ປະຊາຊົນບ້ານໂນນເດື່ອ ເມືອງເລົ່າງາມ ແຂວງສາລະວັນ ໄດ້ຮ່ວມໃຈກັນມາໃຊ້ສິດປະຊາຊາທິປະໄຕເລືອກຕັ້ງເອົາຜູ້ແທນ ເພື່ອເປັນຕົວແທນໃຫ້ປະຊາຊົນແຂວງສາລະວັນ, ເຊິ່ງບັນຍາກາດໃນການປ່ອນບັດເລືອກຕັ້ງ ສສຊ ຊຸດທີ IX ແລະ ສສຂ ຊຸດທີ II, ເວົ້າສະເພາະແມ່ນຢູ່ໜ່ວຍປ່ອນບັດ ບ້ານໂນນເດື່ອ ເມືອງເລົ່າງາມ, ໂດຍໄດ້ເລີ່ມພິທີປ່ອນບັດນັບແຕ່ເວລາ 7 ໂມງເຊົ້າ ເປັນຕົ້ນໄປ ໄດ້ມີບັນຍາກາດຄຶກຄື້ນ, ພໍ່ແມ່ປະຊາຊົນບັນດາເຜົ່າ ພາຍໃນບ້ານຜູ້ທີ່ມີອາຍຸ 18 ປີ ຂຶ້ນໄປ ແມ່ນໄດ້ພ້ອມຈິດພ້ອມໃຈກັນມາໃຊ້ສິດ.

ທ່ານ ສຸລິຈັນ ໄຊຍະຜົນ ຄະນະຮັບຜິດຊອບການປ່ອນບັດເລືອກຕັ້ງ ໃຫ້ຮູ້ວ່າ: ການປ່ອນບັດແມ່ນໄດ້ປະຕິບັດຕາມຂັ້ນຕອນ ແລະ ລະບຽບການທີ່ວາງໄວ້, ແຕ່ງຕັ້ງຄະນະຮັບຜິດຊອບຫີບບັດ, ໄດ້ມີການປ້ອງກັນເວນຍາມຢ່າງເຄັ່ງຄັດ, ຜ່ານລະບຽບການປ່ອນບັດ, ແນະນໍາວິທີຂີດບັດໃຫ້ປະຊາຊົນ, ກວດຫີບບັດຊ້ອງໜ້າຄະນະປະທານ ແລະ ປະຊາຊົນ ເພື່ອຮັບປະກັນຄວາມຖືກຕ້ອງ, ພ້ອມນັ້ນຍັງໄດ້ມີຫີບບັດເຄື່ອນທີ່ ເພື່ອເຂົ້າເຖິງຜູ້ທີ່ບໍ່ສາມາດມາປ່ອນບັດຕື່ມອີກ.

ຜູ້ທີ່ມາໃຊ້ສິດປ່ອນບັດເລືອກຕັ້ງໃນຄັ້ງນີ້ ຫລາຍທ່ານກໍ່ໄດ້ສະແດງຄວາມຮູ້ສຶກຂອງຕົນເອງວ່າ: ການປ່ອນບັດໃນຄັ້ງນີ້ ຄືປຽບເໝືອນປາງບຸນໃຫຍ່ຂອງພີ່ນ້ອງຊາວບ້ານໂນນເດື່ອ ກໍຄືຊາວແຂວງສາລະວັນ ແລະ ມີຄວາມພາກພູມໃຈທີ່ໄດ້ມາໃຊ້ສິດເລືອກຕັ້ງເອົາຜູ້ແທນ ເພື່ອມາເປັນຕົວແທນໃຫ້ປະຊາຊົນແຂວງສາລະວັນ, ນໍາພາ ແລະສ້າງສາພັດທະນາປະເທດຊາດໃຫ້ຈະເລີນຮຸ່ງເຮືອງຕະຫຼອດໄປ. ສໍາລັບຈຸດໜ່ວຍປ່ອນບັດ ບ້ານໂນນເດື່ອ ເມືອງເລົ່າງາມ ໄດ້ມີຜູ້ມີສິດປ່ອນບັດເລືອກຕັ້ງທັງໝົດ 600 ກວ່າຄົນ, ຍິງ 300 ກວ່າຄົນ, ການປ່ອນບັດຢູ່ຈຸດດັ່ງກ່າວນີ້ ກໍໄດ້ມີມາດຕະການປ້ອງກັນ ແລະ ຄວບຄຸມການແຜ່ລະບາດຂອງພະຍາດໂຄວິດ-19 ມີການກວດ ແລະ ວັດແທກອຸດຫະພູມ, ໃສ່ຜ້າອັດປາກອັດດັງ ແລະ ເຈວລ້າງມື ຕື່ມອີກ.