ພິທີເປີດໂຕໂຄງການຮັບເງິນອຸດໜູນໄລຍະສັ້ນໃຫ້ແກ່ຜູ້ປະກັນຕົນໃນໂຮງງານຕັດຫຍິບ ທີ່ໄດ້ຮັບຜົນກະທົບຈາກພະຍາດ ໂຄວິດ-19 ໄດ້ຈັດຂຶ້ນໃນວັນທີ 23 ກຸມພານີ້ ທີ່ໂຮງແຮມຄຣາວພາຊາ ນະຄອນຫຼວງວຽງຈັນ ໂດຍການເຂົ້າຮ່ວມຂອງທ່ານ ປະເດີມພອນ ສົນທະນີ ຮອງລັດຖະມົນຕີກະຊວງແຮງງານ ແລະ ສະຫັວດດີການສັງຄົມ (ຮສສ); ທ່ານ ນາງ ແກ້ວ ຈັນທະວີໄຊ ຫົວໜ້າອົງການປະກັນສັງຄົມແຫ່ງຊາດ ໂດຍມີທ່ານເອກອັກຄະລັດ ຖະທູດ ສ ເຢຍລະມັນ ປະຈຳ ສປປ ລາວ; ທ່ານຜູ້ອຳນວຍການຫ້ອງການອົງການແຮງງານສາກົນຮັບຜິດຊອບປະເທດໄທ, ກຳປູເຈຍ ແລະ ສປປ ລາວ ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ.

ທ່ານນາງ ແກ້ວ ຈັນທະວີໄຊ ໄດ້ລາຍງານໂດຍຫຍໍ້ກ່ຽວກັບຄວາມເປັນມາຂອງ ໂຄງ ການດັ່ງກ່າວວ່າ: ໂຄງການເງິນຊ່ວຍໜູນໄລຍະສັ້ນໃຫ້ແກ່ຜູ້ປະກັນຕົນໃນຂົງເຂດໂຮງງານ ຕັດຫຍິບທີ່ໄດ້ຮັບຜົນກະທົບຈາກການລະບາດຂອງເຊື້ອພະຍາດ ໂຄວິດ-19 ແມ່ນໂຄງການ ທີ່ໄດ້ຮັບການຊ່ວຍເຫຼືອຈາກກະຊວງ ການຮ່ວມມືດ້ານເສດຖະກິດ ແລະ ການພັດທະນາ ຂອງສະຫະພັນ ເຢຍລະມັນ ໃນມູນຄ່າ 2 ລ້ານກວ່າໂດລາ ໂດຍຜ່ານອົງການແຮງງານ ສາກົນ ແລະ ໄດ້ມອບໃຫ້ອົງການປະກັນສັງຄົມແຫ່ງຊາດ ຮ່ວມກັບ ອົງການຈັດຕັ້ງສາມ ຝ່າຍເປັນຜູ້ຈັດຕັ້ງປະຕິບັດ.

ຈຸດປະສົງຂອງໂຄງການດັ່ງກ່າວນີ້ ເພື່ອຊ່ວຍ ເຫຼືອຜູ້ອອກ ແຮງງານໃນຂົງເຂດໂຮງງານຕັດຫຍິບທີ່ໄດ້ເຂົ້າເປັນສະມາຊິກຂອງກອງທຶນປະກັນສັງຄົມ ດ້ວຍການຊ່ວຍໜູນດ້ານລາຍໄດ້ແກ່ຜູ້ປະກັນຕົນທີ່ໄດ້ຮັບຜົນກະທົບຈາກການ ແຜ່ລະບາດ ຂອງເຊື້ອພະຍາດໂຄວິດ-19. ຄາດຄະເນໃນເບື້ອງຕົ້ນຂອງອົງການແຮງງານ ສາກົນຜູ້ ອອກແຮງງານຢູ່ໃນຂົງເຂດໂຮງງານຕັດຫຍິບຈະມີປະມານ 27.000 ກວ່າຄົນ ຊຶ່ງໃນນັ້ນ ແຮງງານເພດຍິງກວມຫຼາຍກວ່າ 70-80% ແລະ ຜະລິດຕະພັນເກືອບທັງໝົດ ຂອງບັນ ດາໂຮງງານຕັດຫຍິບປະມານ 99% ແມ່ນສົ່ງອອກຕ່າງປະເທດ, ສະນັ້ນເມື່ອມີ ການລະ ບາດພະຍາດໂຄວິດ-19 ໄດ້ສົ່ງຜົນກະທົບຕໍ່ທົ່ວໂລກເຮັດໃຫ້ປະລິມານການຜະລິດຂອງ ບັນດາໂຮງງານຫຼຸດລົງ.

ໂຄງການດັ່ງກ່າວໂດຍການສົມທົບກັບອົງການຈັດຕັ້ງສາມຝ່າຍ ໃນນາມຄູ່ຮ່ວມຈັດຕັ້ງປະຕິບັດ, ກິດຈະກຳທີ່ນຳໃຊ້ງົບປະມານຂອງໂຄງ ການນີ້ມີ 5 ເປົ້າ ໝາຍຫຼັກເຊັ່ນ: ງົບປະມານສຳລັບຊ່ວຍໜູນດ້ານລາຍໄດ້ແກ່ຜູ້ອອກແຮງງານໃນຂົງເຂດ ໂຮງງານຕັດຫຍິບ, ງົບປະມານສ້າງຄວາມເຂັ້ມແຂງ ຄຸ້ມຄອງໃນການຈັດຕັ້ງປະຕິບັດ ແກ່ອົງການປະກັນສັງຄົມແຫ່ງຊາດ, ງົບປະມານສຳລັບການສົ່ງເສີມການຮ່ວມມື ແລະ ຊຸກຍູ້ການຈັດຕັ້ງປະຕິບັດໂຄງການຂອງອົງການຈັດຕັ້ງສາມຝ່າຍ, ງົບປະມານສຳລັບການ ຕິດຕາມ, ປະເມີນຜົນ ແລະ ງົບປະມານສະໜັບສະໜູນໂຄງການ ບໍລິຫານຂອງຄູ່ຮ່ວມ ພັດທະນາ.

ເງິນຊ່ວຍໜູນທີ່ຜູ້ອອກແຮງງານຈະໄດ້ຮັບໃນຄັ້ງນີ້ແມ່ນ 900.000 ກີບ/ຄົນ ຊຶ່ງແຕ່ ລະໂຮງງານຕ້ອງໄດ້ສັງລວມ ແລະ ສະໜອງຂໍ້ມູນບັນຊີລາຍຊື່ຜູ້ອອກແຮງງານທັງໝົດ ໃນໂຮງງານຕົນຕາມຮ່າງແບບຟອມທີ່ກຳນົດ ເພື່ອສົ່ງໃຫ້ອົງການປະກັນສັງຄົມແຫ່ງຊາດ ເປັນຜູ້ພິຈາລະນາ ໂດຍຈະກວດສົມທຽບຂໍ້ມູນກັບຖານຂໍ້ມູນເງິນສົມທົບປະ ກັນສັງຄົມ ແລະ ຄິດໄລ່ຈ່າຍເທື່ອດຽວໃຫ້ຜູ້ປະກັນຕົນແຕ່ລະຄົນ.

Medialaos MMD (ແຫຼ່ງຂໍ້ມູນຈາກ: ໜັງສືພິມປະຊາຊົນ)