ໃນຕອນເຊົ້າວັນທີ 21 ກຸມພາ 2021 ທ່ານ ນາງ ບຸນຮຽງ ບຸນຈິດ ກໍາມະການປະຈໍາພັກແຂວງ, ປະທານແນວລາວສ້າງຊາດແຂວງເຊກອງ, ຄະນະກໍາມະການເລືອກຕັ້ງຂັ້ນແຂວງ ພ້ອມຄະນະໄດ້ລົງຕິດຕາມກວດກາຄວາມເປັນລະບຽບຮຽບຮ້ອຍ ແລະ ບັນຍາກາດຂອງການປ່ອນບັດເລືອກຕັ້ງຢູ່ໜ່ວຍເລືອກຕັ້ງບ້ານທົ່ງແຄນ, ບ້ານລະກາຍ, ບ້ານແກ້ງກຸຍ ແລະບ້ານແກ້ງກວຽນ ໂດຍລວມເຫັນວ່າມີປະຊາຊົນ ກໍຄືຜູ້ມີສິດເລືອກຕັ້ງໄດ້ໄປໃຊ້ສິດໃຊ້ສຽງຂອງຕົນ ເພື່ອເລືອກເອົາຜູ້ແທນເຂົ້າໄປເຮັດໜ້າທີ່ໃນສະພາຢ່າງເປັນຂະບວນຟົດຟື້ນ.

ໃນໂອກາດນີ້, ທ່ານ ອໍບົວລາ ອ່ອນມະໄລວົງ ກໍາມະການພັກແຂວງ, ເລຂາພັກເມືອງ, ປະທານຄະນະກໍາມະການເລືອກຕັ້ງຂັ້ນເມືອງ ແລະ ທ່ານ ສາຍຄໍາ ແກ້ວບຸນປານ ຮອງເລຂາພັກເມືອງ, ຮອງປະທານຄະນະກໍາມະການເລືອກຕັ້ງຂັ້ນເມືອງ ກໍໄດ້ລາຍງານວ່າ: ເມືອງກະລຶມ ມີໜ່ວຍປ່ອນບັດທັງໝົດ 20 ໜ່ວຍ, ມີຜູ້ມີສິດປ່ອນບັດທັງໝົດ 8 ພັນກວ່າຄົນ, ໃນນີ້ບັນຍາກາດໂດຍລວມໃນການໄປໃຊ້ສິດໃຊ້ສຽງຂອງປະຊາຊົນແມ່ນມີຄວາມຟົດຟື້ນກວ່າຄັ້ງຜ່ານໆມາ ທັງນີ້ ກໍຍ້ອນຄວາມເອົາໃຈໃສ່ນໍາພາ-ຊີ້ນໍາຂອງຄະນະພັກ, ຄະນະກໍາມະການເລືອກຕັ້ງຂັ້ນເມືອງທີ່ໄດ້ລົງໂຄສະນາເຜີຍແຜ່ເອກະສານ, ມະຕິຄໍາສັ່ງແນະນໍາຕ່າງໆກ່ຽວກັບການເລືອກຕັ້ງໃຫ້ປະຊາຊົນ ກໍຄືຜູ້ມີສິດປ່ອນບັດເລືອກຕັ້ງໄດ້ຮັບຮູ້, ເຂົ້າໃຈເຖິງຄວາມໝາຍສໍາຄັນກ່ຽວກັບການເລືອກຕັ້ງ ອັນເຮັດໃຫ້ການເລືອກຕັ້ງໃນຄັ້ງນີ້ ດໍາເນີນໄປດ້ວຍບັນຍາກາດເບີກບານມ່ວນຊື່ນ, ຖືກຕ້ອງຕາມລະບຽບກົດໝາຍ ແລະມີຄວາມສະຫງົບ 100%.

ໃນໂອກາດນີ້ທ່ານ ນາງ ບຸນຮຽງ ບຸນຈິດ ກໍໄດ້ຍ້ອງຍໍຊົມເຊີຍມາຍັງຄະນະກໍາມະການເລືອກຕັ້ງຂັ້ນເມືອງ ທີ່ໄດ້ເອົາໃຈໃສ່ປະຕິບັດໜ້າທີ່ວຽກງານຂອງຕົນໄດ້ຮັບມອບໝາຍ ແລະມີຜົນສໍາເລັດ, ແນວໃດກໍຕາມ ທ່ານປະທານແນວລາວສ້າງຊາດແຂວງ ກໍຍັງເນັ້ນໃຫ້ຄະນະກໍາມະການເລືອກຕັ້ງຂັ້ນເມືອງ ແລະຄະນະຮັບຜິດຊອບໜ່ວຍປ່ອນບັດແຕ່ລະໜ່ວຍຈົ່ງສືບຕໍ່ປະຕິບັດໜ້າທີ່ຂອງຕົນ, ທັງນີ້ ກໍເພື່ອຮັບປະກັນແກ່ການປ່ອນບັດເລືອກຕັ້ງໃນທົ່ວແຂວງ ໂດຍສະເພາະຢູ່ເມືອງກະລຶມສໍາເຮັດຕາມເປົ້າໝາຍ ແລະຮັບປະກັນໃຫ້ໄດ້ 300%.