ທ່ານ ດວງ​ມະນີ ພັນທະ​ວິຈິດ ປັດຈຸບັນ ອາຍຸ​ 38 ປີ, ຢູ່​ບ້ານ​ສຸກ​ຈະ​ເລີ​ນ ​ເມືອງ​ຜາ​ອຸດົມ ແຂວງ​ບໍ່​ແກ້ວ ສະມາຊິກ​ໃນ​ຄອບຄົວມີ 4 ຄົນ ຍິງ 3 ຄົນ ຜູ້ອອກແຮງ​ງານ​ຕົວຈິງ ​2 ຄົນ ລາຍ​ຮັບ​ຫຼັກ​ຂອງ​ຄອບຄົວ ​ແມ່ນ​ໄດ້​ມາ​ຈາກ​ການ​ຄ້າຂາຍ​ເຄື່ອງ​ຍ່ອຍ ຈຶ່ງ​ເຮັດ​ໃຫ້ຊີ​ວິດການ​ເປັນ​ຢູ່​ຂອງ​ຄອບຄົວ​ເວລາ​ນັ້ນ​ ​ພົບ​ຄວາມ​ຫຍຸ້ງຍາກຂາດ​ເຂີນ​ສົມ​ຄວນ ​ເພາະວ່າມີ​​​ລາຍ​ຮັບ​ໜ້ອຍ​ແຕ່ລາຍ​ຈ່າຍຫຼາຍ ​ພໍ​ແຕ່​ແກ້​ໄຂ​ຊີ​ວິດ​ການ​ເປັນ​ຢູ່​ປະຈຳ​ວັນ​ ​ຈາກ​ນັ້ນ, ໄດ້​ມີ​ໂຄງການ​ຟື້ນຟູຊີວິດ​ການ​ເປັນ​ຢູ່ໃຫ້ແກ່ປະຊາຊົນ ຜູ້​ຖືກ​ຜົນ​ກະທົບ​ຈາກ​ໂຄງການ​ສ້າງ​ເຂື່ອນ​ໄຟຟ້າ​ນ້ຳຕົກ​ນ້ຳທາ 1 (ເອຊ​​ເຊບ SSAFE) ​ໄດ້​ສະໜອງ​ທຶນ​ໃຫ້​ໂດຍ​ເປັນ​ທຶນ​ໝູນວຽນ ​ ​ແລະ ໄດ້​ສົ່ງ​ພະ​ນັກ​ງານ​ວິ​ຊາ​ການ​ລົງມາ​ໃກ້ຊິດຕິດ​ແທດ, ແນະນຳ​ຈັດ​ຝຶກ​ອົບຮົມ​​ເຕັກນິກ​ວິທີ​ການ​ປູກຝັງ-ລ້ຽງສັດ, ການ​ບົວລະບັດ​ຮັກສາ, ​ເຕັກນິກ​ການ​ຜະລິດ​ຫົວກ້ອນເບົ້າ​ເຊື້ອ​ເຫັດ, ບວກ​ກັບ​ຄວາມ​ມັກ​ຮັກ​ໃນ​​ດ້ານ​ນີ້​ແດ່ ຈຶ່ງ​ໄດ້​ຕັດສິນ​ໃຈ​ເຂົ້າ​ຮ່ວມ​ນຳ​ໂຄງ​ການ​ດັ່ງ​ກ່າວ ແລະ ກໍເຮັດຕາມ​ເງື່ອນ​ໄຂ​ທີ່​ຕົນ​ເອງ​ສາມາດ​ເຮັດ​​ໄດ້ ນັ້ນຄື: ການ​​ເຮັດ​ກ້ອນ​ເບົ້າປູກ​ເຫັດຂາຍ ​ເລີ່​ມ​ແຕ່​ປີ 2016 ​ເປັນຕົ້ນມາ,ໃນ​ເບື້ອງຕົ້ນ​ແມ່ນ​ໄດ້​​ໄປ​ຊື້​ແນວ​ພັນ​ມາ​ແຕ່​ນະຄອນຫຼວງ​ວຽງ​ຈັນ ຕົ້ນທຶນ​ໃນ​ການ​ເຮັດ​ກ້ອນ​ເຊື້ອ​ເຫັດ 500.000 ກີບ ສຳລັບ​ອຸປະກອນການ​ຜະລິດ ​ແມ່ນ ບໍລິສັດ​ ເອສເຊບ ສະໜອງ​ໃຫ້ ແລະ ກໍໄດ້​ເລີ່ມ​​ຜະລິດກ້ອນເບົ້າ​ຫົວ​ເຊື້ອ​ເອງ ​ ໂດຍ​ໄດ້​ສ້າງ​ເຮືອນຕູບ​ວາງຖົງກ້ອນເບົ້າເຫັດ​ 2 ຫຼັງ, ປັດຈຸບັນ​ເຮັດກ້ອນ​ເບົ້າ​ເຫັດໄດ້​ 3.000 ກ້ອນ​ຕໍ່​ຫຼັງ ການ​ເກັບ​ເຫັດ​ແມ່ນ​ໄດ້​ເກັບ​ຕະຫຼອດ​ຈົນ​ກວ່າ​ຈະໝົດ​ເຊື້ອ (ປະມານ 6 ເດືອນ), ການ​ບົວລະບັດ​ຮັກສາ​ບໍ່​ຍາກ​ປານ​ໃດ ມີ​ແຕ່​​ໃຫ້​ຖົງ​ກ້ອນ​ເບົ້າ​ເຫັ​ດຢູ່​ໃນອາກາດຊຸ່ມ​ຊຶື່ນ ​ແລະ ໄດ້​ທຳ​ຄວາມ​ສະອາດ ດ້ວຍ​ການ​ນຳ​ໃຊ້​ປູນ​ຂາວ​ມາ​ຂ້າ​ເຊື້​ອ, ​ເວລາ​ຫົດ​ນ້ຳ ​ແມ່ນ​ບໍ່​ໃຫ້​ນ້ຳຖືກ​ປາກ​ຖົງກ້ອນ​ເບົ້າ ​ເພາະ​ວ່າ ​ກ້ອນ​ເບົ້າເຫັດ​ຈະ​ເກີດ​ເຊື້ອ​ລາ ​ເຮັດ​ໃຫ້​ເຫັດ​ເປື່ອຍ​ເນົ່າ.

ພາຍ​ຫຼັງ​ທີ່​ເຫັດ​ອອກດອກ ຄັ້ງທໍາ​ອິດ​ທີ່​ໄດ້​ເກັບຜົນຜະລິດຫຼັງ​ໜຶ່ງ​ປະມານ 10-20 ​ກວ່າ​ກິໂລ, ເຫັດ​ຈະ​ອ​ອກດອກ​ໃຫ້ເກັບໄປທຸກໆມື້, ການ​ຂາຍແມ່ນ​ກິ​ໂລ​ລະ 20.000 ກີບ ​ໂດຍ​ແມ່ນ​ທາງ​ໂຄງການ​ເອສ​ເຊບ​ ເປັນ​ເຈົ້າ​ການ​​ນຳພາ​ໄປ​ຂາຍ​ທີ່​ຕະຫຼາດ​ເມືອງ​ຜາ​ອຸ​ດົມ ​ແລະ ບາງ​ຄັ້ງ​ກໍ​ມີລູກ​ຄ້າ​​ມາ​ຊື້​ເອົາ​ຢູ່​ກັບ​ເຮືອນ ສະ​ເພາະ​ເກັບ​ຂາຍ​ຢູ່​ກັບ​ເຮືອນ​ແມ່ນມື້​ໜຶ່ງ​ 2-3 ກິ​ໂລ, ​ເດືອນ​ໜຶ່ງ​ໄດ້​ເງິນປະມານ 2 ລ້ານກີບ ຖື​ໄດ້​ວ່າ​ເປັນ​ການ​ສ້າງ​ລາຍ​ຮັບ​ເຂົ້າຄອບ​ຄົວດີກວ່າເກົ່າຫຼາຍ​ ຊຶ່ງຈາກ​ແຕ່ກ່ອນ​ຄອບ​ຄົວ​ບໍ່​ມີ​ລາຍ​ຮັບຫຼາຍ​ແຕ່​ລາຍ​ຈ່າຍ​ພັດຫຼາຍ ແຕ່​ມາ​ຮອດ​ປັດຈຸ​ບັນ​ນີ້​ປີ​ໜຶ່ງ​ສະ​ເລ່ຍ​ລາຍ​ຮັບ​ເຂົ້າ​ຄອບ​ຄົວ​ທີ່​ຖື​ໄດ້​ວ່າ​ເປັນ​ປົກ​ກະ​ຕິ​ແມ່ນ 12 ລ້ານກີບ​. ທ່ານ ດວງມະນີ ພັນທະວິຈິດ ຍັງ​ໄດ້​ກ່າວ​ເນັ້ນຕື່ມ​ອີກ​ວ່າ: ການ​ປູກ​ເຫັດ​ຂາຍ ​ແມ່ນ​ທາງ​ເລືອກ​ທີ່​ດີ ສຳລັບ​ຊາວ​ກະສິກອນ ​ຍ້ອນ​ວ່າຄວາມ​ຕ້ອງການ​ຂອງ​ຕະຫຼາດ​ສູງ ຂໍ້​ດີ​ຂອງ​ການ​ປູກ​ເຫັດ ​ແມ່ນ​ສາມາດ​ເກັບ​ຜົນ​ຜະລິດ​ໄດ້​ທຸກໆ​ມື້ ນັບ​ຕັ້ງ​ແຕ່​ຫັນ​ມາ​ປູກ​ເຫັດ​ຂາຍ​ເປັນ​ສິນຄ້າ ຊີ​ວິດ​ການ​ເປັນ​ຢູ່​ຂອງ​ຄອບຄົວ​ມີການ​ພັດທະນາ​ດີ​ຂຶ້ນ​ເລື້ອຍໆ ມີ​ເຮືອນຢູ່​ຖາວອນ 1 ຫຼັງ ມີ​ເຄື່ອງ​ໃຊ້​ໃນ​ຄົວ​ເຮືອນ​ຄົບ​ຊຸດ ​ແລະ ມີ​ທຶນ​ການ​ສຶກສາ​ໃຫ້​ລູກ ສຳລັບ​ທິດ​ທາງ​ແຜນການ​ໃນ​ຕໍ່ໜ້າ ​ແມ່ນ​ຈະ​ຂະຫຍາຍ​ຕູບ​ປູກ​ເຫັດ​ຕື່ມ​ອີກ, ຈະ​ຜະລິດ​ກ້ອນ​ຫົວ​ເຊື້ອ​ເຫັດ​ຂາຍ ​ແລະ ຈະ​​ຂາຍຜົນ​ຜະລິດ​ດັ່ງກ່າວດ້ວຍ​ວິ​ທີ​ການ​ແບບ​ໃໝ່​ເຊັ່ນການ​ໂຄສະນາ​ລົງ​ທາງ​​ສື່ອອນ​ລາຍ​ຕື່ມ​ອີກ.

ທ່ານ ຊຽງ​ເພັງ ຈິດ​ດາ​ວົງ ກຳມະການ​ພັກ​ເມືອງ ​ເລຂາ​ຄະນະ​ພັກ​ຮາກ​ຖານ​ກຸ່ມ​ຈັດ​ສັນ​ຫາດ​ມວກ ​ໄດ້​ຢັ້ງຢືນ​ວ່າ: ​ຄອບຄົວ​ຂອງ​ທ່ານ ດວງມະນີ ພັນທະວິຈິດ ​ແມ່ນ​ຄອບຄົວ​ໜຶ່ງ​ທີ່​ມີ​ຄວາມ​ດຸ​ໝັ່ນ ອົດທົນ, ຊື່ສັດ, ສະມາຊິກ​ໃນ​ຄອບຄົວ​ມີ​ຄວາມ​ສາມັກຄີ, ​ເປັນ​ຄອບຄົວ​ທີ່​ເຮັດ​ແທ້​ທຳ​ຈິງ ​ຊຶ່ງບັນຫາ​ສຳຄັນ ​ແມ່ນມີ​ຄວາມ​ກ້າ​ຫັນປ່ຽນ​ແນວ​ຄິດ, ຫັນປ່ຽນ​ແບບ​ວິທີ​ການ​ຜະລິດ​ຈາກ​ຄອງ​ເດີມ ​ໄປ​ສູ່​ການ​ຜະລິດ​ທີ່ມີ​ປະສິດທິ​ຜົນ, ສົມ​ແລ້ວ​ທີ່​ເປັນ​ແວ່ນ​ແຍງ ​ໃຫ້​ແກ່​ປະຊາຊົນ ບ້ານກໍ​ຄື​ຊາວ​ກະສິກອນ​ຂອງ​ເມືອງ​ຜາ​ອຸດົມ ດ້ວຍ​ຄວາມ​ບາກ​ບັ່ນ, ອົດທົນ ນຳ​ໃຊ້​ທ່າ​ແຮງ​ຂອງ​ຕົນ​ທີ່​ມີມາ​ພັດທະນາ​ຄອບຄົວ ຂ້າພະ​ເຈົ້າມີ​ຄວາມ​ເຊື່ອ​ໝັ້ນວ່າ ຈະ​ບໍ່​ຢຸດ​ພຽງ​ສໍ່າ​ນີ້ ອາດ​ຈະ​ພັດທະນາ​ເສດຖະກິດ​ຄອບຄົວກ້າວ​ຂຶ້ນ​ໄປ​ເລື້ອຍໆ ຈົນ​ກາຍ​ເປັນ​ຄອບຄົວ​ທີ່​ອຸດົມ ສົມບູນ ​ແລະ ຮັ່ງມີ.

Medialaos MMD (ປຫຼ່ງຂໍ້ມູນຈາກ: ໜັງສືພິມປະຊາຊົນ)