ບັນຍາກາດການເລືອກຕັ້ງສະມາຊິກສະພາແຫ່ງຊາດ ຊຸດທີ IX ແລະ ສະມາຊິກສະພາປະຊາຊົນແຂວງ ຊຸດທີ II ຢູ່ເມືອງເລົ່າງາມ ແມ່ນໄດ້ດຳເນີນໄປຢ່າງຟົດຟື້ນ ໃນຕອນເຊົ້າວັນທີ 21 ກຸມພາ 2021, ໂດຍມີພໍ່ແມ່ປະຊາຊົນ ກໍ່ຄືຜູ້ມີສິດປ່ອນບັດເລືອກຕັ້ງ ມາເຕົ້າໂຮມ ແລະ ເຂົ້າຮ່ວມການປ່ອນບັດຄັ້ງນີ້ ຢ່າງພ້ອມພຽງ ເລີ່ມແຕ່ເວລາ 7 ໂມງເຊົ້າ. ໂດຍສະເພາະແມ່ນໜ່ວຍບັດບ້ານໂນນຄຳ ເຊີ່ງໄດ້ຈັດຂຶ້ນຢູ່ຫ້ອງການບ້ານ, ໂດຍການເຂົ້າຮ່ວມຂອງ ທ່ານ ຂັນໄຊ ຣັດຖະເຣົ້າ ຄະນະປະຈຳພັກແຂວງ, ທ່ານ ສົມສັກ ທົງຄຳຫານ ກຳມະການພັກແຂວງ ເຈົ້າເມືອງໆເລົ່າງາມ ພ້ອມດ້ວຍການນຳຂັ້ນເມືອງ, ອຳນາດການປົກຄອງບ້ານ ແລະ ຜູ້ມີສິດປ່ອນບັດເລືອກຕັ້ງ ເຂົ້າຮ່ວມຢ່າງຫຼວງຫຼາຍ.

ເມືອງເລົ່າງາມ ປະກອບມີ 97 ບ້ານ, ມີພົນລະເມືອງທັງໝົດ 78,268ຄົນ, ຜູ້ມີສິດປ່ອນບັດເລືອກຕັ້ງ 44,600 ຄົນ, ມີໜ່ວຍປ່ອນບັດເລືອກຕັ້ງ 74 ໜ່ວຍ, ມີຫີບບັດທັງໝົດ 148 ໜ່ວຍ ໃນນັ້ນຫີບບັດ ສສຊ ຈໍານວນ 74 ໜ່ວຍ ແລະ ຫີບບັດ ສສຂ ຈໍານວນ 74 ໜ່ວຍ, ການປ່ອນບັດເລືອກຕັ້ງຄັ້ງນີ້ແມ່ນເປັນການປັບປຸງລະບອບປະຊາທິປະໄຕຈາກປະຊາຊົນ ໂດຍປະຊາຊົນ ແລະເພື່ອຜົນປະໂຫຍດຂອງປະຊາຊົນ, ເປັນພາກສ່ວນໜຶ່ງໃນການປັບປຸງບຸກຄະລາກອນຂອງສະພາແຫ່ງຊາດ ແລະ ສະພາປະຊາຊົນແຂວງ. ສະເພາະໜ່ວຍບັດບ້ານໂນນຄຳ ມີ 1 ໜ່ວຍບັດ, ຜູ້ມີສິດເລືອກຕັ້ງທັງໝົດ 630 ຄົນ, ຍິງ 271 ຄົນ. ພາຍຫຼັງໄດ້ເປີດການປ່ອນບັດຢ່າງເປັນທາງການ ມີປະຊາຊົນຈຳນວນຫລວງຫຼາຍ ເຂົ້າມາໃຊ້ສິດຄັ້ງນີ້, ພ້ອມທັງໄດ້ເອົາໃຈໃສ່ຕໍ່ກັບການປ້ອງກັນການແຜ່ລະບາດຂອງພະຍາດໂຄວິດ-19 ຕື່ມອີກ.

ຄະນະຮັບຜິດຊອບໜ່ວຍປ່ອນບັດເລືອກຕັ້ງດັ່ງກ່າວ ໄດ້ສ້າງຂະບວນການຢ່າງກວ້າງຂວາງ, ເຊີນຊວນຜູ້ມີສິດພາຍໃນບ້ານ ທີ່ໄດ້ຂຶ້ນບັນຊີລາຍຊື່ ແລະ ໄດ້ຮັບໃບຢັ້ງຢືນ, ພ້ອມທັງເຜີຍແຜ່, ແນະນຳລະບຽບການປ່ອນບັດໃນຄັ້ງນີ້, ຕິດຕາມກວດກາຄວາມເປັນລະບຽບ ໄປພ້ອມໆກັນ ຜ່ານລະບົບໂທລະໂຄ່ງ.