ວັນທີ23ກຸມພາ2021ແຂວງສາລະວັນ ຈັດພິທີສອບເສັງນັກຮຽນເກັ່ງ ປະຈຳສົກປີ 2020 – 2021 ທີ່ສະໂມສອນໂຮງຮຽນ ມສ ສາລະວັນ, ຈຸດປະສົງກໍ່ເພື່ອສ້າງໂອກາດໃຫ້ນັກຮຽນສະແດງອອກດ້ານພອນສະຫວັນດ້ານຄວາມຮູ້ – ຄວາມສາມາດ ແລະ ຫົວຄິດປະດິດສ້າງທີ່ມີລັກສະນະແຂ່ງຂັນກັນ ໂດຍສະເພາະດ້ານລາຍວິຊາໃດໜຶ່ງເພື່ອໃຫ້ເກີດຄວາມຊຳນິຊຳນານ, ທັງເປັນການຄັດເລືອກເອົານັກຮຽນເກັ່ງຊັ້ນປະຖົມໃນລະດັບ ແຂວງ; ສ່ວນຊັ້ນ ມ 4 ແລະ ມ 7 ແມ່ນເພື່ອຄັດເລືອກເອົາຕົວແທນນັກຮຽນເກັ່ງຊັ້ນ ມ.4 ເຂົ້າຮຽນຕໍ່ ມ.5 ຫ້ອງພອນສະຫວັນ ທີ່ໂຮງຮຽນ ມສ ວຽງຈັນ ແລະຄັກເລືອກເອົາຕົວແທນນັກຮຽນເກັ່ງ ຊັ້ນ ມ.7 ເພື່ອສັບຊ້ອນເຂົ້າຮຽນ ທຶນການສຶກສາໃນຜົນຕົວເລກແບ່ງປັນຂອງກະຊວງສຶກສາທິການ ແລະກິລາ.

ທ່ານບຸນທຽມ ຈັນທະຈອນ ຫົວໜ້າຂະແໜງສາມັນສຶກສາ ກ່າວວ່າ: ສຳລັບສົກຮຽນ 2020 – 2021 ນີ້ກະຊວງສຶກສາທິການ ແລະກິລາ ໄດ້ໂຈະການສອບເສັງແຂ່ງຂັນນັກຮຽນເກັ່ງຊັ້ນມັດທະຍົມສຶກສາລະດັບຊາດ ເນື່ອງຈາກຜົນກະທົບການແຜ່ລະບາດຂອງເຊື້ອພະຍາດ Covid-19, ສ່ວນລະດັບແຂວງແມ່ນໄດ້ສືບຕໍ່ຈັດຕັ້ງສອບເສັງເປັນປົກກະຕິ.

ການຈັດຕັ້ງສອບເສັງນັກຮຽນເກັ່ງຂັ້ນແຂວງຊັ້ນປະຖົມແມ່ນເປັນປີທີ 5, ຊັ້ນມັດທະຍົມສຶກສາ ມ 4 ເປັນປີທີ 12 ແລະ ມ 7 ເປັນປີ 11.ການສອບເສັງໃນປີນີ້ມີນັກສອບເສັງຈາກ 8 ຕົວເມືອງ ທົ່ວແຂວງເຂົ້າຮ່ວມ 88 ຄົນ, ຍິງ 46 ຄົນ. ປະກອບມີນັກຮຽນຊັ້ນ ປ.5 ມີທັງໝົດ 24 ຄົນ, ຍິງ 15 ຄົນ ມີວິຊາສອບເສັງ 3 ວິຊາ ຄື: ພາສາລາວ, ຄະນິດສາດ ແລະ ໂລກອ້ອມຕົວ; ຊັ້ນ ມ 4 ມີທັງໝົດ 32 ຄົນ ຍິງ 18 ຄົນ; ຊັ້ນ ມ 7 ມີທັງໝົດ 32 ຄົນ ຍິງ 13 ຄົນ, ມີວິຊາທີ່ສອບເສັງແຂ່ງຂັນນັກຮຽນເກັ່ງຊັ້ນ ມ 4 ແລະ ມ 7 ມີ 4 ວິຊາ ຄື: ພາສາລາວ – ວັນນະຄະດີ, ຄະນິດສາດ, ຟີຊິກສາດ ແລະ ເຄມີສາດ.ແຕ່ລະວິຊາແມ່ນໃຊ້ເວລາສອບເສັງ 120 ນາທິີ, ການສອບເສັງແມ່ນໄດ້ດຳເນີນເປັນເວລາ 1 ວັນຈຶ່ງສຳເລັດ.ໂດຍການເປັນກຽດເຂົ້າຮ່ວມຂອງ ທ່ານ ຄຳເຟືອງ ອິນທິສອນ ຄະນະພັກຮາກຖານ ຫົວໜ້າຂະແໜງອາຊິວະສິຶກສາ ແລະການສຶກສາຊັ້ນສູງ ພະແນກສຶກສາທິການ ແລະກິລາແຂວງ, ມີພະນັກງານຄູອາຈານຈາກ 8 ຕົວເມືອງ, ຄະນະກຳມະການ, ຄູ – ອາຈານ ແລະ ນ້ອງນັກຮຽນເຂົ້າຮ່ວມ.