ໃນວັນທີ 20 ກຸມພາ 2021 ນີ້ ຢູ່ທີ່ຫ້ອງປະຊຸມຫໍພິພິທະພັນມູນເຊື້ອໄຊຊະນະຮ່ວມສຳພັນສູ້ຮົບລາວ-ຫວຽດນາມບໍລິເວນທາງເລກ 9 ໄດ້ຈັດພິທີປະກາດການຈັດຕັ້ງຂັ້ນຮອງອຳນວຍການ ແລະ ບັນດາຂະແໜງການທີ່ຂື້ນກັບຫໍພິພິທະພັນດັ່ງກ່າວ. ໂດຍການເຂົ້າຮ່ວມເປັນປະທານຂອງສະຫາຍ ພັນເອກ ຄຳເພັດ ສຸລິຍະວົງ ຮອງເລຂາຄະນະພັກ ຫົວໜ້າການທະຫານ ກອງບັນຊາການທະຫານແຂວງສະຫວັນະເຂດ,ມີພະແນກການທີ່ກ່ຽວຂ້ອງຈາກກອງບັນຊາການທະຫານແຂວງ,ບັນດາພະນັກງານນັກຮົບພາຍໃນຫໍພິພິທະພັນເຂົ້າຮ່ວມ. ໃນພິທີດັ່ງກ່າວສະຫາຍ ພັນໂທ ແສງສຸລິວັນ ພິທັກສູນທອນ ຫົວໜ້າພະແນກຈັດຕັ້ງທະຫານແຂວງ ແລະ ສະຫາຍພັນໂທ ໄພວັນ ໄຊຍະລາດ ຮອງຫົວໜ້າພະແນກພະນັກງານທະຫານແຂວງ ກໍ່ໄດ້ຜັດປ່ຽນກັນຂຶ້ນອ່ານຂໍ້ຕົກລົງຂອງກອງບັນຊາການທະຫານແຂວງສະຫວັນະເຂດເລກທີ 157/ກບຊສຂ ລົງວັນທີ 17/2/2021 ເລກທີ 1326/ກບຊສຂ ລົງວັນທີ 23/12/2020 ວ່າດ້ວຍການແຕ່ງຕັ້ງສະຫາຍ ພັນຕີ ຄຳອອ່ນ ອາດຫານ ແລະ ສະຫາຍ ພັນຕີ ຫຸມພັນ ຈັນສະຫງ່າ ເປັນຮອງອຳນວຍການຫໍພິພິທະພັນມູນເຊື້ອໄຊຊະນະຮ່ວມສຳພັນສູ້ຮົບລາວ-ຫວຽດນາມບໍລິເວນທາງເລກ 9 ອ່ານມະຕິຕົກລົງວ່າດ້ວຍການແຕ່ງຕັ້ງບົ່ງຕົວຄະນະໜ່ວຍພັກຫໍພິພິທະພັນລາວ-ຫວຽດນາມໃນນັ້ນແຕ່ງຕັ້ງສະຫາຍພັນຕີ ຫຸມພັນ ຈັນສະຫງ່າ ເປັນຮອງເລຂາຄະນະໜ່ວຍພັກ ສະຫາຍ ພັນຕີ ຄຳອອ່ນ ອາດຫານ ເປັນກຳມະການ ສວ່ນຄະນະພັກທີ່ເຫຼືອແມ່ນຮັບພິຊອບຄືເກົ່າ,ຈາກນັ້ນໃນພິທີຍັງໄດ້ຜ່ານຂໍ້ຕົກລົງຂອງກອງບັນຊາການທະຫານແຂວງເລກທີ 152/ກບຊສຂ ລົງວັນທີ 16/2/2021 ວ່າດ້ວຍການແຕ່ງຕັ້ງບັນດາຫົວໜ້າຂະແໜງ,ຮອງຂະແໜງ ແລະ ຊ່ວຍວຽກຂະແໜງເຂົ້າຕາມຕຳແໜ່ງງານຢູ່ຫໍພິພິທະພັນມູນເຊື້ອໄຊຊະນະຮ່ວມສຳພັນສູ້ຮົບລາວ-ຫວຽດນາມ:ເຊິ່ງປະກອບມີ 6 ຂະແໜງການຂຶ້ນກັບ ແລະ 1 ໝູ່ປ້ອງກັນຫໍພິພິທະພັນ.

ໃນໂອກາດນີ້ ສະຫາຍ ພັນເອກ ຄຳເພັດ ສຸລິຍະວົງ ຫົວໜ້າການທະຫານກອງບັນຊາການທະຫານແຂວງສະຫວັນະເຂດ ກໍ່ໄດ້ສະແດງຄວາມຍ້ອງຍໍຊົມເຊີຍຕໍ່ບັນດາສະຫາຍທີ່ໄດ້ຮັບໜ້າທີ່ໃຫ່ມພ້ອມໄດ້ເນັ້ນໜັກຫຼາຍບັນຫາໃຫ້ຄະນະພັກ-ຄະນະອຳນວຍການຕະຫຼອດຮອດບັນດາຂະແໜງການຕ່າງໆ ຈົ່ງພ້ອມກັນຕັ້ງໜ້າເອົາໃຈໃສ່ປະຕິບັດໜ້າທີ່ວຽກງານຕາມການມອບໝາຍຂອງຂັ້ນເທິງຢ່າງເຂັ້ມງວດ,ມີຄວາມສາມັກຄີເປັນເອກະພາບລວມສູນປະຊາທິປະໄຕ, ແບ່ງວຽກງານໃຫ້ບຸກຄົນຮັບພິຊອບເປັນຢ່າງດີ, ເປັນເຈົ້າການຊີ້ນຳວຽກງານວິຊາສະເພາະໃຫ້ເໝາະສົມຖຶກຕ້ອງຕາມຫຼັກການຂອງວຽກ ແລະ ສາມາດຮັບປະກັນດ້ານວຽກງານຕ່າງໆໃຫ້ໄດ້ຮັບຜົນສຳເລັດເປັນຢ່າງດີ.