ສະຫາຍ ຈັນທະວອນ ສີຫາຈັກ ກຳມະການສູນກາງຊາວໜຸ່ມ ຮັກສາການເລຂາຄະນະບໍລິຫານງານຊາວໜຸ່ມແຂວງສາລະວັນໄດ້ເຜີຍແຜ່ມະຕິກອງປະຊຸມໃຫຍ່ ຜູ້ແທນຊາວໜຸ່ມທົ່ວປະເທດ ຄັ້ງທີ VIIIທີ່ໄດ້ຈັດຂຶ້ນໃນຄັ້ງວັນທີ 23-24 ທັນວາ 2020 ຜ່ານມາ ທີ່ຫໍປະຊຸມແຫ່ງຊາດ, ພາຍໃຕ້ການເປັນປະທານຂອງສະຫາຍ ອາລຸນໄຊ ສູນນະລາດ ກຳມະການສຳຮອງສູນກາງພັກ, ເລຂາຄະນະບໍລິຫານງານຊາວໜຸ່ມປະຊາຊົນປະຕິວັດລາວ ກອງປະຊຸມດັ່ງກ່າວມີຜູ້ແທນສົມບູນເຂົ້າຮ່ວມທັງໝົດ 441 ສະຫາຍ, ຍິງ 75 ສະຫາຍ, ເຊິ່ງເປັນຕົວແທນໃຫ້ແກ່ສະມາຊິກຊາວໜຸ່ມລາວບັນດາເຜົ່າທົ່ວປະເທດທັງໝົດ 702.693 ສະຫາຍ. ກອງປະຊຸມໄດ້ພ້ອມກັນຄົ້ນຄວ້າ, ປະກອບຄຳຄິດຄຳເຫັນ ແລະຮັບຮອງເອົາລົດລາຍງານການເມືອງ, ໄດ້ຕີລາຄາສູງເຖິງຜົນງານໄຊຊະນະຂອງການຈັດຕັ້ງປະຕິບັດມະຕິກອງປະຊຸມໃຫຍ່ຜູ້ແທນຊາວໜຸ່ມທົ່ວປະເທດ ຄັ້ງທີ VII, ໄດ້ຕີລາຄາດ້ານດີ, ດ້ານອ່ອນ, ສາເຫດ ແລະບົດຮຽນຖອດຖອນໄດ້ຕະຫຼອດການເຄື່ອນໄຫວຜ່ານມາ, ພ້ອມນັ້ນກອງປະຊຸມໄດ້ເປັນເອກະພາບສູງຮັບຮອງເອົາຄາດໝາຍສູ້ຊົນ, ທິດທາງແຜນການພັດທະນາຊາວໜຸ່ມ-ເຍົາວະຊົນລາວບັນດາເຜົ່າ ແຕ່ປີ 2021-2025, ຮັບຮອງເອົາວິໃສທັດຊາວໜຸ່ມ 2040, ຍຸດທະສາດພັຫດທະນາຊາວໜຸ່ມ-ເຍົາວະຊົນ ແຕ່ປີ 2021-2030 ແລະວຽກງານຈຸດສຸມແຕ່ນີ້ຮອດປີ 2025 ແລະອື່ນໆ.

ພ້ອມນັ້ນຜູ້ເຂົ້າຮ່ວມກອງປະຊຸມໄດ້ໃຊ້ສິດຂອງຕົນປ່ອນບັດເລືອກຕັ້ງເອົາຄະນະບໍລິຫານງານສູນກາງ ຊປປລ ສະໄໝທີ VIII ບົນຫຼັກການລວມສູນປະຊາທິປະໄຕ ຖືກຕ້ອງສອດຄ່ອງກັບມາດຖານເງືອນໄຂທີ່ກຳນົດໄວ້ ເຊິ່ງມີຜູ້ສະໝັກເລືອກຕັ້ງ 68 ສະຫາຍ, ຍິງ 8 ສະຫາຍ ແລະ ເລືອກໄດ້ຄະນະບໍລິຫານງານ ສຊປລ ຊຸດທີ VIII ປະກອບມີ 63 ສະຫາຍ, ຍິງ 7 ສະຫາຍ; ກອງປະຊຸມຄັ້ງປະຖົມມະລຶກ ເປັນເອກະສັນເລືອກເອົາຄະນະເລຂາທິການ ສຊປລ ຈຳນວນ 13 ສະຫາຍ, ຍິງ 2 ສະຫາຍ, ເລືອກຕັ້ງເອົາສະຫາຍ ອາລຸນໄຊ ສູນນະລາດ ເປັນເລຂາ, ສະຫາຍ ບຸນຕາ ເທບພະວົງ ເປັນຮອງເລຂາ, ສະຫາຍ ທອງຈັນ ພູມີພັກ ເປັນຮອງເລຂາ, ສະຫາຍ ນວນທອງ ສຸວັນວິໄຊ ເປັນຮອງເລຂາ ທັງເປັນປະທານກວດກາ, ບັ້ນເຜີຍແຜ່ໃດ້ຈັດຂື້ນ ວັນ 18 ກຸມພາ 2021ທີ່ສະໂມສອນຂອງແຂວງສາລະວັນ ໂດຍມີຄະນະບໍລິຫານງານຊາວໜຸ່ມແຂວງ, ສະມະຊິກຊາວໜຸ່ມ, ພະແນກການອອ້ມຂ້າງແຂວງເຂົ້າຮ່ວມ.