ເພື່ອເປັນການໂຄສະນາສຶກສາອົບຮົມທາງດ້ານການເມືອງ-ແນວຄິດ ໃຫ້ແກ່ສະມາຊິກກຳມະບານ, ກຳມະກອນ ແລະ ຊາວຜູ້ອອກແຮງງານລາວບັນດາເຜົ່າ ໃຫ້ໄດ້ຮັບຮູ້ເຖິງຕົ້ນກຳເນີດ, ການເຕີບໃຫຍ່ຂະຫຍາຍຕົວຂອງອົງການຈັດຕັ້ງກຳມະບານລາວ ຕະລອດໄລຍະ 65 ປີທີ່ຜ່ານມາໃຫ້ໄດ້ຢ່າງທົ່ວເຖິງ.ສະນັ້ນ, ມາໃນຕອນບ່າຍຂອງວັນທີ 19 ກຸມພາ 2021 ນີ້, ສະຫະພັນກຳມະບານແຂວງສະຫວັນນະເຂດ ຈຶ່ງໄດ້ມີການສຶບຕໍ່ລົງເຄື່ອນໄຫວຈັດພິທີປາຖະກະຖາວັນສ້າງຕັ້ງສະຫະພັນກຳມະບານລາວ ຄົບຮອບ 65 ປີ ຂຶ້ນຢ່າງເປັນທາງການທີ່ຫ້ອງປະຊຸມກຳມະບານຮາກຖານ ດ່ານສາກົນແດນສະຫວັນ ໂດຍການເຂົ້າຮ່ວມ ຂອງ ທ່ານ ນາງ ພົມມາ ທອງເພັງ ຮອງປະທານຄະນະບໍລິຫານງານສະຫະພັນກຳມະບານແຂວງ, ມີ ທ່ານ ພັນໂທ ກອງມະນີ ຊົມມີໄຊ ເລຂາຄະນະພັກຮາກຖານ ຫົວໜ້າດ່ານສາກົນແດນສະຫວັນ, ທ່ານ ບຸນເຖິງ ໄຊຍະວົງ ປະທານກຳມະບານຮາກຖານ ດ່ານສາກົນແດນສະຫວັນ ຕະຫຼອດເຖິງພະນັກງານ, ສະມາຊິກກຳມະບານຮາກຖານດັ່ງກ່າວເຂົ້າຮ່ວມຈຳນວນ 47ທ່ານ, ຍິງ 13ທ່ານ.

ໂອກາດດຽວກັນນີ້ ທ່ານ ນາງ ພົມມາ ທອງເພັງ ກໍ່ໄດ້ຍົກໃຫ້ເຫັນເຖິງຕົ້ນກຳເນີດ ແລະ ການເຕີບໃຫຍ່ຂະຫຍາຍຕົວຂອງອົງການຈັດຕັ້ງກຳມະບານລາວ ຕະຫຼອດໄລຍະ 65 ປີ ທີ່ຜ່ານມາຈົນເຖິງປະຈຸບັນແລະ ວຽກງານອັນພົ້ນເດັ່ນໃນການປະກອບສ່ວນພາລະກິດປະຕິວັດ ທີ່ມີລັກສະນະອັນດີເລີດຂອງຊົນຊັ້ນກຳມະກອນລາວ ໃນການສຶບຕໍ່ຍຶດໝັ້ນເດີນຕາມແນວທາງປ່ຽນແປງໃໝ່ຮອບດ້ານທີ່ມີຫຼັກການຂອງພັກຢ່າງຕັ້ງໜ້າ, ເຂົ້າໃນການປະຕິບັດວຽກງານໃຫ້ບັນລຸຈຸດປະສົງ ແລະ ເປົ້າໝາຍມະຕິກອງປະຊຸມໃຫຍ່ຜູ້ແທນກຳມະບານລາວທົ່ວປະເທດ ຄັ້ງທີ VIII, ມະຕິກອງປະຊຸມໃຫຍ່ຄັ້ງທີ XI ຂອງພັກ ຕິດພັນກັບແຜນພັດທະນາ ເສດຖະກິດ-ສັງຄົມ 5 ປີ ແຫ່ງຊາດ ຄັ້ງທີ IX ໃຫ້ມີຄວາມເປັນເອກະພາບ ແຕ່ສູນກາງລົງຮອດທ້ອງຖິ່ນຮາກຖານໃນທົ່ວປະເທດ ໂດຍເອົາໃຈໃສ່ເພີ່ມທະວີປັບປຸງການຈັດຕັ້ງທຸກຂັ້ນໃຫ້ມີຄວາມເຂັ້ມແຂງ, ເສີມຂະຫຍາຍຫົວຄິດປະດິດສ້າງເຂົ້າໃນການຈັດຕັ້ງປະຕິບັດພາລະບົດບາດ, ໜ້າທີ່ຂອງຕົນ, ຂະຍາຍການຈັດຕັ້ງສະມາຊິກກຳມະບານເຂົ້າສູ່ຫົວໜ່ວຍທຸລະກິດເອກະຊົນ ກໍ່ຄືການລົງທຶນຂອງຕ່າງປະເທດບ່ອນທີ່ບໍ່ທັນມີອົງການຈັດຕັ້ງກຳມະບານ ໃຫ້ນັບມື້ນັບກວ້າງຂວາງ ເພື່ອເຮັດໃຫ້ສະມາຊິກກຳມະບານໄດ້ຮັບການບຳລຸງ, ກໍ່ສ້າງ, ຍົກລະດັບຄວາມຮູ້, ຄວາມສາມາດທາງດ້ານເຕັກນິກວິທະຍາສາດໃຫ້ມີຄຸນນະພາບທີ່ດີຂຶ້ນເປັນກ້າວໆ.
ສະຫະພັນກຳມະບານແຂວງສະຫວັນນະເຂດ