ວັນທີ 23 ກຸມພາ 2021, ທີ່ຫ້ອງວ່າການແຂວງຈຳປາສັກ, ທ່ານ ວິໄລວົງ ບຸດດາຄຳ ກຳມະການສູນກາງພັກ ເລຂາຄະນະບໍລິຫານງານພັກແຂວງ ເຈົ້າແຂວງໆຈຳປາສັກ ພ້ອມຄະນະ ໄດ້ຕ້ອນຮັບ ທ່ານ ຄຳສານ ສຸວົງ ເລຂາຄະນະພັກ ຫົວຫນ້າອົງການໄອຍະການປະຊາຊົນສູງສຸດ ໃນໂອກາດມາເຄື່ອນໄຫວວຽກງານ ຢູ່ແຂວງຈຳປາສັກ.
ໂອກາດນີ້, ທ່ານ ຄຳສານ ສຸວົງ ຫົວຫນ້າອົງການໄອຍະການປະຊາຊົນສູງສຸດ ໄດ້ສະແດງຄວາມຊົມເຊີຍ ຕໍ່ຜົນສຳເລັດຂອງກອງປະຊຸມໃຫຍ່ ຄັ້ງທີ VIII ຜູ້ແທນອົງຄະນະພັກແຂວງຈໍາປາສັກ, ມັນເປັນການຢັ້ງຢືນເຖິງ ຜົນສຳເລັດ, ຄວາມເຊື່ອໝັ້ນຕໍ່ບົດບາດການນໍາພາ ຂອງອົງຄະນະພັກ ແລະຂໍໃຫ້ ຮັກສາ ໝາກຜົນ ແລະຜົນງານ ສືບຕໍ່ປະຕິບັດດ້ວຍຄວາມຮັບ ຜິດຊອບສູງ ໃຫ້ບັນລຸຜົນສໍາເລັດຕາມລະດັບຄາດໝາຍ ແລະພິເສດແມ່ນໄດ້ ປະກອບສ່ວນເຮັດໃຫ້ການເລືອກຕັ້ງສະມາຊິກສະພາແຫ່ງຊາດ ຊຸດທີ IX ແລະ ສະມາຊິກສະພາປະຊາຊົນຂັ້ນແຂວງ ຊຸດທີ II ໄດ້ດຳເນີນໄປດ້ວຍບັນຍາກາດ ແລະ ບັນລຸຜົນສຳເລັດຕາມຄາດໝາຍທີ່ວາງໃວ້ ແລະໃນການເຄື່ອນໄຫວວຽກງານ ຢູ່ແຂວງຈຳປາສັກ ຂອງທ່ານຫົວຫນ້າອົງການໄອຍະການປະຊາຊົນສູງສຸດ ເທື່ອນີ້ ແມ່ນຈະໄດ້ເຂົ້າຮ່ວມ ພິທີປະກາດມອບ-ຮັບ ແລະແຕ່ງຕັ້ງ ຫົວໜ້າອົງການໄອຍະການປະຊາຊົນແຂວງຈຳປາສັກ ຜູ້ເກົ່າ ແລະຜູ້ໃໝ່, ເພື່ອເປັນການປັບປຸງກົງຈັກການຈັດຕັ້ງໃຫ້ຖືກຕ້ອງ ສອດຄ່ອງ ແທດເໝາະກັບໜ້າທີ່ວຽກງານໃນໄລຍະໃໝ່.

ໂອກາດດຽວກັນນີ້, ທ່ານ ວິໄລວົງ ບຸດດາຄຳ ເຈົ້າແຂວງຈຳປາສັກ ໄດ້ສະແດງການຕ້ອນຮັບ ແລະມີຄວາມເປັນເອກະພາບສູງ ຕໍ່ຄຳເຫັນຂອງທ່ານຫົວຫນ້າອົງການໄອຍະການປະຊາຊົນສູງສຸດ ແລະຜ່ານມາ ອົງການປົກຄອງແຂວງ ແລະ ອົງການໄອຍະການປະຊາຊົນ ແມ່ນໄດ້ມີການປະສານສົມທົບ ໃນວຽກງານວິຊາສະເພາະ ກ່ຽວກັບການຈັດຕັ້ງ, ການເຄື່ອນໄຫວ ເພື່ອຮັບປະກັນການປະຕິບັດໜ້າທີ່ວຽກງານ ແນໃສ່ປົກປ້ອງຜົນປະໂຫຍດຂອງລັດ, ສັງຄົມ ແລະສິດຜົນປະໂຫຍດອັນຊອບທຳຂອງພົນລະເມືອງ, ແຜນພັດທະນາເສດຖະກິດ-ສັງຄົມ ຂອງແຂວງຈຳປາສັກ ກໍຄື ປະກອບສ່ວນເຂົ້າໃນການປົກປັກຮັກສາ ແລະພັດທະນາປະເທດຊາດ.

ຂ່າວແຂວງ​ຈຳ​ປາ​ສັກ