ກອງປະຊຸມສ່ອງແສງຂ່າວປະຈຳອາທິດ ຂອງກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ໄດ້ຈັດຂຶ້ນໃນຕອນບ່າຍມື້ນີ້ ວັນທີ 19 ກຸມພາ 2021 ທີ່ພະແນກຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ນະຄອນຫລວງວຽງຈັນ ເຊິ່ງເປັນກອງປະຊຸມເຄື່ອນທີ່ທຳອິດທີ່ມາຈັດຢູ່ນະຄອນຫລວງວຽງຈັນ.

ໂດຍການເປັນປະທານຮ່ວມ ຂອງທ່ານ ສະຫວັນຄອນ ລາຊະມຸນຕີ ຮອງລັດຖະມົົນຕີ ກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ປະທານສະມາຄົມນັກຂ່າວແຫ່ງປະເທດລາວ ແລະ ທ່ານ ນາງ ມະໄລວອນ ຈັນທະລາຕີ ຫົວໜ້າພະແນກຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ນະຄອນຫຼວງວຽງຈັນ ແລະ ບັນດາທ່ານຫົວໜ້າກົມ, ຮອງກົມ ແລະ ຫົວໜ້າອົງການສືີ່ ແລະ ບັນນາທິການຕ່າງໆ ເຂົ້າຮ່ວມຢ່າງພ້ອມພຽງ.

ພາຍຫລັງປະທານກ່າວໄຂພິທີແລ້ວ ທ່ານສົມສະຫວາດ ພົງສາ ຫົວໜ້າກົມສື່ມວນຊົນ ກໍ່ໄດ້ລາຍງານກ່ຽວກັບການຈັດຕັ້ງເຄືີ່ອນໄຫວຂອງສື່ໂດຍຫຍໍ້ໃນຮອບອາທິດທີ່ຜ່ານມາ ແລະ ສະເໜີແຜນການໃນອາທິດຕໍ່ໄປ ເຊິ່ງໃນນັ້ນໄດ້ເນັ້ນເຖິງການຮັບໃຊ້ບັ້ນເລືອກຕັ້ງສະພາແຫ່ງຊາດຊຸດທີ IX ແລະ ສະພາຂັ້ນແຂວງຊຸດທີ II ໃນວັນອາທິດທີ 21 ກຸມພານີ້.

ໂດຍລວມແລ້ວທຸກສື່ແມ່ນໄດ້ມີແຜນການກຽມພ້ອມໃນການອອກຂ່າວ ແລະ ຖ່າຍທອດສົດເພືີ່ອໃຫ້ປະຊາຊົນໃນທົ່ວປະເທດໄດ້ໄປຮ່ວມປ່ອນບັດ ແລະ ບັນຍາກາດຂອງການປ່ອນບັດເລືອກຕັ້ງໃນຄັ້ງນີ້ໃຫ້ດີທີ່ສຸດ ໃນຂະນະດຽວກັນກໍ່ແມ່ນຈະສຸມໃສ່ໂຄສະນາບັນຫາເດັ່ນຂອງທີ່ເປັນບຸລິມະສິດຂອງລັດ ເພືີ່ອໃຫ້ດຸ່ນດ່ຽງທາງດ້ານຂໍ້ມູນຂ່າວສານໃຫ້ກຸ່ມເປົ້າໝາຍຢ່າງສະໝໍ່າສະເໝີ ນອກນັ້ນແມ່ນບັນຫາຫຍໍ້ທໍ້ທີ່ມັກເກີດຂຶ້ນໃນສັງຄົມຫລາຍເປັນຕົ້ນແມ່ນບັນຫາການລະບາດຂອງຢາເສບຕິດ, ອຸບັດຕິເຫດທີ່ເກີດຂຶ້ນທົ່ວປະເທດໃນນັ້ນນັບທັງໃນທາງດ່ວນທີ່ເຫັນວ່າເກີດຂຶ້ນ ສ່ວນບັນຫາອື່ນໆ ນັ້ນຈະໄດ້ປຶກສາຫາລືກັນໃນຂັ້ນຕໍ່ໄປຫລັງຈາກສຳເລັດບັ້ນເລືອກຕັ້ງໃນຄັ້ງນີ້ຜ່ານພົ້ນໄປ.

ພາບ-ຂ່າວ: ສີພາ ນົງລາດ