ພິທີເປີດການປ່ອນບັດເລືອກຕັ້ງສະມາຊິກສະພາແຫ່ງຊາດ ( ສສຊ ) ຊຸດທີ IX ແລະສະມາຊິກສະພາປະຊາຊົນແຂວງ ( ສສຂ ) ຊຸດທີ II ໄດ້ເປີດຂື້ນ ພ້ອມກັນຢູ່ທົ່ວປະເທດໃນວັນທີ 21 ກຸມພາ 2021 ນີ້ ເພື່ອເລືອກເອົາຜູ້ແທນປະຊາຊົນໃນການໃຊ້ສິດປະກອບຄວາມຄິດເຫັນບັນຫາຕ່າງໆ ຂອງແຕ່ລະທ້ອງຖິ່ນໃຫ້ໄດ້ຮັບການພັດທະນາເສດຖະກິດ-ສັງຄົມ ເປັນກ້າວ.


ສ່ວນແຂວງຫຼວງພະບາງ ແມ່ນໄດ້ເປີດພິທີຢ່າງເປັນທາງການ ເວລາ 7:30 ນາທີ ຢູ່ສະໂມສອນໃຫຍ່ຂອງມະຫາວິທະຍາໄລ ສຸພານຸວົງ ໂດຍມີ ທ່ານ ຄໍາຂັນ ຈັນທະວີສຸກ ກໍາມະການສູນກາງພັກ ເລຂາພັກແຂວງ ເຈົ້າແຂວງຫຼວງພະບາງ ພ້ອມດ້ວຍຄະນະ, ມີອະດິດພະນັກງານການນໍາ, ສສຊ 11 ທ່ານ, ສສຂ ປະຈໍານະຄອນຫຼວງພະບາງ 5 ທ່ານ, ຄະນະຮັບຜິດຊອບໜ່ວຍປ່ອນບັດ, ຄູ-ອາຈານ ແລະ ນັກສຶກສາຕະຫຼວດຮອດປະຊາຊົນພາກັນມາໃຊ້ສິດຂອງຕົ້ນຢ່າງເຕັມສ່ວນ.


ທ່ານ ວຽງທອງ ຫັດສະຈັນ ເຈົ້ານະຄອນ ຫຼວງພະບາງ ປະທານຈັດພິທີເປີດຄັ້ງນີ້ກ່າວວ່າ: ທົ່ວແຂວງຫຼວງພະບາງປະກອບມີ 756 ບ້ານ,ມີໜ່ວຍເລືອກຕັ້ງທັງໝົດ 677 ໜ່ວຍ, ໜ່ວຍເຄື່ອນທີ່ 106 ໜ່ວຍ, ມີຜູ້ມີສິດປ່ອນບັດເລືອກຕັ້ງທັງໝົດ 256.460 ຄົນ, ຍິງ 127.104 ຄົນ, ເຊິ່ງຈະໄດ້ເລືອກເອົາສະມາຊິກສະພາແຫ່ງຊາດ ແລະ ສະມາຊິກສະພາປະຊາ ຊົນແຂວງທັງໝົດ 57 ທ່ານ, ເລືອກເອົາ 36 ທ່ານ, ໃນນີ້ມີຜູ້ລົງສະໝັກເປັນສະມາຊິກສະພາແຫ່ງຊາດ 13 ທ່ານ, ຈະໄດ້ເລືອກເອົາ 10 ທ່ານ, ສະເພາະໜ່ວຍເລືອກຕັ້ງທີ 43 ທີ່ໄດ້ຈັດຂື້ນຢູ່ມະຫາວິທະຍາໄລສຸພານຸວົງ ມີຜູ້ມາສິດປ່ອນບັດເລືອກຕັ້ງເກືອບ 600 ຄົນ ເພື່ອເລືອກເອົາສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 6 ແຂວງຫຼວງພະບາງ ແລະ ຍັງມີຜູ້ລົງສະໝັກເປັນ ສສຊ ມາໃຊ້ສິດປ່ອນບັດ 11 ທ່ານ

ໃນນີ້ຈາກສູນກາງ 3 ທ່ານ ແລະ ສະມາຊິກສະພາປະຊາຊົນແຂວງປະຈໍານະຄອນຫຼວງພະບາງ 5 ທ່ານ ສະເພາະຜູ້ລົງສະມາຊິກສະພາປະຊາຊົນແຂວງປະຈໍານະຄອນຫຼວງພະບາງ 5 ທ່ານ ແມ່ນເລືອກເອົາ 3 ທ່ານ ບັນຍາກາດຢູ່ໃນພິທີ ເຕັມຄວາມຟົດຟື້ນ ແລະ ເປັນລະບຽບຮຽບຮ້ອຍ.
ຂ່າວ: ເພັດສາຄອນ ສິມມະວົງ