ວັນທີ 22 ກຸມພາ 2021 ທ່ານ ນີສອນ ວືອິນຢາວ ຮອງປະທານສະພາປະຊາຊົນແຂວງ, ຮອງຫົວໜ້າອານຸກຳມະການໂຄງປະກອບບຸກຄະລາກອນ ແລະ ທ່ານ ວີແຊມ ໄຊສຶກສາ ຮອງຫົວໜ້າຫ້ອງວ່າການແຂວງ, ຄະນະກຳມະການເລືອກຕັ້ງຂັ້ນແຂວງ ໄດ້ລົງຕິດຕາມ, ກວດກາການສັງລວມຄະແນນການເລືອກຕັ້ງ ຢູ່ເມືອງທ່າແຕງ.
ທ່ານ ບຸນສວນ ບຸດບຸນມາ ຫົວໜ້າຄະນະຈັດຕັ້ງເມືອງທ່າແຕງ, ຫົວໜ້າອະນຸໂຄງປະກອບບຸກຄະລາກອນຂັ້ນເມືອງໃຫ້ຮູ້ວ່າ: ປະຈຸບັນ ຄະນະກໍາມະການເລືອກຕັ້ງ ກໍຄືຄະນະຮັບຜິດຊອບກໍຢູ່ແຕ່ລະໜ່ວຍເລືອກຕັ້ງ ກໍໄດ້ຂຸ້ນຂ້ຽວນັບສັງລວມຄະນະແນນ ເພື່ອລາຍງານຄະນະກຳມະການເລືອກຕັ້ງຂັ້ນເມືອງ ໃຫ້ສໍາເລັດທ່ວງທັນກັບເວລາທີ່ກໍານົດໄວ້.
  ໃນນີ້ເຂດເລືອກຕັ້ງເມືອງທ່າແຕງ ມີໜ່ອຍປ່ອນບັດ 20 ໜ່ວຍ, ມີຫີບບັດ 40 ໜ່ວຍ, ຖົງບັດເຄື່ອນທີ່ 48 ຖົງ, ມີພົນລະເມືອງທັງໝົດ 44.097 ຄົນ, ຍິງ 21.637 ຄົນ, ໃນນີ້ ຜູ້ມີສິດປ່ອນບັດໂຕຈິງ 24.216 ຄົນ, ຍິງ 12.305 ຄົນ; ປະຈຸບັນການນັບຄະແນນສໍາເລັດແລ້ວ 100% ແຕ່ຍັງຮຽບຮຽງຄືນ ເພື່ອໃຫ້ຖືກຕ້ອງຊັດເຈນ ແລະຄາດຄະເນວ່າຈະໄດ້ລາຍງານໃຫ້ຄະນະກໍາມະການເລືອກຕັ້ງຂັ້ນເມືອງ ຮັບຊາບ ໃນຕອນແລງມື້ນີ້ ແລະເພື່ອກະກຽມລາຍງານໃຫ້ຄະນະກຳມະການເລືອກຕັ້ງຂັ້ນແຂວງຢ່າງເປັນທາງການໃນວັນທີ 23 ກຸມພາ ນີ້

ໃນຂະນະດຽວກັນ ທ່ານ ສາຍລົມ ດາລາສຸກ ຮອງປະທານແນວລາວສ້າງຊາດເມືອງກະລຶມ, ຄະນະກໍາມະການອານຸໂຄງປະກອບບຸກຄະລາກອນຂັ້ນເມືອງໃຫ້ຮູ້ວ່າ: ທົ່ວເມືອງກະລຶມມີໜ່ວຍປ່ອນບັດເລືອກຕັ້ງທັງໝົດ 20 ໜ່ວຍ, ມີຫີບບັດ 40 ໜ່ວຍ, ຖົງບັດເຄື່ອນທີ່ 53 ຖົງ ແລະມີຜູ້ມີສິດປ່ອນບັດທັງໝົດ 8 ພັນກວ່າຄົນ. ປະຈຸບັນການນັບຄະແນນສໍາເລັດແລ້ວ 16 ໜ່ວຍເທົ່າກັບ 80% ແລະ ຄາດຄະເນວ່າການນັບສັງລວມຄະແນນຈະສໍາເລັດລາຍງານໃຫ້ຄະນະກໍາມະການເລືອກຕັ້ງຂັ້ນແຂວງຮັບຊາບຢ່າງເປັນທາງການໃນວັນທີ 23 ກຸມພາ ນີ້ ເຊັ່ນດຽວກັນ.