ການເລືອກຕັ້ງສະມາຊິກສະພາແຫ່ງຊາດ (ສສຊ) ຊຸດທີ IX ແລະສະມາຊິກສະພາປະຊາຊົນຂັ້ນແຂວງ (ສສຂ) ຊຸດທີ II ໃນວັນທີ 21 ກຸມພາຜ່ານມາ ໃນຂອບເຂດທົ່ວປະເທດເວົ້າລວມ ໂດຍສະເພາະຢູ່ແຂວງເຊກອງ ແມ່ນດໍາເນີນໄປດ້ວຍຄວາມຮັບຜິດຊອບທາງດ້ານການເມືອງ, ຄວາມເປັນເຈົ້າການ ແລະບັນຍາກາດຟົດຟື້ນມ່ວນຊື່ນເໝືອນດັ່ງປາງບຸນໃຫຍ່ຂອງຊາດ ໂດຍການນໍາຂັ້ນແຂວງ, ຂັ້ນເມືອງ ແລະປະຊາຊົນບັນດາເຜົ່າຜູ້ມີສິດປ່ອນບັດເລືອກຕັ້ງຕ່າງກໍພ້ອມພາກັນອອກມາໃຊ້ສິດຂອງຕົນເລືອກເອົາ ສສຊ ແລະ ສສຂ ຜູ້ທີ່ມີຄວາມຮູ້ຄວາມສາມາດ ເພື່ອເປັນຕົວແທນແຫ່ງສິດ ແລະຜົນປະໂຫຍດຂອງປະຊາຊົນບັນດາເຜົ່າ ເຂົ້າໄປເຮັດວຽກຢູ່ສະພາແຫ່ງຊາດ ແລະສະພາປະຊາຊົນແຂວງ.
ເຊິ່ງການນໍາແຂວງເຊກອງ ທ່ານ ເຫຼັກໄຫຼ ສີວິໄລ ກໍາມະການສູນກາງພັກ, ເລຂາຄະນະບໍລິຫານງານພັກແຂວງ, ເຈົ້າແຂວງເຊກອງ ໄດ້ໄປໃຊ້ສິດປ່ອນບັດຢູ່ໜ່ວຍເລືອກຕັ້ງທີ 3 ບ້ານໃໝ່ຫົວເມືອງ ເມືອງລະມາມ; ທ່ານ ພອນເພັດ ຄິວລະວົງ ປະທານສະພາປະຊາຊົນແຂວງເຊກອງ ໄດ້ໄປໃຊ້ສິດຢູ່ໜ່ວຍເລືອກຕັ້ງບ້ານໂນນສະຫວັນເມືອງດາກຈຶງ; ທ່ານ ດົງເພັດ ພະຍົນ ຮອງເລຂາພັກແຂວງ ໄປໃຊ້ສິດປ່ອນບັດຢູ່ໜ່ວຍເລືອກຕັ້ງທີ 4 ບ້ານໂນນມີໄຊ ເມືອງລະມາມ; ທ່ານ ນາງ ຈັນຫອມ ມະຫາໄຊ ຮອງເລຂາພັກແຂວງເຊກອງ ໄດ້ໄປໃຊ້ສິດປ່ອນບັດເລືອກຕັ້ງຢູ່ໜ່ວຍບ້ານທ່າຫຼວງເມືອງລະມາມ ແລະບັນດາທ່ານຄະນະປະຈໍາພັກແຂວງ, ກໍາມະການພັກແຂວງ, ເລຂາພັກເມືອງ, ຄະນະບໍລິຫານງານພັກເມືອງ ແລະປະຊາຊົນຜູ້ສິດເລືອກຕັ້ງກໍ່ອອກມາໃຊ້ສິດເລືອກຕັ້ງເຊັ່ນດຽວກັນ.

ການອອກໄປໃຊ້ສິດເລືອກຕັ້ງ ສສຊ ຊຸດທີ IX ແລະ ສສຂ ຊຸດທີ II ແມ່ນການປະຕິບັດໜ້າທີ່ການເມືອງ ແລະສິດປະຊາທິປະໄຕຂອງພົນລະເມືອງລາວ ໃນການເລືອກເອົາບຸກຄົນທີ່ມີມາດຖານ, ເງື່ອນໄຂຄົບຖ້ວນ ເຂົ້າໃນສະພາແຫ່ງຊາດ ແລະສະພາປະຊາຊົນຂັ້ນແຂວງ ເພື່ອເປັນຕົວແທນປະຕິບັດສິດ, ອໍານາດຂອງປະຊາຊົນລາວບັນດາເຜົ່າ.
ການເລືອກຕັ້ງຄັ້ງນີ້ ແມ່ນມີຄວາມໝາຍສໍາຄັນຍິ່ງເພາະເປັນການສືບຕໍ່ສ້າງ ແລະບູລະນະລັດປະຊາທິປະໄຕປະຊາຊົນໃຫ້ມີຄວາມໜັກແໜ້ນ ແລະເຂັ້ມແຂງ, ທັງເປັນພາກສ່ວນໜຶ່ງໃນການບູລະນະປັບປຸງກົງຈັກການຈັດຕັ້ງ ແລະບຸກຄະລາກອນຂອງລະບົບການເມືອງຢູ່ຂັ້ນສູນກາງ ແລະທ້ອງຖິ່ນ, ເປັນການເລືອກເຟັ້ນສັບຊ້ອນ ແລະບັນຈຸພະນັກງານສະມາຊິກພັກເຂົ້າຮັບຜິດຊອບວຽກງານຕ່າງໆ ແນໃສ່ເຮັດໃຫ້ການຈັດຕັ້ງທຸກຂັ້ນໃນລະບົບການເມືອງຂອງລັດປະຊາທິ ປະໄຕປະຊາຊົນມີຄວາມເຂັ້ມແຂງ, ໜັກແໜ້ນ, ສາມາດປະຕິບັດໜ້າທີ່ການເມືອງໃນໄລຍະໃໝ່ຢ່າງມີປະສິດທິພາບ ແລະປະສິດທິຜົນ.

ເຂດເລືອກຕັ້ງທີ 16 ແຂວງເຊກອງມີຜູ້ລົງສະໝັກຮັບເລືອກຕັ້ງເປັນສະມາຊິກສະພາແຫ່ງຊາດ (ສສຊ) ຊຸດທີ IX ຈໍານວນ 9 ທ່ານ,ຍິງ 3 ທ່ານ,ເລືອກເອົາ 6 ທ່ານ ແລະມີຜູ້ລົງສະໝັກຮັບເລືອກຕັ້ງເປັນສະມາຊິກສະພາປະຊາຊົນແຂວງ (ສສຂ) ຊຸດທີ II ຈໍານວນ 30 ທ່ານ,ຍິງ 8 ທ່ານ,ເລືອກເອົາ 21 ທ່ານ ໃນນີ້ເມືອງລະມາມມີຜູ້ສະໝັກ 7 ທ່ານ, ເລືອກເອົາ 5 ທ່ານ; ເມືອງທ່າແຕງມີຜູ້ສະໝັກ 7 ທ່ານ, ເລືອກເອົາ 5 ທ່ານ; ເມືອງດາກຈຶງມີຜູ້ສະໝັກ 7 ທ່ານ, ເລືອກເອົາ 5 ທ່ານ ແລະເມືອງກະລຶມມີຜູ້ສະໝັກ 9 ທ່ານ, ເລືອກເອົາ 6 ທ່ານ ໂດຍທົ່ວແຂວງເຊກອງ ມີໜ່ວຍປ່ອນບັດທັງໝົດ 99 ໜ່ວຍ, ມີຫີບບັດທັງໝົດ 206 ໜ່ວຍ, ຖົງປ່ອນບັດເຄື່ອນທີ່ 200 ຖົງ ແລະມີຜູ້ມີສິດປ່ອນບັດທັງໝົດ 69.784 ຄົນ,ຍິງ 35.007 ຄົນ, ໃນນີ້ ເຂດເລືອກຕັ້ງເມືອງລະມາມ ມີຜູ້ມີສິດທັງໝົດ 23.107 ຄົນ,ຍິງ 11.687 ຄົນ; ເມືອງທ່າແຕງ 24.786 ຄົນ,ຍິງ 12.537 ຄົນ; ເມືອງກະລຶມ 8.913 ຄົນ, ຍິງ 4.327 ຄົນ ແລະເມືອງດາກຈຶງ 12.978 ຄົນ, ຍິງ 6.456 ຄົນ.

ການເລືອກຕັ້ງ ສສຊ ແລະ ສສຂ ໃນມື້ວັນທີ 21 ກຸມພາ 2021 ແມ່ນເຫດການທາງດ້ານການເມືອງສໍາຄັນ ເຊິ່ງດໍາເນີນໃນບັນຍາກາດທີ່ທົ່ວປະເທດຊາດ ສືບຕໍ່ໄດ້ຮັບການພັດທະນາຢ່າງຮອບດ້ານ ແລະຕໍ່ເນື່ອງຕະຫຼອດໄລຍະ 30 ກວ່າປີແຫ່ງການປ່ຽນແປງໃໝ່ຮອບດ້ານທີ່ມີຫຼັກການຂອງພັກ ແລະດໍາເນີນໃນບັນຍາກາດແຫ່ງຜົນສໍາເລັດກອງປະຊຸມໃຫຍ່ 3 ຂັ້ນຄື: ກອງປະຊຸມໃຫຍ່ຄັ້ງທີ XI ຂອງພັກ, ກອງປະຊຸມໃຫຍ່ຄັ້ງທີ X ຂອງອົງຄະນະພັກແຂວງ ກໍຄືຜົນສໍາເລັດການພັດທະນາເສດຖະກິດ-ສັງຄົມ 5 ປີຄັ້ງທີ VIII (2016-2020). ແຕ່ພວກເຮົາກໍຍັງປະເຊີນໜ້າກັບສິ່ງທ້າທາຍ ແລະຂໍ້ຫຍຸ້ງຍາກຫຼາຍປະການ ໂດຍສະເພາະແມ່ນການພັດທະນາເສດຖະກິດ-ສັງຄົມໃນປີ 2020 ຜ່ານມາ ກໍຄືປະຈຸບັນໄດ້ຮັບຜົນກະທົບຈາກການລະບາດຂອງພະຍາດໂຄວິດ-19, ມີຄວາມຫຍຸ້ງຍາກທາງດ້ານເສດຖະກິດການເງິນ ອັນເນື່ອງມາຈາກສະພາບຖົດຖອຍຂອງເສດຖະກິດຢູ່ພາກພື້ນ ແລະໃນໂລກ, ບັນດາອິດທິກໍາລັງປໍລະປັກ ຍັງສືບຕໍ່ມ້າງເພທໍາລາຍລະບອບຂອງພວກເຮົາຢ່າງບໍ່ລົດລະ.
ສະນັ້ນ ຄະນະພັກ-ຄະນະນໍາແຂວງເຊກອງ ຈຶ່ງຮຽກຮ້ອງມາຍັງສະມາຊິກພັກ, ພະນັກງານ-ລັດຖະກອນ, ທະ ຫານ-ຕໍາຫຼວດ ຕະຫຼອດຮອດປະຊາຊົນບັນດາເຜົ່າທຸກຊັ້ນຄົນທົ່ວແຂວງ ຈົ່ງໄດ້ເພີ່ມທະວີຄວາມສາມັກຄີເປັນປຶກແຜ່ນ ແໜ້ນໜາ, ສູ້ຊົນຜ່ານຜ່າຂໍ້ຫຍຸ້ງຍາກຕ່າງໆ ເພື່ອພ້ອມກັນສືບຕໍ່ປົກປັກຮັກສາ, ສ້າງສາ ແລະພັດທະນາປະເທດຊາດ ກໍຄືແຂວງເຊກອງ ໃຫ້ກ້າວຂຶ້ນສູ່ສັງຄົມນິຍົມຕາມແນວທາງຂອງພັກ.