ໃນວັນທີ 13 ກຸມພາ 2021 ຜ່ານມານີ້, 23 ກົມກອງທີ່ຂຶ້ນກັບກອງພົນທະຫານຮາບທີ 4 ໄດ້ສຳເລັດການປ່ອນບັດເລືອກຕັ້ງສະມາຊິກສະພາແຫ່ງຊາດ ຊຸດທີ IX ແລະ ສະມາຊິກສະພາປະຊາຊົນແຂວງ ຊຸດທີ II ແຂວງສະຫວັນນະເຂດ ປະຈຳເຂດເລືອກຕັ້ງທີ 13 ໂດຍການເປັນປະທານຂອງ ຄະນະພັກ-ຄະນະບັນຊາແຕ່ລະກົມກອງ, ມີອະນຸກຳມະການຄວບຄຸມການປ່ອນບັດ, ຕະຫຼອດຮອດພະນັກງານ-ນັກຮົບເຂົ້າຮ່ວມຢ່າງເປັນຂະບວນການຟົດຟື້ນ.

ໃນການປ່ອນບັດເລືອກຕັ້ງສະມາຊິກສະພາແຫ່ງຊາດຊຸດທີ IX ແລະ ສະມາຊິກສະພາປະຊາຊົນແຂວງ ຊຸດທີ II ແຂວງສະຫວັນນະເຂດ ປະຈຳເຂດເລືອກຕັ້ງທີ 13 ໃນນີ້ພະນັກງານ-ນັກຮົບທັງ 23 ກົມກອງ ທີ່ຂຶ້ນກັບກອງພົນທີ 4 ຈະໄດ້ພ້ອມກັນຍົກສູງໜ້າທີ່ການເມືອງຂອງແຕ່ລະສະຫາຍໃຫ້ສູງຂຶ້ນກວ່າເກົ່າໃຊ້ສິດໃຊ້ສຽງໃຫ້ເຕັມທີ່ເພື່ອເລືອກເຟັ້ນເອົາຜູ້ແທນທີ່ມີຄວາມຮູ້ຄວາມສາມາດ, ມີແນວຄິດສ້າງສາພັດທະນາບ້ານເມືອງໃຫ້ຈະເລີນກ້າວໜ້າ ເຊີ່ງເປັນກະບອກສຽງເປັນຕົວແທນໃຫ້ນາຍ ແລະ ພົນທະຫານໄປນັ່ງຢູ່ສະພາ, ເຂົ້າຢູ່ໃນອຳນາດລັດຂັ້ນສູນກາງ ແລະ ຂັ້ນທ້ອງຖິ່ນສະແດງໃຫ້ເຫັນທາດແທ້ລັດທີ່ມາຈາກປະຊາຊົນ, ຂອງປະຊາຊົນ, ໂດຍປະຊາຊົນ ແລະ ເພື່ອຜົນປະໂຫຍດຂອງປະຊາຊົນຢ່າງແທ້ຈິງ

ການເລືອກຕັ້ງຊຸດນີ້ເປັນການປັບປຸງບູລະນະກົງຈັກການຈັດຕັ້ງ ແລະ ບຸກຄະລາກອນຂອງລະບົບການເມືອງຢູ່ຂັ້ນສູນກາງ ແລະ ທ້ອງຖິ່ນເປັນການເລືອກເຟັ້ນ ແລະ ສັບຊ້ອນພະນັກງານສະມາຊິກພັກເຂົ້າຮັບຜິດຊອບວຽກງານຕ່າງໆເຮັດໃຫ້ການຈັດຕັ້ງທຸກຂັ້ນສາມາດປະຕິບັດໜ້າທີ່ການເມືອງຂອງຕົນຢ່າງເຕັມສ່ວນມີປະສິດທິພາບໃນເວທີການເມືອງທຸກຂັ້ນ. ໃນນີ້ສຳລັບສະມາຊິກສະພາແຫ່ງຊາດ ຊຸດທີ IX ມີ 25 ທ່ານ, ໃຫ້ເລືອກເອົາ 20ທ່ານ, ແລະ ສະພາປະຊາຊົນແຂວງມີ 5 ທ່ານ ເລືອກເອົາ 3 ທ່ານ, ສາມາດຮັບປະກັນບັດໄດ້ 100% ການປ່ອນບັດເລືອກຕັ້ງດັ່ງກ່າວ ແມ່ນໄດ້ດຳເນີນໄປເປັນເວລາ 1 ວັນ ຈຶ່ງສຳເລັດພາຍໃຕ້ບັນຍາກາດເບີກບານມ່ວນຊື່ນ ຮັກສາໄດ້ຄວາມປອດໄພ 100%