ໃນວັນທີ 18 ກຸມພາ 2021 ບັນດາຜູ້ສະໝັກຮັບເລືອກຕັ້ງສະມາຊິກສະພາແຫ່ງຊາດ ຊຸດທີ IX ປະຈໍາເຂດເລືອກຕັ້ງທີ່ 12 ແຂວງຄໍາມ່ວນ ແມ່ນໄດ້ສືບຕໍ່ເຄື່ອນໄຫວສະເໜີຕົວ ຢູ່ເມືອງໜອງບົກ. ເຊິ່ງເປັນເມືອງທີ 09 ຂອງການພົບປະຜູ້ມີສິດປ່ອນບັດເລືອກຕັ້ງ. ຕາງໜ້າການນໍາຂອງແຂວງເຂົ້າຮ່ວມເຄື່ອນໄຫວ ຊຸກຍູ້ – ຕິດຕາມ ໃນຄັ້ງນີ້ໂດຍ ທ່ານ ສົມໃຈ ເພັດສີນວນ ປະທານສະພາປະຊາຊົນ ແຂວງຄໍາມ່ວນ, ໃນນາມຄະນະກໍາມະການເລືອກຕັ້ງຂັ້ນແຂວງ.

ການພົບປະລະຫວ່າງ ຜູ້ສະໝັກຮັບເລືອກຕັ້ງ ແລະ ຜູ້ມີສິດປ່ອນບັດເລືອກຕັ້ງ ຢູ່ບັນດາຈຸດຕ່າງໆ ຂອງ ເມືອໜອງບົກ ແມ່ນເຕັມໄປດ້ວຍບັນຍາກາດອັນອົບອຸ່ນ, ແຫ່ງຄວາມສາມັກຄີຮັກແພງ ແລະ ໄດ້ຮັບຄວາມເອົາໃຈໃສ່ເປັນຢ່າງດີ ຈາກຄະນະພັກອໍານາດການປົກຄອງຂັ້ນເມືອງ, ບ້ານ ແລະ ປະຊາຊົນບັນດາເຜົ່າ ໄປຄຽງຄູ່ກັບການຮັກສາຄວາມ ສະຫງົບ – ຄວາມປອດໄພ ແລະ ການປະຕິບັດມາດຕະການປ້ອງກັນພະຍາດໂຄວິດ 19. ໂອກາດນີ້ບັນດາຜູ້ສະໝັກຮັບເລືອກຕັ້ງ ສສຊ ປະຈໍາເຂດເລືອກຕັ້ງທີ່ 12 ແຂວງຄໍາມ່ວນ ແມ່ນໄດ້ຜັດປ່ຽນກັນ ຂຶ້ນແນະນໍາຕົວ ແລະ ໃຫ້ລາຍລະອຽດກ່ຽວກັບການເຄື່ອນໄຫວວຽກງານຂອງຕົນໃນແຕ່ລະໄລຍະ, ພ້ອມທັງໄດ້ຍົກໃຫ້ເຫັນພາລະ – ບົດບາດ, ໜ້າທີ່ຂອງສະພາ ແລະ ສະມາຊິກສະພາແຫ່ງຊາດ, ຕະຫຼອດຈຸດປະສົງເປົ້າໝາຍກໍ່ຄືວິໄສທັດໃນການພັດທະນາ ການເສີມຂະຫຍາຍພາລະບົດບາດການເປັນຕົວແທນທີ່ດີຂອງສະມາຊິກສະພາ ໃນການເປັນກະບອກສຽງເປັນຕົວແທນທີ່ດີ ໃຫ້ແກ່ ພໍ່ແມ່ປະຊາຊົນ.

ເມືອງໜອງບົກ ມີ ທັງໝົດ 55 ບ້ານ, ມີພົນລະເມືອງ 53.618 ຄົນ, ຍິງ 27. 393 ຄົນ, ຜູ້ມີສິດປ່ອນບັດ ເລືອກຕັ້ງ 35.924 ຄົນ, ຍິງ 18.627 ຄົນ, ມີໜ້າຕົວຈິງ 25.283 ຄົນ, ຍິງ 13.000 ກວ່າຄົນ, ໄດ້ກໍານົດເອົາໜ່ວຍປ່ອນບັດເລືອກຕັ້ງທັງໝົດ 54 ໜ່ວຍ.