວງແລະສານປະຊາຊົນແຂວງໂດຍມີ ທ່ານ ນາງ ພົມມາ ທອງເພັງ,ທ່ານ ຄຳຕັນ ສີໂພໄຊ ແລະ ທ່ານ ມຸນທາ ໄຊຍະລິດ ໂດຍມີຄະນະພັກ,ຫົວໜ້າສາຂາ,ຄະນະປະທານກຳມະບານຮາກຖານແລະພະນັກງານ ທີ່ເປັນສະມາຊິກກຳມະບານເຂົ້າຮ່ວມຮັບຟັງທັງໝົດ 71 ເທື່ອຄົນ,ຍິງ 45 ເທື່ອຄົນ.

ອັນທີ່ສຳຄັນກໍ່ແມ່ນແຕ່ລະທ່ານກໍ່ໄດ້ຍົກໃຫ້ເຫັນເຖິງສະພາບແວດລ້ອມທີ່ພາໃຫ້ມີການກຳເນີດເຕີບໃຫຍ່ຂະຫຍາຍຕົວ ນັບແຕ່ການຈັດຕັ້ງກຳມະບານລາວໄດ້ຮັບການສ້າງຕັ້ງຂຶ້ນໃນວັນທີ 1 ກຸມພາ 1956 ຢູ່ເຂດປົດປ່ອຍໃນເວລານັ້ນພັກໄດ້ເອົາໃຈໃສ່ຊີ້ນຳກໍ່ສ້າງເສດຖະກິດຢ່າງເປັນລະບົບ ສ້າງໂຮງຈັກ,ໂຮງງານຈຳນວນຫຼາຍແຫ່ງ ເປັນຕົ້ນ ໂຮງງານຕີເຫລັກ,ໂຮງງານຕ່ຳແຜ່ນ,ໂຮງງານປຸງແຕ່ງສະບຽງອາຫານ,ໄປສະນີ,ຖະໜົນຫົນທາງແລະອື່ນໆ ອັນໄດ້ເຮັດໃຫ້ກຳມະກອນນັບມື້ເພີ່ມຂຶ້ນ ອົງການກຳມະບານກໍ່ໄດ້ສ້າງຕັ້ງຮາກຖານຂຶ້ນຢູ່ແຕ່ລະຫົວໜ່ວຍການຜະລິດ ແຕ່ລະສຳນັກງານໂດຍຢຶດໝັ້ນແນວທາງນະໂຍບາຍຂອງພັກ.ນອກນັ້ນກໍ່ຍັງໄດ້ກ່າວເຖິງຜົນງານທີ່ພົ້ນເດັ່ນໄລຍະ 65 ປີ ຂອງການຈັດຕັ້ງແລະການເຄື່ອນໄຫວວຽກງານກຳມະບານໃນການປະກອບສ່ວນພາລະກິດປະຕິວັດອີກດ້ວຍ.