ວັນທີ 22 ກຸມພາ 2021 ທີ່ຫ້ອງວ່າການແຂວງຄຳມ່ວນ ທ່ານ ທະນົງສິນ ກັນລະຍາ ປະທານບໍລິສັດ ດາຕາຄອມ ຈຳກັດ ນະຄອນຫລວງວຽງຈັນ ຜູ້ສະໝັກຮັບເລືອກຕັ້ງສະມາຊິກສະພາແຫ່ງຊາດ ຊຸດທີ IX ປະຈຳເຂດເລືອກຕັ້ງທີ 12 ແຂວງຄໍາມ່ວນ ພ້ອມດ້ວຍທ່ານ ນາງ ກິ່ງແກ້ວ ກັນລະຍາ ຮອງປະທານບໍລິສັດ ດາຕາຄອມ ໄດ້ນໍາເອົາຄອມພິວເຕີ້ຕັ້ງໂຕະ ຈຳນວນ 10 ຊຸດ ລວມມູນຄ່າປະມານ 80 ລ້ານກີບ ມາມອບໃຫ້ແກ່ 05 ພາກສ່ວນໃນຂະແໜງການຈັດຕັ້ງລັດແຂວງຄຳມ່ວນ ພາກສ່ວນລະ 02 ຊຸດ ເຊິ່ງປະກອບມີ: ຫ້ອງການປ້ອງກັນຄວາມສະຫງົບ ເມືອງທ່າແຂກ, ຫ້ອງວ່າການເມືອງບົວລະພາ, ກອງພັນ 09 ກອງບັນຊາການທະຫານແຂວງຄໍາມ່ວນ, ໂຮງຮຽນນາຍສິບ ແຂວງຄຳມ່ວນ ແລະ ໂຮງຮຽນປະຖົມບ້ານຄຳແຮ່ ເມືອງຍົມມະລາດ ເພື່ອປະກອບສ່ວນດ້ານວັດຖຸອຸປະກອນ ກໍ່ຄືເຄື່ອງຄອມພິວເຕີ້ ຮັບໃຊ້ວຽກງານພາຍໃນຫ້ອງການ ໃຫ້ມີຄວາມສະດວກສະບາຍ ແລະ ຮັບປະກັນເຮັດໃຫ້ການຈັດຕັ້ງປະຕິບັດໜ້າທີ່ວຽກງານພາຍໃນຫ້ອງການ ທີ່ການຈັດຕັ້ງມອບໝາຍໃຫ້ ປະສົບຜົນສຳເລັດຕາມຄາດໝາຍ ແລະ ທັນກັບເວລາ.
ເຂົ້າຮ່ວມເປັນສັກຂີພິຍານໃນພິທີດັ່ງກ່າວ ໂດຍມີທ່ານ ພາກອນ ແກ້ວມະນີ ຮອງຫົວໜ້າຫ້ອງວ່າການແຂວງຄໍາມ່ວນ ພ້ອມດ້ວຍຕາງໜ້າພາກສ່ວນກ່ຽວຂ້ອງເຂົ້າຮ່ວມ.