ເພື່ອເຮັດໃຫ້ປະຊາຊົນຜູ້ມີສິດເລືອກຕັ້ງເຂົ້າໃຈ ແລະ ຕື່ນຕົວອອກໄປໃຊ້ສິດຂອງຕົນຢ່າງເຕັມສ່ວນໃນການເລືອກເອົາຜູ້ແທນຂອງຕົນເຂົ້າຢູ່ໃນສະພາແຫ່ງຊາດ ແລະ ສະພາປະຊາຊົນແຂວງ ໃນຈຳນວນຜູ້ສະໝັກ 25 ທ່ານແມ່ນໃຫ້ຂີດອອກ 5 ທ່ານ ເພື່ອເປັນຕົວແທນແຫ່ງສິດເປັນເຈົ້າຂອງປະຊາຊົນເຂົ້າໃນການຕັດສິນບັນຫາສຳຄັນຂອງຊາດເພື່ອປະຊາຊົນ,ໂດຍປະຊາຊົນຢ່າງແທ້ຈິງ. ດັ່ງນັ້ນມາໃນຕອນບ່າຍວັນທີ 16 ກຸມພາ2021 ນີ້ ຢູ່ທີ່ສະໂມສອນເມືອງຊົນນະບູລີ ແຂວງ ສະຫັວນະເຂດໄດ້ຈັດພິທີຕ້ອນຮັບ ແລະ ຮັບຟັງການລາຍງານກ່ຽວກັບການກຽມພ້ອມໃຫ້ແກ່ບັ້ນເລືອກຕັ້ງສະມາຊິກສະພາແຫ່ງຊາດຊຸດທີ IX ແລະ ສະມາຊິກສະພາປະຊາຊົນຂັ້ນແຂວງຊຸດທີ II ປະຈຳເຂດເລືອກຕັ້ງເມືອງຊົນນະບູລີ .ໂດຍການໃຫ້ກຽດຕ້ອນຮັບຂອງ ທ່ານ ສຸວິໄລ ຫຼວງຊະລາດ ກຳມະການພັກແຂວງ ເລຂາພັກເມືອງ ເຈົ້າເມືອງຊົນນະບູລີ ,ມີຄະນະກຳມະການເລືອກຕັ້ງຂັ້ນເມືອງ ແລະ ຜູ້ມີສິດເລືອກຕັ້ງພາຍໃນເມືອງຊົນນະບູລີເຂົ້າຮ່ວມ.

ໃນພິທີໄດ້ຮັບຟັງການລາຍງານກ່ຽວກັບການກະກຽມໃຫ້ແກ່ບັ້ນເລືອກຕັ້ງໃນຄັ້ງນີ້ ຈາກທ່ານ ສຸວິໄລ ຫຼວງຊະລາດ ກຳມະການພັກແຂວງ ເລຂາພັກເມືອງ ເຈົ້າເມືອງຊົນນະບູ ເຊິ່ງຜ່ານມາຄະນະພັກ ອົງການປົກຄອງເມືອງຊົນນະບູລີໄດ້ເອົາໃຈໃສ່ຊີ້ນຳ ນຳພາການຈັດຕັ້ງທຸກພາກສວ່ນ ແລະ ພໍ່ແມ່ປະຊາຊົນບັນດາເຜົ່າຊາວເມືອງຊົນນະບູລີ ພ້ອມພາກັນອອກແຮງແຂ່ງຂັນທັງເປັນການສ້າງຂະບວນການຂ່ຳນັບຮັບຕ້ອນໃຫ້ແກ່ການເລືອກຕັ້ງສະມາຊິກສະພາແຫ່ງຊາດຊຸດທີ IX ແລະ ສະມາຊິກສະພາປະຊາຊົນຂັ້ນແຂວງຊຸດທີ II ເຂດເລືອກຕັ້ງທີ 13 ແຂວງ ສະຫວັນນະເຂດ ທີ່ຈະໄດ້ຈັດຂື້ນໃນວັນທີ 21 ກຸມພາ 2021ນີ້ ເຊິ່ງເຮັດໃຫ້ຂະບວນການຫຼາຍດ້ານໄດ້ຮັບຜົນສຳເລັດຢ່າງເປັນຮູບປະທຳ ສຳລັບວຽກງານຈຸດສຸມທີ່ກະກຽມໃຫ້ແກ່ການເລືອກຕັ້ງເພື່ອຮັບປະກັນໃຫ້ໄດ້ 300% ເມືອງຊົນນະບູລີ ມີບ້ານທັງໝົດ 63 ບ້ານ,ຈຳນວນພົນລະເມືອງທັງໝົດ 67. 049 ຄົນ ຍິງ 33.382 ຄົນ ອາຍຸກະສຽນ 18 ປີ ຂື້ນໄປ 40.393 ຄົນ ຍິງ 20.174 ຄົນ ຜູ້ມີໜ້າຕົວຈິງທີ່ມີສິດເລືອກຕັ້ງ 30.491 ຄົນ ຍິງ 15.623 ຄົນ , ໄປສືກສາຢູ່ພາຍໃນປະເທດ 453 ຄົນ ຍິງ 205 ຄົນ.ໄປສືກສາຢູ່ຕ່າງປະເທດ 49 ຄົນ ຍິງ 25 ຄົນ ,ໄປອອກແຮງງານພາຍໃນປະເທດ 1.799 ຄົນ ຍິງ 752 ຄົນ ,ຜູ້ມີສິດເລືອກຕັ້ງໄປອອກແຮງງານ ຢູ່ຕ່າງປະເທດ 7.316 ຄົນ ຍິງ 4.007 ຄົນ ,ຖືກສານຕັດສິນລົງໂທດຕັດອິດສະຫລະພາບ 73 ຄົນ ຍິງ 20 ຄົນ, ຜູ້ເປັນບ້າເສຍຈິດ 212 ຄົນ ຍິງ 83 ຄົນ , ທົ່ວເມືອງກຳນົດເອົາ 41 ຫນ່ວຍປ່ອນບັດ ,ມີຄະນະຮັບຜິດຊອບ 567 ຄົນ , ກຳລັງປ້ອງກັນຊາດ – ປ້ອງກັນຄວາມສະຫງົບ 82ຄົນ.

ຈາກນັ້ນກໍ່ໄດ້ຮັບຟັງການລາຍງານຊື່ແລະປະຫວັດຂອງຜູ້ສະໜັກຮັບເລືອກຕັ້ງສະມາຊິກສະພາແຫ່ງຊາດທັງ 25 ທ່ານ, ຍິງ 7 ທ່ານ ແລະ ຜູ້ສະໝັກສະມາຊິກສະພາປະຊາຊົນແຂວງປະຈຳເຂດເລືອກຕັ້ງເມືອງຊົນນະບູລີ 4 ທ່ານ, ຍິງ 3 ທ່ານ. ພ້ອມຮັບຟັງການພົບປະໂອ້ລົມຈາກຜູ້ສະໝັກນ້ຳເບີ 22 ທ່ານ ນາງ ບັງອອນ ພິມມະສານ ເຊິ່ງທ່ານໄດ້ໃຫ້ຮູ້ເຖິງວຽກງານສິດໜ້າທີ່,ພາລະບົດບາດ , ການຈັດຕັ້ງປະຕິບັດວຽກງານ ຂອງສະມາຊິກສະພາແຫ່ງຊາດ ຕາມທີ່ໄດ້ກຳນົດໄວ້ໃນກົດໝາຍວ່າດ້ວຍສະພາແຫ່ງຊາດ ນຳມາເຜີຍແຜ່ໃຫ້ປະຊາຊົນໄດ້ຮັບຮູ້,ເຂົ້າໃຈ ແລະ ເພື່ອນຳເອົາຄວາມຄິດເຫັນ ນຳສະເໜີຕໍ່ກອງປະຊຸມສະພາແຫ່ງຊາດ ຈາກນັ້ນກໍ່ໄດ້ຮັບຟັງການໂອ້ລົມຈາກທ່ານຜູ້ສະໝັກນ້ຳເບີທີ 15 ທ່ານ ພູຂົງ ຈິດຮູບໂລກ ເຊິ່ງທ່ານໄດ້ເວົ້າເຖິງວຽກງານພັດທະນາພື້ນຖານໂຄງລ່າງ ວຽກງານພັດທະນາເສດຖະກິດສັງຄົມ ແລະ ການສື່ສານຜ່ານລະບົບອິນເຕີເນັດທີ່ທັນສະໄໝຂອງເມືອງຊົນນະບູລີ , ຈາກນັ້ນກໍ່ໄດ້ຮັບການໂອ້ລົມຂອງທ່ານ ນາງ ຄອນສະຫັວນ ແກ້ວດວງດີ ຜູ້ສະໝັກນ້ຳເບີ 1 ສະມາຊິກສະພາປະຊາຊົນແຂວງເຂດເລືອກຕັ້ງເມືອງຊົນນະບູລີ ແລະ ທ່ານ ຄຳຜັນ ຄູນສະຫັວນ ຜູ້ສະໝັກເລືອກຕັ້ງສະມາຊິກສະພາແຫ່ງຊາດ ນ້ຳເບີ 3 ຕື່ມອີກ.