ບັນຍາກາດບັ້ນເລືອກຕັ້ງສະມາຊິກສະພາແຫ່ງຊາດ ຊຸດທີ IX ແລະ ສະມາຊິກສະພາປະຊາຊົນແຂວງ ຊຸດທີ II ຄັ້ງນີ້ ເປັນຂະບວນການຄືກຄື້ນ ຢ່າງກວ້າງຂວາງ ສະແດງອອກເຖີງຄວາມເປັນເຈົ້າການ, ຄວາມຮັບຮູ້ເຂົ້າໃຈຂອງພໍ່ແມ່ປະຊາຊົນຊາວແຂວງສາລະວັນ ກໍ່ຄືຜູ້ມີສິດປ່ອນບັດເລືອກຕັ້ງນັບແຕ່ອາຍຸ 18 ປີຂຶ້ນໄປ, ມີສະຕິເປັນເຈົ້າ, ຕື່ນຕົວໄປໃຊ້ສິດໃນຄັ້ງນີ້ ຢ່າງເປັນຂະບວນຟົດຟື້ນ.

ທ່ານ ອິນປອນ ເພັງສະຫວັນ ຄະນະໜ່ວຍປ່ອນບັດເລືອກຕັ້ງບ້ານວາປີ ເມືອງວາປີ ໃຫ້ສຳພາດວ່າ: ບັ້ນເລືອກໃນຊຸດນີ້ ແມ່ນມີຄວາມຄ່ອງແຄ້ວຫຼາຍສົມຄວນ, ມີລະບົບລະບຽບ ແລະ ມີການນຳນົດແບບການປ່ອນບັດ ສສຊ ແລະ ສສຂ ອັນສ້າງຄວາມສະດວກສະບາຍໃຫ້ແກ່ຜູ້ມາໃຊ້ສິດ, ສິ່ງທີ່ໜ້າປະທັບໃຈ ເຫັນໄດ້ພໍ່ແມ່ພີ່ນ້ອງປະຊາຊົນບັນດາເຜົ່າ ກໍ່ຄືຜູ້ສິດປ່ອນບັດ ນັບແຕ່ອາຍຸ 18 ປີຂຶ້ນໄປ ມີຄວາມຕື່ນຕົວສູງ, ຍົກສູງສະຕິເປັນເຈົ້າໃນການເລືອກເອົາຜູ້ແທນຂອງຕົນ ສະແດງໃຫ້ເຫັນເຖີງການເຕົ້າໂຮມຢ່າງແໜ້ນໜາ, ການປ່ອນບັດ, ຄວາມສະຫງົບຄວາມເປັນລະບຽບ ແລະ ຄວາມຮັບຮູ້ເຂົ້າໃຈ ຕໍ່ກັບຂັ້ນຕອນ, ວິທີການຕ່າງໆຢ່າງເລີກເຊິ່ງ, ຄາດຄະເນການນັບຄະແນນ ເພື່ອລາຍງານຂັ້ນເທີງ ອາດສຳເລັດກ່ອນເວລາທີ່ໄດ້ກຳນົດໄວ້. ໜ່ວຍປ່ອນບັດບ້ານວາປີ ມີ 1 ໜ່ວຍບັດ, 2 ຫີບບັດ ແລະ ຜູ້ມີສິດເລືອກຕັ້ງຕົວຈິງ 1.035 ຄົນ, ຍິງ 546 ຄົນ.

ທ່ານ ນາງ ໂຄຕະມີ ຄຳສິງສະຫວັດ ໄດ້ສະແດງຄວາມຮູ້ສຶກພາກພູມໃຈເປັນຢ່າງຍິ່ງ ທີ່ໄດ້ເປັນສ່ວນໜື່ງໃນການໃຊ້ສິດໃຊ້ສຽງເລືອກເອົາຜູ້ແທນສະພາແຫ່ງຊາດ ແລະ ສະພາປະຊາຊົນແຂວງ ເຫັນໄດ້ຊຸດນີ້ ແມ່ນມີຄວາມຄຶກຄື້ນກວ່າຊຸດຜ່ານມາ ເນື່ອງຈາກການຮັບຮູ້ເຂົ້າໃຈ ຫຼາຍຂຶ້ນ, ຂະບວນການຕ່າງໆ ກໍ່ຟົດຟື້ນ ແລະ ມີບັນຍາກາດ, ສະຖານທີ່ປ່ອນບັດສະດວກສະບາຍ ແລະ ອັນສຳຄັນແມ່ນໄດ້ສຶກສາຂໍ້ມູນ, ປະຫວັດການເຄື່ອນໄຫວຂອງຜູ້ສະໝັກຢ່າງຖີ່ຖ້ວນແລ້ວ ຈື່ງມາໃຊ້ສິດໃນວັນທີ 21 ກຸມພານີ້.