ຜູ້ສະໝັກຮັບເລືອກຕັ້ງສະມາຊິກສະພາແຫ່ງຊາດຊຸດທີ IX ແລະ ສະມາຊິກສະພາປະຊາຊົນຊຸດແຂວງ ຊຸດທີ II ເມືອງໄຊຍະບູລີ ລົງພົບປະຫາສຽງໃນເຂດເທດສະບານ ແຂວງໄຊຍະບູລີ ໄດ້ຈັດທີ່ເດີ່ນສະໝາມຫຼວງຂອງແຂວງ ໃນວັນທີ 19 ກຸມພາ 2021 ນີ້ ແລະ ເປັນເມືອງສຸດທ້າຍຂອງການຫາສຽງ ຂອງຜູ້ສະໝັກຮັບເລືອກຕັ້ງ ສສຊ ຊຸດທີ IX ແລະ ສສຊ ຊຸດທີ II ໄດ້ພົບປະຜູ້ມີສິດເລືອກຕັ້ງ ຢູ່ໃນ 11 ເມືອງທົ່ວແຂວງໄຊຍະບູລີ, ມີການນໍາຂອງແຂວງ, ຂອງເມືອງ, ພະນັກງານ-ລັດຖະກອນ, ນັກທຸລະກິດ, ຜູ້ປະກອບການ ແລະ ຜູ້ມີສິດປ່ອນບັດແຕ່ອາຍຸ 18 ປີ ຂຶ້ນໄປ ພາຍໃນ 14 ບ້ານ ໃນເທດສະບານແຂວງເຂົ້າຮ່ວມ.

ໃນພິທີຜູ້ສະໝັກຮັບເລື້ອກຕັ້ງສະມາຊິກສະພາແຫ່ງຊາດ ຊຸດທີ IX ປະຈໍາເຂດເລືອກຕັ້ງທີ 7 ແຂວງໄຊຍະບູລີ ແລະ ຜູ້ສະໝັກສະມາຊິກສະພາປະຊາຊົນແຂວງ ຊຸດທີ II ປະຈໍາເຂດເລືອກຕັ້ງເມືອງໄຊຍະບູລີ. ໄດ້ຂຶ້ນສະເໜີຕົວ ຜ່ານຊີວະປະຫວັດການເຄືີ່ອນໄຫວວຽກງານຂອງຕົນເອງໃນແຕ່ລະໄລຍະ ພ້ອມທັງຍົກໃຫ້ເຫັນພາລະບົດບາດ, ສິດໜ້າທີ່ຂອງສະພາແຫ່ງຊາດ ແລະ ສະພາປະຊາຊົນແຂວງ. ເມືອງໄຊຍະບູລີ ມີພົນລະເມືອງທັງໝົດ 80.361 ຄົນ, ຍິງ 39.451 ຄົນ, ມີຜູ້ມີສິດປ່ອນບັດເລືອກຕັ້ງທັງໝົດ 60.614 ຄົນ, ຍິງ 27.614 ຄົນ, ມີ 84 ໜ່ວຍເລືອກຕັ້ງ; ໃນນີ້ມີ 76 ໜ່ວຍປ່ອນບັດຂອງບ້ານ, 7 ໜ່ວຍປ່ອນບັດ ຂອງກໍາລັງປະກອບອາວຸດ ແລະ ໜ່ວຍຫີບບັດເຄື່ອນທີ່ 1 ໜ່ວຍ. ທັງນີ້ກໍ່ເປັນການສືບຕໍ່ປະຕິບັດພາລະບົດບາດ ສິດໜ້າທີ່ຂອງສະພາແຫ່ງຊາດໃຫ້ມີລັກສະນະຕໍ່ເນື່ອງ ເພື່ອປະກອບສ່ວນເຂົ້າໃນພາລະກິດປ່ຽນແປງໃໝ່ ຂອງພັກ ໃນໄລຍະການປົກປັກຮັກສາ ພັດທະນາປະເທດຊາດ ໃຫ້ຈະເລີນເຂັ້ມແຂງຂຶ້ນເລື່ອຍໆ.

ສະນັ້ນນັບແຕ່ປະເທດຊາດພວກເຮົາໄດ້ຮັບການປົດປ່ອຍຢ່າງສົມບູນ ມາເຖິງປະຈຸບັນປະຊາຊົນບັນດາເຜົ່າ ໄດ້ກາຍເປັນເຈົ້າຂອງປະເທດຊາດຢ່າງແທ້ຈິງ ແລະ ໄດ້ນໍາໃຊ້ສິດປະຊາທິປະໄຕຂອງຕົນ ເຂົ້າໃນການເລືອກຕັ້ງ ສສຊ ຊຸດທີ IX ແລະ ສສຂ ຊຸດທີ II ການເລື້ອກຕັ້ງໃນຄັ້ງນີ້ ເປັນເຫດການ-ການເມືອງທີ່ມີຄວາມໝາຍຄວາມສໍາຄັນ ທັງເປັນປາງບຸນໃຫຍ່ສໍາລັບປວງຊົນລາວທັງຊາດ, ເຊິ່ງພົນລະເມືອງລາວທຸກຄົນທີ່ມີອາຍຸ 18 ປີ ຂຶ້ນໄປລ້ວນແຕ່ໄດ້ໃຊ້ສິດອັນພື້ນຖານຂອງຕົນ ເພື່ອໄປປ່ອນບັດເລືອກຕັ້ງເອົາຜູ້ສະໝັກຮັບເລືອກຕັ້ງ ທີ່ມີມາດຖານຄົບຖ້ວນ ແລະ ສົມກຽດສັກສີ ເຂົ້າໃນສະພາແຫ່ງຊາດ ຊຸດທີ IX ແລະ ສະພາປະຊາຊົນແຂວງຊຸດທີ II ພ້ອມດຽວກັນນີ້ຜູ້ຮັບສະໝັກຮັບເລືອກຕັ້ງ ສສຊ ຊຸດທີ IX ແລະ ສສຂ ຊຸດທີ II ຍັງໄດ້ຮຽກຮ້ອງໃຫ້ບັນດາຜູ້ມີສິດປ່ອນບັດແຕ່ອາຍຸ 18 ປີຂຶ້ນໄປໃຊ້ສິດຂອງຕົນເລືອກເອົາຜູ້ທີ່ມີເງື່ອນໄຂມາດຕະຖານຄົບຖ້ວນທັງຮັບປະກັນໃຫ້ໄດ້ 400 ຄື: ຜູ້ມີສິດປ່ອນບັດຕ້ອງໄປໃຫ້ຄົບ 100%, ບໍ່ໃຫ້ມີບັດຕາຍ 100%, ຮັບປະກັນມີຄວາມສະຫງົບປອດໄພ 100%, ມີຄວາມວ່ອງໄວຖືກຕ້ອງຊັດເຈນ 100%. ສະເພາະຜູ້ສະໝັກຮັບເລືອກຕັ້ງເປັນສະມາຊິກສະພາແຫ່ງຊາດ ຊຸດທີ IX ເຂດເລືອກຕັ້ງທີ 7 ແຂວງໄຊຍະບູລີ ມີ 12 ທ່ານ, ຍິງ 2 ທ່ານ, ເລືອກເອົາ 9 ທ່ານ ແລະ ສະມາຊິກສະພາປະຊາຊົນແຂວງ ຊຸດທີ II ມີທັງໝົດ 54 ທ່ານ, ຍິງ 19 ທ່ານ ໃນ 11 ເມືອງທົ່ວແຂວງໄຊຍະບູລີ ແລະ ເລືອກເອົາ 32 ທ່ານ. ສະເພາະໃນເຂດເລືອກຕັ້ງເມືອງໄຊຍະບູລີ ມີ ສສຂ ທັງໝົດ 5 ທ່ານ, ຍິງ 2 ທ່ານ, ເລືອກເອົາ 3 ທ່ານ.