ງານຕັ້ງກອງບຸນ ແລະ ວາງສະແດງສິນຄ້າທີ່ຫໍຈາລຶກປະຫວັດສາດ 21 ມີນາ 1946 ຢູ່ເມືອງທ່າແຂກ ແມ່ນໄດ້ເລີ່ມແຕ່ວັນທີ 15 ກຸມພາ 2021 ເປັນຕົ້ນມາ ເຊິ່ງພາຍໃນງານແມ່ນມີການຕັ້ງກອງບຸນຂຶ້ນ ຈຳນວນ 02 ກອງ ພ້ອມເຄື່ອງປັດໃຈໄຊຍະທານຕ່າງໆ ເພື່ອອຸທິດເຖິງດວງວິຍານຂອງນັກຮົບປະຕິວັດ ທີ່ເສຍສະຫຼະເລືອດເນື້ອ ໃນບັ້ນ ຮົບປ້ອງກັນຕົວເມືອງທ່າແຂກ. ນອກນັ້ນກໍ່ຍັງມີການວາງສະແດງສິນຄ້າ, ຜະລິດຕະພັນສິນຄ້າໂອດ໋ອບ ທັງພາຍໃນ ແລະ ຕ່າງແຂວງ, ງານສະແດງສີລະປະ ແລະ ອື່ນໆ ເຮັດໃຫ້ບັນຍາກາດຕະຫຼອດການຈັດງານມີຄວາມຄຶກຄື້ນ ເບີກບານ ມ່ວນຊື່ນ.

ໃນວັນທີ 19 ກຸມພາ 2021 ເຊິ່ງເປັນມື້ສຸດທ້າຍຂອງການຈັດງານດັ່ງກ່າວ ໃນຕອນເຊົ້າແມ່ນມີການໃສ່ບາດ ຖວາຍສັງຄະທານ ແດ່ພຣະສົງຈຳນວນ 09 ອົງ ເຂົ້າຮ່ວມໃນພິທີໃສ່ບາດ ມີການນຳຂອງແຂວງ ນໍາໂດຍທ່ານ ວັນໄຊ ພອງສະຫວັນ ເຈົ້າແຂວງຄຳມ່ວນ, ມີບັນດາຫົວໜ້າພະແນກການ, ການນຳຂອງເມືອງທ່າແຂກ, ອົງການຈັດຕັ້ງຕ່າງໆ ພ້ອມດ້ວຍພໍ່ແມ່ປະຊາຊົນຊາວເມືອງທ່າແຂກ ແຂວງຄຳມ່ວນ ໄດ້ເຂົ້າຮ່ວມໃສ່ບາດ ເພື່ອອຸທິດສ່ວນບຸນກຸສົນຫາດວງ ວິນຍານ ນັກຮົບປະຕິວັດ ແລະ ປະຊາຊົນບັນດາເຜົ່າ ທີ່ເສຍສະຫຼະເລືອດເນື້ອ ອັນສູງສົ່ງ ປ້ອງກັນຕົວເມືອງທ່າແຂກ ໃນບັ້ນຮົບ 21 ມີນາ 1946 ທັງເປັນການສືບທອດມູນເຊື້ອ ປະເພນີອັນດີງາມຂອງຊາດ ໂດຍສະເພາະແມ່ນເຮັດໃຫ້ ປະຊາຊົນລາວບັນດາເຜົ່າຊາວແຂວງຄຳມ່ວນ ກໍ່ຄືຊາວເມືອງທ່າແຂກ ໄດ້ຈາລຶກເຖິງເຫດການສຳຄັນດັ່ງກ່າວໄວ້ ຕະຫຼອດໄປ.