ຜູ້ສະໝັກເລືອກຕັ້ງເປັນສະມະຊິກສະພາແຫ່ງຊາດ (ສສຊ) ເຂດເລືອກຕັ້ງທີ 15 ແຂວງຈໍາປາສັກ ຈຸທີ 1 ຈໍານວນ 10 ທ່ານ ຊຶ່ງນໍາໂດຍ ທ່ານ ສົມມາດ ພົນເສນາ ກຳມະການສູນກາງພັກ ລັດຖະມົນຕີ ກະຊວງຊັບພະຍາກອນທໍາມະຊາດ ແລະ ສິ່ງແວດລ້ອມ ຜູ້ສະໝັກ ສສຊ ເບີ 1, ທ່ານ ແກ້ວລັດຕະນະ ສີຫາວົງ ຄະນະປະຈໍາພັກແຂວງ ຫົວໜ້າອົງການໄອຍະການປະຊາຊົນແຂວງ ຜູ້ສະໝັກຮັບເລືອກຕັ້ງ ສສຊ ເບີ 7 ໄດ້ເຄື່ອນໄຫວສະເໜີໂຕ ພົບປະຜູ້ມີສິດປ່ອນບັດເລືອກຕັ້ງ ຢູ່ກຸ່ມນໍ້າອ້ອມ ເມືອງປະທຸມພອນ ໃນວັນທີ 18 ກຸມພາຜ່ານມາ ໂດຍມີ ທ່ານ ເມກສະຫວັນ ພົມພິທັກ ປະທານສະພາປະຊາຊົນແຂວງ ແລະ ໃຫ້ກຽດຕ້ອນຮັບ ພ້ອມເຂົ້າຮ່ວມເຄື່ອນໄຫວ ຂອງ ທ່ານ ສຽງສະໄໝ ສີລິພອນພັນ ກໍາມະການພັກ ແຂວງ ເລຂາພັກເມືອງ ເຈົ້າເມືອງໆປະທຸມພອນ ປະທານຄະນະກໍາມະການເລືອກຕັ້ງຂັ້ນເມືອງ ພ້ອມ ດ້ວຍການນໍາເມືອງ, ຄະນະກໍາມະການເລືອກຕັ້ງຂັ້ນເມືອງ, ຄະນະພັກ-ອົງການປົກຄອງບ້ານ ແລະ ພໍ່ແມ່ປະຊາຊົນໃນ 6 ບ້ານ ພາຍໃນກຸ່ມໃຫ້ການຕ້ອນຮັບ.

ຜູ້ສະໝັກຮັບເລືອກຕັ້ງເປັນສະມາຊິກສະພາປະຊາຊົນແຂວງ ປະຈໍາເມືອງປະທຸມພອນ ຈໍານວນ 5 ທ່ານ ນໍາໂດຍ ທ່ານ ວິໄລ ແກ້ວມະນີໄລ ກໍາມະການພັກແຂວງ ຫົວໜ້າພະແນກໄປສະນີ, ໂທລະຄົມ ມະນາຄົມ ແລະ ການສື່ສານ ຜູ້ສະໝັກນໍ້າເບີ 1 ແລະ ທ່ານ ສົມຈິດ ແພງສະຫວັດ ຮອງເລຂາພັກ ເມືອງ ປະທານອົງການກວດກາລັດເມືອງ ຜູ້ສະໝັກນໍ້າເບີ 2 ພ້ອມຄະນະສືບຕໍ່ເຄື່ອນໄຫວສະເໜີໂຕ ຕໍ່ຜູ້ມີສິດເລືອກຕັ້ງຢູ່ກຸ່ມບ້ານມ່ວງ ໂດຍມີເລຂາຄະນະພັກຮາກຖານກຸ່ມບ້ານ, ອໍານາດການປົກຄອງບ້ານ ແລະ ພໍ່ແມ່ປະຊາຊົນພາຍໃນກຸ່ມເຂົ້າຮ່ວມ.

Medialaos MMD (ແຫຼ່ງຂໍ້ມູນຈາກ: ໜັງສືພິມປະຊາຊົນ)