ເພື່ອເຮັດໃຫ້ພໍ່ແມ່ປະຊາຊົນຜູ້ມີສິດເລືອກຕັ້ງຢູ່ພາຍໃນເມືອງລະມາມ ໄດ້ມີຄວາມຮັບຮູ້ ແລະເຂົ້າໃຈຢ່າງລະອຽດຕື່ມ ກ່ຽວກັບການປ່ອນບັດເລືອກຕັ້ງເອົາສະມາຊິກສະພາແຫ່ງຊາດ ( ສສຊ )​ ຊຸດທີ IX ແລະສະມາຊິກສະພາປະຊາຊົນແຂວງ ( ສສຂ)​ ຊຸດທີ II ທີ່ຈະເຖິງໃນວັນອາທິດ,​ວັນທີ 21 ກຸມພາ ທີ່ຈະມາເຖິງນີ້,​ໃນຕອນເຊົ້າຂອງວັນທີ 18 ກຸມພາ ນີ້, ບັນດາຜູ້ສະໝັກຮັບເລືອກຕັ້ງເປັນສະມາຊິກສະພາແຫ່ງຊາດ ຊຸດທີ IX ປະຈໍາເຂດເລືອກຕັ້ງທີ16 ແຂວງເຊກອງ ລວມມີຈໍານວນທັງໝົດ 9 ທ່ານ,​ຍິງ 3 ທ່ານ, ໄດ້ສືບຕໍ່ລົງເຄື່ອນໄຫວພົບປະ ແລະສະເໜີໂຕຕໍ່ກັບຜູ້ມີສິດເລືອກຕັ້ງຢູ່ບ້ານດ່ານ ເມືອງລະມາມ, ປະກອບມີ 2 ໜ່ວຍເລືອກຕັ້ງ ຄືໜ່ວຍທີ18 ແລະ19, ໂດຍການນໍາພາທາງຂອງທ່ານນາງ ຈັນຫອມ ມະຫາໄຊ ຮອງເລຂາພັກແຂວງ,​ ມີຄະນະຮັບຜິດຊອບຂັ້ນແຂວງ, ຂັ້ນເມືອງ,​ ໂດຍໄດ້ຮັບການຕ້ອນຮັບຈາກອໍານາດການປົກຄອງບ້ານ ພ້ອມດ້ວຍພໍ່ແມ່ປະຊາຊົນ 5 ບ້ານ, ນ້ອງໆນັກຮຽນ ໄດ້ເຂົ້າຮ່ວມຮັບຟັງຢ່າງຫຼວງຫຼາຍ.

ນອກຈາກນີ້ ໃນຕອນບ່າຍ ຍັງໄດ້ສືບຕໍ່ເຄື່ອນໄຫວພົບປະຜູ້ມີສິດເລືອກຕັ້ງ ຢູ່ໂຮງຮຽນເຕັກນິກວິຊາຊີບແບບປະສົມແຂວງເຊກອງ,​ ໂດຍໄດ້ຮັບການຕ້ອນຮັບຈາກພະນັກງານຄູອາຈານ ແລະນ້ອງໆນັກສຶກສາ, ອໍານາດການປົກຄອງບ້ານ, ພ້ອມດ້ວຍພໍ່ແມ່ປະຊາຊົນຜູ້ມີສິດເລືອກຕັ້ງ 3 ໜ່ວຍເລືອກຕັ້ງ ມີ 4 ບ້ານເຂົ້າຮ່ວມຮັບຟັງເກືອບ 200 ຄົນ.​
ໃນໂອກາດທີ່ລົງພົບປະປະຊາຊົນນີ້, ບັນດາຜູ້ສະໝັກຮັບເລືອກຕັ້ງເປັນສະມາຊິກສະພາແຫ່ງຊາດທັງ 9 ທ່ານ ໄດ້ນໍາສະເໜີຊື່ ພ້ອມທັງປະຫວັດຫຍໍ້ຂອງຕົນເອງ ໃຫ້ຜູ້ມີສິດປ່ອນບັດເລືອກຕັ້ງໄດ້ຮັບຮູ້ ແລະເຂົ້າໃຈຢ່າງລະອຽດ, ພ້ອມນີ້ກໍ່ຍັງໄດ້ຮຽກຮ້ອງມາຍັງພໍ່ແມ່ປະຊາຊົນຜູ້ມີສິດປ່ອນບັດເລືອກຕັ້ງທີ່ມີອາຍຸແຕ່ 18 ຂື້ນໄປ ຈົ່ງໄດ້ພ້ອມກັນໄປໃຊ້ສິດປະຊາທິປະໄຕຂອງຕົນຢ່າງເຕັມສ່ວນ ໃນການເລືອກຕັ້ງທີ່ຈະເຖິງໃນວັນທີ 21 ກຸມພາ ຮັບປະກັນໃຫ້ໄດ້ 300%.

ໃນນີ້, ໜ່ວຍເລືອກຕັ້ງທີ 18 ປະກອບມີ 3 ບ້ານຄື: ບ້ານດອນຈັນ, ລະວີນ້ອຍ ແລະບ້ານກະໂດນ, ໜ່ວຍເລືອກຕັ້ງທີ19 ມີ 2 ບ້ານຄື: ບ້ານດ່ານ ແລະບ້ນເຊນ້ອຍ,​ ໜ່ວຍເລືອກຕັ້ງທີ15 ປະກອບມີ 2 ບ້ານຄື: ບ້ານໂມ ແລະບ້ານລະວີລໍາພັນ, ໜ່ວຍເລືອກຕັ້ງທີ16 ບ້ານປາກໂທນ ແລະໜ່ວຍເລືອກຕັ້ງທີ17 ບ້ານລະວີຝັ່ງແດງ, ຊຶ່ງທັງ 5 ໜ່ວຍເລືອກຕັ້ງນີ້ ມີຜູ້ມີສິດປ່ອນບັດທີ່ມີໜ້າຕົວຈິງທັງໝົດ 3.074 ຄົນ,​ຍິງ 1.535 ຄົນ.