ໃນລະຫວ່າງວັນທີ 8-19 ກຸມພາ 2021, ທ່ານ ຄຳໃບ ດຳລັດ ຮອງ​ປະທານ ສູນກາງ ແນວລາວສ້າງຊາດ, ພ້ອມ​ດ້ວຍ​ຄະນະຜູ້ສະໝັກຮັບເລືອກຕັ້ງ ສະມາຊິກສະພາແຫ່ງຊາດ (ສສຊ) ປະຈໍາເຂດເລືອກຕັ້ງທີ 12 ແຂວງຄໍາມ່ວນ ລົງເຄື່ອນໄຫວພົບປະຜູ້ມີສິດເລືອກຕັ້ງ ຢູ່ 10 ເມືອງທົ່ວແຂວງ ຄື: ທ່າແຂກ, ຫີນບູນ, ຄູນຄຳ, ນາກາຍ, ຍົມມະລາດ, ບົວລະພາ, ໄຊບົວທອງ, ມະຫາໄຊ, ເມືອງເຊບັ້ງໄຟ ແລະ ໜອງບົກ ລວມທັງໝົດມີ 32 ຈຸດ.

ເຂົ້າຮ່ວມໃນການລົງເຄື່ອນໄຫວພົບປະຜູ້ມີສິດເລືອກຕັ້ງຄັ້ງນີ້, ປະກອບມີບັນດາການນໍາຂັ້ນແຂວງ ແລະ ຂັ້ນເມືອງ, ພະນັກງານຫລັກແຫລ່ງ, ທະຫານ-ຕໍາຫລວດ ຕະຫລອດຮອດພໍ່ແມ່ປະຊາຊົນພາຍໃນບ້ານ ແລະ ເມືອງຢ່າງພ້ອມພຽງ. ການເຄື່ອນໄຫວພົບປະແຕ່ລະເມືອງດັ່ງນີ້: ເມືອງທ່າແຂກມີ 5 ຈຸດ, ເມືອງຫີນບູນ 3 ຈຸດ, ເມືອງຄູນຄໍາ 3 ຈຸດ, ເມືອງນາກາຍ 3 ຈຸດ, ເມືອງຍົມມະລາດ 3 ຈຸດ, ເມືອງບົວລະພາ 3 ຈຸດ, ເມືອງໄຊບົວທອງ 3 ຈຸດ, ເມືອງມະຫາໄຊ 3 ຈຸດ, ເມືອງເຊບັ້ງໄຟ 3 ຈຸດ ແລະ ເມືອງໜອງບົກ 3 ຈຸດ.

ໂອກາດດັ່ງກ່າວ, ບັນດາພະນັກງານ, ທະຫານ-ຕໍາຫລວດ ແລະ ພໍ່ແມ່ປະຊາຊົນ ທີ່ເຂົ້າຮ່ວມ ໄດ້ຮັບຟັງການສະເໜີຊື່, ປະຫວັດການເຄື່ອນໄຫວຂອງຜູ້ສະໝັກຮັບເລືອກຕັ້ງໃນໄລຍະຜ່ານມາ, ພ້ອມທັງໄດ້ຮັບຟັງການປະກອບຄຳຄິດຄຳເຫັນ ຂອງບັນດາຜູ້ສະໝັກຮັບເລືອກຕັ້ງ ໂດຍໄດ້ຍົກໃຫ້ເຫັນເຖິງຄວາມ  ໝາຍ, ຄວາມສຳຄັນຂອງການເລືອກຕັ້ງ ສສຊ ແລະ ສະມາຊິກສະພາປະຊາຊົນແຂວງ (ສສຂ), ລັດຖະທຳມະນູນແຫ່ງ ສປປ ລາວ, ກົດໝາຍວ່າດ້ວຍການເລືອກຕັ້ງ, ກົດໝາຍວ່າດ້ວຍສະພາແຫ່ງຊາດ, ກົດ ໝາຍວ່າດ້ວຍສະພາປະຊາຊົນຂັ້ນແຂວງ, ພາລະບົດບາດ, ສິດ ແລະ ໜ້າທີ່ຂອງ ສສຊ ແລະ ສສຂ ເພື່ອເຮັດໃຫ້ປະຊາຊົນບັນດາເຜົ່າໄດ້ຮັບຮູ້ ແລະ ເຂົ້າໃຈ ພ້ອມກັນເລືອກເອົາຜູ້ແທນທີ່ມີມາດຖານຄົບຖ້ວນສົມບູນ ຮັບປະກັນຕາມເປົ້າໝາຍທີ່ໄດ້ກຳນົດໄວ້, ເຮັດໃຫ້ການດຳເນີນການປ່ອນບັດ ໃນວັນທີ 21 ກຸມພາ ທີ່ຈະມາເຖິງນີ້ ໄດ້ດຳເນີນໄປຢ່າງມີປະຊາທິປະໄຕ.

ພ້ອມກັນນີ້, ບັນດາທ່ານຜູ້ລົງສະໝັກຮັບເລືອກຕັ້ງ ຍັງໄດ້ຮຽກຮ້ອງໃຫ້ພໍ່ແມ່ປະຊາຊົນ ຜູ້ທີ່ມີສິດປ່ອນບັດໄປໃຊ້ສິດຂອງຕົນຢ່າງເຕັມສ່ວນ ເພື່ອເລືອກເອົາຕົວແທນທີ່ຈະເປັນຜູ້ຕາງໜ້າ ນຳເອົາບັນຫາຕ່າງໆທີ່ເຫັນວ່າຍັງມີຄວາມຫຍຸ້ງຍາກຕໍ່ການດຳລົງຊີວິດ, ການແກ້ໄຂຄວາມທຸກຍາກ ແລະ ການສ້າງສາພັດທະນາບ້ານເມືອງ ນຳໄປສະເໜີຕໍ່ສະພາແຫ່ງຊາດ ແລະ ນຳເອົາຜົນປະໂຫຍດມາໃຫ້ແກ່ປະຊາຊົນ, ທັງຮັບປະກັນເຮັດໃຫ້ບັ້ນດຳເນີນການປ່ອນບັດເລືອກຕັ້ງໃນຊຸດນີ້ ດຳເນີນໄປຢ່າງມີປະສິດທິພາບ, ມີຄວາມສະຫງົບ ແລະ ຄວາມເປັນລະບຽບຮຽບຮ້ອຍໃນສັງຄົມ.

ເຂດເລືອກຕັ້ງທີ 12 ແຂວງຄຳມ່ວນ ມີຜູ້ສະໝັກຮັບເລືອກຕັ້ງເປັນ ສສຊ 12 ທ່ານ, ຍິງ 2 ທ່ານ ເລືອກເອົາ 9 ທ່ານ, ເຊິ່ງໃນທົ່ວແຂວງຄໍາມ່ວນ ມີພົນລະເມືອງທັງໝົດ 449.863 ຄົນ, ຍິງ 138.518 ຄົນ, ໃນນັ້ນຜູ້ມີສິດປ່ອນບັດຕົວຈິງມີ 240.489 ຄົນ, ຍິງ 126.170 ຄົນ, ມີໜ່ວຍປ່ອນບັດ 369 ໜ່ວຍ.

Medialaos MMD (ແຫຼ່ງຂໍ້ມູນຈາກ: ສຳນັກຂ່າວສານປະເທດລາວ)