ວັນທີ 17 ກຸມພາ 2021 ນີ້ກອງບັນຊາການທະຫານ ແຂວງອັດຕະປື ໄດ້ເປີດຮຽນກົດລະບຽບຂອງພັກໃຫ້ມະຫາຊົນຜູ້ທີ່ມີຄວາມກ້າວໜ້າ ເພື່ອຂະຫຍາຍເຂົ້າພັກປະຊາຊົນ ປະຕິວັດລາວ ຊຸດທີI ປະຈຳປີ 2021 ໃຫ້ກຽດເຂົ້າຮ່ວມ ແລະ ບັນລະຍາຍເອະສານ ໂດຍ ພັນໂທ ບຸນຍົງ ໄຊຍະຕະກຸນ ຄະນະພັກຫ້ອງການເມືອງ ຫົວໜ້າພະແນກຈັດຕັ້ງພັກ,ມີຄະນະຮັບຜິດຊອບເປີດຮຽນກົດລະບຽບຂອງພັກ ພ້ອມດ້ວຍບັນດາເປົ້້າໝາຍ ເພື່ອຂະຫຍາຍເຂົ້າພັກ ທົ່ວກອງບັນຊາການທະຫານແຂວງອັດຕະປື ເຂົ້າຮ່ວມ.
ໃນພິທີໄດ້ຜ່ານມະຕິຕົກລົງຂອງຄະນະພັກຫ້ອງການເມືອງ ວ່າດ້ວຍການອະນຸມັດໃຫ້ພະແນກຈັດຕັ້ງພັກ ເປີດຮຽນກົດລະບຽບພັກປະຊາຊົນລາວ ຊຸດທີI ປະຈໍາປີ 2021. ອີງຕາມ ກົດລະບຽບພັກປະຊາຊົນປະຕິວັດລາວ ສະໄໝທີX ໝວດທີI ມາດຕາ2 ວ່າດ້ວຍລະບຽບການຂະຫຍາຍເຂົ້າພັກ.

ຈາກນັ້ນພັນໂທ ບຸນຍົງ ໄຊຍະຕະກຸນ ໄດ້ບັນລະຍາຍເນື້ອໃນເອກະສານຂອງພັກປະຊາຊົນປະຕິວັດລາວ ສະໄໝທີX ໃຫ້ແກ່ມະຫາຊົນທີ່ມີຄວາມກ້າວໜ້າ ຈໍານວນ 81 ສະຫາຍ,ຍິງ 7 ສະຫາຍ ໄດ້ສຶກສາຮຽນຮູ້ ເຖິງຄວາມເປັນມາຂອງພັກປະຊາຊົນ ປະຕິວັດລາວ ບັນດາເນື້ອ ໃນພື້ນຖານກ່ຽວກັບການກໍ່ສ້າງພັກ ຝົນຫຼໍ່ຫຼອມຕົນເອງໃຫ້ກາຍເປັນສະມາຊິກພັກ ໄປຕາມ 5 ຫຼັກການ 3 ທິດນໍາຂອງພັກປະຊາຊົນ ປະຕິວັດລາວ,ລວມທັງຮັບຮູ້ທີ່ຕັ້ງ,ພາລະບົດບາດ,ໜ້າທີ່ ແລະ ຂໍ້ຫ້າມຂອງສະມາຊິກພັກ ເຂົ້າໃນການປະຕິບັດໜ້າທີ່ວຽກງານຂອງຕົນ,ກົມກອງໃຫ້ມີຄວາມໜັກແໜ້ນເຂັ້ມແຂງ.

ຂ່າວຍັງໃຫ້ຮູ້ຕື່ມອີກວ່າ: ໃນວັນທີ 16 ກຸມພາຜ່ານມານີ້ທີ່ສະໂມສອນກອງບັນຊາການທະຫານແຂວງອັດຕະປື ຍັງໄດ້ຈັດຕັ້ງການກວດຫາສານເສບຕິດ ໃຫ້ແກ່ພະນັກງານ-ນັກຮົບ ທີ່ນອນໃນເປົ້າໝາຍຂະຫຍາຍເຂົ້າພັກ ຈຳນວນ 316 ສະຫາຍ,ຍິງ 44 ສະຫາຍ.ໃນນັ້ນ,ສະມາຊິກພັກສໍາຮອງເລື່ອນເປັນສະມາຊິກພັກສົມບູນ ມີ 104 ສະຫາຍ,ຍິງ 18 ສະຫາຍ,ມະຫາຊົນຂະຫຍາຍເຂົ້າພັກສຳຮອງ ມີ 59 ສະຫາຍ, ຍິງ 6 ສະຫາຍ,ມະຫາຊົນຮຽນກົດລະບຽບພັກ 81 ສະຫາຍ,ຍິງ 7 ສະຫາຍ ແລະ ມະຫາຊົນກ້າວໜ້າເຂົ້າຮຽນສະໜັບສະໜູນ ມີ 72 ສະຫາຍ,ຍິງ 13 ສະຫາຍ.