ເລີ່ມແຕ່ເວລາ 7:00 ໂມງເຊົ້າ ຂອງວັນທີ 21 ກຸມພາ 2021 ໃນຂອບເຂດທົ່ວປະເທດ ໂດຍສະເພາະແຂວງສາລະວັນ ກໍ່ໄດ້ດຳເນີນການປ່ອນບັດເລືອກຕັ້ງຢ່າງເປັນທາງການ ເພື່ອເລືອກຕັ້ງເອົາສະມາຊິກສະພາແຫ່ງຊາດ ຊຸດທີ IX ປະຈຳເຂດເລືອກຕັ້ງທີ 14 ແຂວງສາລະວັນ ແລະ ສະມາຊິກສະພາປະຊາຊົນແຂວງ ຊຸດທີ II.

ທ່ານ ສົມໃຈ ອຸ່ນຈິດ ຄະນະປະຈຳພັກແຂວງ ຮອງເຈົ້າແຂວງສາລະວັນ ຜູ້ຊີ້ນຳວຽກງານວັດທະນະທຳ-ສັງຄົມ ໄດ້ເຂົ້າຮ່ວມຕິດຕາມການປ່ອນບັດຢູ່ເມືອງວາປີ, ໂດຍມີການນຳຂອງເມືອງ ແລະ ຜູ້ມີສິດປ່ອນບັດເຂົ້າຮ່ວມ.ໂອກາດດຽວກັນນັ້ນທ່ານໄດ້ເຂົ້າຮ່ວມ ແລະຕິດຕາມບັນຍາກາດການປ່ອນບັດຕ່າງໆ ແລະຢູ່ໜ່ວຍປ່ອນບັດບ້ານວາປີ ລວມມີ 4 ຄຸ້ມ ຄື: ຄຸ້ມວາປີເໜືອ, ວາປີໃຕ້, ຄຸ້ມໂຊກມີໄຊ ແລະຄຸ້ມສີນວນໄຊ ຈຸດດັ່ງກ່າວມີພົນລະເມືອງທັງໝົດ 2.309 ຄົນ, ໃນນັ້ນຜູ້ມີສິດປ່ອນບັດຕົວຈິງ 1.035 ຄົນ. ສຳລັບທົ່ວເມືອງວາປີ ມີພົນລະເມືອງທັງໝົດ 43 ພັນກວ່າຄົນ, ຜູ້ມີສິດປ່ອນບັດເລືອກຕັ້ງຕົວຈິງ 21 ພັນກວ່າຄົນ, ຍິງ 11 ພັນກວ່າຄົນ.

ໃນໂອກາດດຽວກັນນີ້ ທ່ານ ແຫວນເພັດ ລັດດາວົງ ຄະນະປະຈຳພັກແຂວງ ຫົວໜ້າຄະນະຈັດຕັ້ງແຂວງ ກໍ່ໄດ້ລົງປ່ອນບັດ ແລະຕິດຕາມການປ່ອນບັດຢູ່ເມືອງຄົງເຊໂດນ ເຊິ່ງໃນທົ່ວເມືອງຄົງເຊໂດນ ປະກອບມີ 59 ໜ່ວຍປ່ອນບັດ, ພົນລະເມືອງທັງໝົດ 69.530 ຄົນ, ຍິງ 35.590 ຄົນ, ຜູ້ມີສິດປ່ອນບັດຕົວຈິງ 31.491 ຄົນ.
ບັນຍາກາດ ແລະສະພາບລວມຂອງການໄປໃຊ້ສິດຂອງປະຊາຊົນເມືອງວາປີ ແລະເມືອງຄົງເຊໂດນ ໄດ້ມີບັນຍາກາດຄຶກຄື້ນດີ, ປະຊາຊົນມີສະຕິຕື່ນຕົວສູງ.