ເພື່ອເປັນການຕີລາຄາຄືນກ່ຽວກັບການຈັດຕັ້ງປະຕິບັດວຽກງານປະເມີນຜົນສ້າງແຂວງເປັນຫົວໜ່ວຍຍຸດທະສາດ , ສ້າງເມືອງເປັນຫົວໜ່ວຍເຂັ້ມແຂງຮອບດ້ານ ແລະ ສ້າງບ້ານເປັນຫົວໜ່ວຍພັດທະນາ ( 03 ສ້າງ ) ກໍ່ຄືຕາມມະຕິຄໍາສັ່ງເລກທີ 03 ຂອງກົມການເມືອງສູນກາງພັກໄດ້ວາງອອກ . ດັ່ງນັ້ນໃນຕອນເຊົ້າຂອງວັນທີ 18 ກຸມພາ 2021 ແຂວງຄໍາມ່ວນໄດ້ຈັດກອງປະຊຸມປະເມີນຜົນວຽກງານສາມສ້າງຂຶ້ນຢູ່ທີ່ຫ້ອງວ່າການແຂວງໂດຍການເປັນປະທານຂອງທ່ານ ວົງເພັດ ຈິດປັນຍາ ຮອງເລຂາພັກແຂວງ , ເຂົ້າຮ່ວມມີບັນດາທ່ານເຈົ້າເມືອງຈາກ 10 ຕົວເມືອງພາຍໃນແຂວງ , ຫົວໜ້າ , ຮອງຫົວໜ້າພະແນກການຕະຫຼອດເຖິງພະນັກງານວິຊາການເຂົ້າຮ່ວມ

ໃນພິທີທ່ານ ວົງເພັດ ຈິດປັນຍາ ຮອງເລຂາພັກແຂວງໄດ້ກ່າວໄຂກອງປະຊຸມຢ່າງເປັນທາງການພ້ອມທັງມີຄໍາຖາມເຈາະຈີ້ມເພື່ອເປັນທິດໃນການຄົ້ນຄວ້າປະກອບຄໍາຄິດເຫັນໃນກອງປະຊຸມ . ຈາກນັ້ນ ທ່ານ ແກ້ວວິໄລ ໄຊຍະບຸດຫົວໜ້າພະແນກພາຍໃນແຂວງຄໍາມ່ວນໄດ້ຜ່ານຮ່າງບົດລາຍງານໂດຍຫຍໍ້ກ່ຽວກັບການຈັດຕັ້ງປະຕິບັດວຽກງານປະເມີນຜົນສ້າງແຂວງເປັນຫົວໜ່ວຍຍຸດທະສາດ , ສ້າງເມືອງເປັນຫົວໜ່ວຍເຂັ້ມແຂງຮອບດ້ານ ແລະ ສ້າງບ້ານເປັນຫົວໜ່ວຍພັດທະນາເຊິ່ງທ່ານໄດ້ກ່າວວ່າ : ພາຍຫຼັງສໍາເລັດການເຮັດທົດລອງວຽກງານສາມສ້າງແຂວງຄໍາມ່ວນໄດ້ສືບຕໍ່ຜັນຂະຫຍາຍ-ຈັດຕັ້ງປະຕິບັດໃຫ້ເລິກເຊິ່ງກວມກວ້າງຂວາງ , ຫັນລົງສູ່ 10 ຕົວເມືອງ ແລະ ທຸກບ້ານໃນທົ່ວແຂວງເພື່ອສ້າງໃຫ້ເມືອງມີຄວາມເຂັ້ມແຂງຮອບດ້ານ ແລະ ສ້າງບ້ານເປັນຫົວໜ່ວຍພັດທະນາ , ແຂວງໄດ້ອອກຂໍ້ຕົກລົງເລກທີ 1776 /ຈຂ.ຄມ , ລົງວັນທີ 31 ສິງຫາ 2017 ວ່າດ້ວຍການສ້າງແຂວງເປັນຫົວໜ່ວຍຍຸດທະສາດ , ສ້າງເມືອງເປັນຫົວໜ່ວຍເຂັ້ມແຂງຮອບດ້ານ ແລະ ສ້າງບ້ານເປັນຫົວໜ່ວຍພັດທະນາ , ໂດຍທົ່ວໄປແລ້ວໄດ້ກໍານົດເອົາ 10 ຕົວເມືອງສ້າງເປັນເມືອງເຂັ້ມແຂງຮອບດ້ານ . ໃນນັ້ນໄດ້ສຸມໃສ່ສ້າງເມືອງໃຫ້ຄົບຕາມເນື້ອໃນ 05 ດ້ານເຊິ່ງມີ 03 ເມືອງຄື : ເມືອງທ່າແຂກ , ເມືອງໜອງບົກ ແລະ ເມືອງຄູນຄໍາ , ສ້າງບ້ານເປັນຫົວໜ່ວຍພັດທະນາໃຫ້ໄດ້ທັງໝົດ 569 ບ້ານ ແລະ ສ້າງໃຫ້ໄດ້ບ້ານແບບຢ່າງຕາມເນື້ອໃນ 04 ດ້ານມີ 57 ບ້ານເຊິ່ງຕິດພັນກັບຂະບວນການແຂ່ງຂັນ “ ຮັກຊາດ ແລະ ພັດທະນາ “ ໂດຍມີການຊີ້ນໍາບັນຊາຢ່າງເປັນລະບົບຕໍ່ເນື່ອງຈາກຂັ້ນແຂວງລົງຮອດຂັ້ນເມືອງ ແລະ ບ້ານ , ຖືເປັນວຽກປົກກະຕິຂອງພະແນກການ , ອົງການທຽບເທົ່າພະແນກ , ເມືອງ , ຮາກຖານບ້ານເຊິ່ງສາມາດຕີລາຄາຜົນໄດ້ຮັບໃນແຕ່ລະດ້ານເຊັ່ນ : ຜົນໄດ້ຮັບປະເມີນແຂວງເປັນຫົວໜ່ວຍຍຸດທະສາດນັບແຕ່ປີ 2016 -2020 ເຫັນວ່າພະແນກການ,ອົງການທຽບເທົ່າພະແນກໄດ້ປະເມີຜົນຕໍ່ການຈັດຕັ້ງຜັນຂະຫຍາຍວຽກງານສາມສ້າງຕາມມາດຖານເງື່ອນໄຂ , ສ້າງແຂວງເປັນຫົວໜ່ວຍຍຸດທະສາດໃນ 07 ດ້ານມີ 66 ຕົວຊີ້ບອກ , ການປະເມີນຕົວຈິງໃນມາດຖານທີ 1 – 6 ແມ່ນບໍ່ບັນລຸ . ສ່ວນມາດຖານເງື່ອນໄຂບັນລຸ 80 % ຂຶ້ນໄປມີ 01 ດ້ານຄື : ດ້ານທີ 07 ກວດເອົາ 85 % ຖືວ່າບັນລຸຕາມເງື່ອນໄຂໃນການສ້າງແຂວງເປັນຫົວໜ່ວຍຍຸດທະສາດ 07 ດ້ານ . ສໍາລັບດ້ານທີ່ບໍ່ບັນລຸມີ 06 ດ້ານຕ້ອງໄດ້ສືບຕໍ່ຈັດຕັ້ງປະຕິບັດໃນຂັ້ນຕໍ່ໄປ.

ຜົນໄດ້ຮັບປະເມີນຂັ້ນເມືອງທັງ 05 ດ້ານຈໍານວນ 47 ຕົວຊີ້ບອກ . ໃນນີ້ດ້ານທີ 01 ມີຈໍານວນ 08 ຕົວຊີ້ບອກສາມາດບັນລຸ 80 % ຂຶ້ນໄປມີ 03 ເມືອງ , ບໍ່ບັນລຸມີ 07 ເມືອງ ; ດ້ານທີ 02 ມີຈໍານວນ 04 ຕົວຊີ້ບອກສາມາດບັນລຸ 80 % ຂຶ້ນໄປມີ 01 ເມືອງ , ບໍ່ບັນລຸມີ 09 ເມືອງ ; ດ້ານທີ 03 ມີຈໍານວນ 18 ຕົວຊີ້ບອກສາມາດບັນລຸ 80% ຂຶ້ນໄປມີ 02 ເມືອງ ,ບໍ່ບັນລຸມີ 08 ເມືອງ; ດ້ານທີ 04 ມີຈໍານວນ 11 ຕົວຊີ້ບອກສາມາດບັນລຸ 80 % ຂຶ້ນໄປມີ 05 ເມືອງ , ບໍ່ບັນລຸມີ 05 ເມືອງ; ດ້ານທີ 05 ມີຈໍານວນ 06 ຕົວຊີ້ບອກສາມາດບັນລຸ 80 % ຂຶ້ນໄປມີ 02 ເມືອງ , ບໍ່ບັນລຸມີ 08 ເມືອງ . ສັງລວມຜົນການປະເມີນການສ້າງເມືອງເປັນຫົວໜ່ວຍເຂັ້ມແຂງຮອບດ້ານຕາມທິດນໍາສ້າງແມ່ນສາມາດສ້າງເປັນເມືອງເຂັ້ມແຂງຮອບດ້ານ 03 ເມືອງຄື : ທ່າແຂກ ,ໜອງບົກ ແລະ ຄູນຄໍາ ( ສໍາລັບລາຍຮັບແມ່ນບໍ່ສາມາດກຸ້ມລາຍຈ່າຍ ) ແຕ່ໃນມາດຖານອື່ນໆຖືວ່າບັນລຸ 80 % ຂຶ້ນໄປໃນ 05 ດ້ານ ແລະ 47 ຕົວຊີ້ບອກ . ສ່ວນວ່າ 07 ເມືອງຄື : ເຊບັ້ງໄຟ , ມະຫາໄຊ , ຍົມມະລາດ , ໄຊບົວທອງ , ນາກາຍ, ບົວລະພາ ແລະ ຫີນບູນແມ່ນບໍ່ສາມາດສາມາດສ້າງເປັນເມືອງເຂັ້ມແຂງຮອບດ້ານໄດ້ຍ້ອນວ່າບໍາບັນລຸຕາມເງື່ອນໄຂໃນ 05 ດ້ານ ແລະ 47 ຕົວຊີ້ບອກ ( ສາຍເຫດຍ້ອນມີບາງດ້ານຕົສຊີ້ບອກມາດຕະຖານສູງ ). ສໍາລັບຂັ້ນບ້ານການປະເມີນບ້ານໃນ 569 ບ້ານສາມາດສ້າງເປັນບ້ານຫົວໜ່ວຍພັດທະນາໄດ້ມີຈໍານວນ 261 ບ້ານເທົ່າກັບ 45,8 % ຍັງບໍ່ບັນລຸ 308 ບ້ານເທົ່າກັບ 54,3% ( ຈໍານວນ 10 ເມືອງຄື : ທ່າແຂກ 51 ບ້ານ , ໜອງບົກ 53 ບ້ານ , ເຊັ້ງໄຟ 24 ບ້ານ,ຫີນບູນ 78 ບ້ານ,ມະຫາໄຊ 06 ບ້ານ , ໄຊບົວທອງ 21 ບ້ານ,ນາກາຍ 09 ບ້ານ,ບົວລະພາ 07 ບ້ານ ແລະ ຄຸນຄໍາ 22 ບ້ານ ) , ສໍາລັບເມືອງຍົມມະລາດ ( ບໍ່ໄດ້ປະເມີນ ) .

ທ່ານ ແກ້ວວິໄລໄຊຍະບຸດຫົວໜ້າພະແນກພາຍໃນແຂວງຍັງໄດ້ຍົກໃຫ້ເຫັນເຖິງສາຍເຫດທີ່ພາໃຫ້ບໍ່ບັນລຸຕະຫຼອດເຖິງຂໍ້ຄົງຄ້າງ , ບົດຮຽນທີ່ຖອດຖອນໄດ້ , ວິທີແກ້ໄຂ ແລະ ມາດຕະການຈັດຕັ້ງປະຕິບັດໃນຕໍ່ໜ້າ. ນອກຈາກນັ້ນບັນດາທ່ານເຈົ້າເມືອງ ແລະ ບັນດາຫົວໜ້າພະແນກການອ້ອມຂ້າງແຂວງກໍ່ໄດ້ຜັດປ່ຽນກັນປະກອບຄໍາຄິດເຫັນເພື່ອເປັນການປັບປຸງຮ່າງບົດປະເມີນຜົນໃຫ້ມີຄວາມຖືກຕ້ອງ,ສອດຄ່ອງກັບສະພາບຄວາມເປັນຈິງ.