ວັນທີ 21 ກຸມພາ 2021 ຜ່ານມານີ້, ຜູ້ມີສິດປ່ອນບັດເລືອກຕັ້ງທົ່ວ ແຂວງເຊກອງ ຈໍານວນ 69.784 ຄົນ, ຍິງ 35.007 ຄົນ, ມີໜ່ວຍປ່ອນບັດ 99 ໜ່ວຍ, ມີຫີບບັດ 206 ຫີບ ແລະ ຖົງບັດເຄື່ອນທີ່ 200 ຖົງ. ໃນນີ້, ເຂດເລືອກຕັ້ງເມືອງລະມາມມີຜູ້ມີສິດທັງໝົດ 23.107 ຄົນ, ຍິງ 11.687 ຄົນ, ເຂດເລືອກຕັ້ງເມືອງທ່າແຕງ 24.786 ຄົນ, ຍິງ 12.537 ຄົນ, ເຂດເລືອກຕັ້ງເມືອງກະລຶມ 8.913 ຄົນ, ຍິງ 4.327 ຄົນ ແລະ ເຂດເລືອກຕັ້ງເມືອງດາກຈຶງ 12.978 ຄົນ, ຍິງ 6.456 ຄົນ ໄດ້ເຂົ້າຮ່ວມໃຊ້ສິດປ່ອນບັດເລືອກຕັ້ງສະມາຊິກສະພາແຫ່ງຊາດ ຊຸດທີ IX ປະຈໍາເຂດເລືອກຕັ້ງທີ 16 ແຂວງ ເຊກອງ ແລະ ສະມາຊິກສະພາປະຊາຊົນແຂວງ ຊຸດທີ II ຢູ່ບັນດາໜ່ວຍເລືອກຕັ້ງແຕ່ລະຂົງເຂດຢ່າງເປັນຂະບວນຟົດຟື້ນ, ມີຄວາມເປັນລະບຽບຮຽບຮ້ອຍ, ມີຄວາມສະຫງົບໂດຍພື້ນຖານ ແລະ ສໍາເລັດຕາມລະດັບຄາດໝາຍ.

ຂະນະທີ່ທ່ານ ເຫຼັກໄຫຼ ສີວິໄລ ກໍາມະການສູນກາງພັກ, ເລຂາພັກແຂວງ, ເຈົ້າແຂວງໆເຊກອງ ກໍໄດ້ເຂົ້າຮ່ວມປ່ອນບັດເລືອກຕັ້ງສະມາຊິກສະພາແຫ່ງຊາດ (ສສຊ) ຊຸດທີ IX ແລະສະມາຊິກສະພາປະຊາຊົນແຂວງເຊກອງ (ສສຂ) ຊຸດທີ II ໂດຍມີບັນດາທ່ານການນໍາຂັ້ນເມືອງ, ອະດີດການນໍາຂອງແຂວງ, ພະນັກງານບໍານານ, ຄະນະພັກ-ອົງການປົກຄອງຂັ້ນບ້ານ ແລະປະຊາຊົນຢູ່ໜ່ວຍເລືອກຕັ້ງທີ 03 ບ້ານໃໝ່ຫົວເມືອງເມືອງລະມາມ ແຂວງເຊກອງໜ່ວຍເລືອກຕັ້ງທີ່ 3 ບ້ານໃໝ່ຫົວເມືອງ, ຜູ້ມີສິດປ່ອນບັດເລືອກຕັ້ງທີ່ມີເກນອາຍຸແຕ່ 18 ປີຂຶ້ນໄປຈໍານວນ 1,459 ຄົນ, ຍິງ 785 ຄົນເຂົ້າຮ່ວມດ້ວຍບັນຍາກາດຟົດຟື້ນ.

ພ້ອມນີ້, ທ່ານ ດົງເພັດ ພະຍົນ ຮອງເລຂາພັກແຂວງ, ຮອງປະທານສະພາປະຊາຊົນແຂວງ, ຮອງຄະນະກໍາມະການເລືອກຕັ້ງຂັ້ນແຂວງ ຍັງໄດ້ນໍາໜ້າ-ນໍາພາປະຊາຊົນປ່ອນບັດ ເພື່ອເລືອກເອົາຕົວແທນຂອງຕົນເຂົ້າໄປປະຕິບັດໜ້າທີ່ອັນມີກຽດຢູ່ໃນສະພາແຫ່ງຊາດ ແລະສະພາປະຊາຊົນແຂວງ ຢູ່ໜ່ວຍເລືອກຕັ້ງທີ 04 ບ້ານໂນນມີໄຊ ເມືອງລະມາມແຂວງເຊກອງ ເຊິ່ງໜ່ວຍເລືອກຕັ້ງທີ 4 ບ້ານໂນນມີໄຊ, ມີຜູ້ມີສິດປ່ອນບັດເລືອກຕັ້ງທັງໝົດ 2.334 ຄົນ, ຍິງ 797 ຄົນ

ນອກນີ້, ຍັງມີຄະນະນໍາຂັ້ນແຂວງ-ຂັ້ນເມືອງ ພ້ອມດ້ວຍພະນັກງານອາວຸໂສປະຕິວັດຫຼາຍໆທ່ານກໍໄດ້ເຂົ້າຮ່ວມນໍາໜ້າ-ນໍາພາຜູ້ມີສິດປ່ອນບັດເລືອກຕັ້ງເຂົ້າຮ່ວມໃຊ້ສິດຢູ່ບັນດາໜ່ວຍເລືອກຕັ້ງຢູ່ຂັ້ນເມືອງ-ຂັ້ນບ້ານຫຼາຍໆໜ່ວຍປ່ອນບັດຢ່າງເປັນຂະບວນຟົດຟື້ນ ແລະ ສໍາເລັດ 100%.