ທ້າວ ຄຳຈັນ ພອນທະວີສັກ ປະຊາຊົນບ້ານໜອງບົວທອງເໜືອ ເມືອງສີໂຄດຕະບອງ ນະຄອນຫຼວງວຽງຈັນ ໄດ້ໃຫ້ສຳພາດຕໍ່ນັກຂ່າວ ໜັງສືພິມປະຊາຊົນ ກ່ຽວກັບບັ້ນເລືອກຕັ້ງສະມາຊິກສະພາແຫ່ງຊາດ (ສສຊ) ຊຸດທີ IX ແລະ ສະມາຊິກສະພາປະຊາຊົນແຂວງ (ສສຂ) – ນະຄອນຫຼວງວຽງຈັນ ຊຸດທີ II ໃນວັນທີ 21 ກຸມພາຜ່ານມານີ້ວ່າ: ຂ້າພະເຈົ້າຮູ້ສຶກດີໃຈ ແລະ ເປັນກຽດຢ່າງຍິ່ງທີ່ໄດ້ມາໃຊ້ສິດປະຊາທິປະໄຕຂອງຕົນໃນການປ່ອນບັດຄັດເລືອກເອົາ ສສຊ ແລະ ສສຂ ເຖິງຈະເປັນຄັ້ງທຳອິດທີ່ໄດ້ມາໃຊ້ສິດຂອງຕົນເອງ ໃນນາມສ່ວນຕົວໃນການມາເລືອກຕັ້ງຄັ້ງນີ້ແມ່ນມີຄວາມໝາຍ, ຄວາມສຳຄັນຫຼາຍ ແລະ ເປັນເຫດການທີ່ມີຄວາມສຳຄັນຕໍ່ກັບການພັດທະນາປະເທດຊາດ ແລະ ຂ້າພະເຈົ້າກໍໄດ້ເລືອກເອົາຜູ້ແທນທີ່ມີຄວາມຮູ້ຄວາມສາມາດ, ມີຄຸນນະພາບ, ເພື່ອມາເປັນຕົວແທນໃຫ້ປະຊາຊົນລາວກໍຄືປວງຊົນລາວບັນດາເຜົ່າທຸກຊັ້ນຄົນ ເພື່ອມາແກ້ໄຂປະກົດການຫຍໍ້ທໍ້ທີ່ເກີດຂຶ້ນໃນສັງຄົມ ແລະ ບັນຫາອື່ນໆ.

ແມ່ຕູ້ ທອງນຸ່ນ ວົງໄຊຍາ ປະຊາຊົນບ້ານໜອງບົວທອງເໜືອ ເມືອງສີໂຄດຕະບອງ ນະຄອນຫຼວງວຽງຈັນ ໄດ້ໃຫ້ສຳພາດວ່າ: ຂ້າພະເຈົ້າມີຄວາມດີອົກ, ດີໃຈທີ່ໄດ້ມາໃຊ້ສິດຂອງຕົນເອງເພື່ອເລືອກເອົາຜູ້ແທນທີ່ມີນ້ຳສູງສົ່ງ, ມີຄຸນສົມບັດສິນທຳປະຕິວັດ, ມີຄວາມຮູ້, ຄວາມສາມາດ, ມີຄວາມຊື່ສັດ, ບໍລິສຸດ ປອດໃສຂາວສະອາດ ເປັນຕົວແທນຂອງປະຊາຊົນ ເພື່ອມາແກ້ໄຂບັນຫາຕ່າງໆທີ່ເກີດຢູ່ໃນສັງຄົມ ກໍຄືປະເທດຊາດ, ຂອງພວກເຮົາ ແລະ ສາມາດນຳພາປະເທດຊາດໄປສູ່ຄວາມຈະເລີນຮຸ່ງເຮືອງເທື່ອລະກ້າວໆ.

ທ້າວ ມີຖຸນາ ໄຊຍະສິງ ປະຊາຊົນບ້ານໜອງປີງ ເມືອງຈັນທະບູລີ ໄດ້ໃຫ້ຮູ້ວ່າ: ຂ້າພະເຈົ້າ ເປັນຜູ້ໜຶ່ງທີ່ໄດ້ມາໃຊ້ສິດຂອງຕົນເລືອກຕັ້ງສະມາຊິກສະພາແຫ່ງຊາດ ຊຸດ IX ແລະ ສະມາຊິກສະພາປະຊາຊົນແຂວງ-ນະຄອນຫຼວງວຽງຈັນ ຊຸດທີ II ໃນນາມສ່ວນຕົວຂ້າພະເຈົ້າມີຄວາມດີໃຈຫຼາຍທີ່ໄດ້ອອກມາໃຊ້ສິດຂອງຕົນໃນຄັ້ງນີ້ຕົນເອງແມ່ນໄດ້ເລືອກເອົາຜູ້ແທນຜູ້ທີ່ຈະເປັນຕົວແທນໃຫ້ແກ່ປະຊາຊົນຢ່າງແທ້ຈິງມີຈິດໃຈຂາວສະອາດພາປະເທດຊາດຫຼຸດພົ້ນອອກຈາກປະເທດດ້ອຍພັດທະນາເທື່ອກ້າວ.

Medialaos MMD (ແຫຼ່ງຂໍ້ມູນຈາກ: ໜັງສືພິມປະຊາຊົນ)