ທ່ານ ນາງ ບົວຈັນ ຫອມປັນຍາ ນາຍບ້ານສະພານທອງໃຕ້ ເມືອງສີສັດຕະນາກ ນະຄອນຫຼວງວຽງ ຈັນ ໄດ້ໃຫ້ສຳພາດຕໍ່ນັກຂ່າວ ໜັງສືພິມປະຊາຊົນ ເມື່ອວັນທີ 21 ກຸມພານີ້ວ່າ: ການເລືອກຕັ້ງເອົາສະມາຊິກ ສະພາແຫ່ງຊາດ (ສສຊ) ຊຸດທີ IX ແລະ ສະມາຊິກສະພາປະຊາຊົນນະຄອນຫຼວງ ຊຸດທີ II, ຕົນເອງ ມີຄວາມຮູ້ສຶກພາກພູມໃຈ ແລະ ເປັນກຽດທີ່ໄດ້ອອກມາໃຊ້ສິດປະ​ຊາ​ທິ​ປະ​ໄຕປ່ອນບັດເລືອກຕັ້ງໃນຄັ້ງນີ້, ຕາມຄວາມຄາດຫວັງແມ່ນຢາກໄດ້ຜູ້ແທນທີ່ມີຄວາມຮູ້-ຄວາມສາມາດ ແລະ ເປັນຕົວແທນທີ່ດີສາມາດນຳເອົາ​ຂໍ້​ຂ້ອງ​ໃຈ ຂອງປະຊາຊົນນໍາສະເໜີຕໍ່ສະພາເພື່ອພິຈາລະນາແກ້ໄຂ ສິ່ງສຳຄັນຢາກໃຫ້ຜູ້ແທນແກ້ໄຂບັນຫາ ການພັດທະນາພື້ນຖານໂຄງລ່າງ ແລະ ປະກົດການຫຍໍ້ທໍ້ຕ່າງໆໃນສັງຄົມ ເປັນຜູ້ເຮັດແທ້ທຳຈິງປະຕິບັດ ໜ້າທີ່ໃຫ້ສົມກັບເປັນຕົວແທນແຫ່ງສິດຜົນປະໂຫຍດອັນຊອບທຳຂອງປະຊາຊົນລາວບັນດາເຜົ່າ, ເອົາໃຈໃສ່ໃນການຄົ້ນຄວ້າພິຈາລະນາຮັບຮອງ ແລະ ແກ້ໄຂບັນຫາທີ່ສຳຄັນຂອງຊາດ ເພື່ອນໍາພາໃຫ້ປະເທດ ຊາດໄດ້ຮັບການພັດທະນາ.

ທ່ານ ສີທັດ ພາໄຊສິດທິດາ ອະດີດພະນັກງານບຳນານກົມປ່າໄມ້ ປະຊາຊົນບ້ານສະພານທອງໃຕ້ ໃນໄວ 82 ປີ, ທ່ານເປັນຜູ້ໜຶ່ງທີ່ເຫັນຄວາມສຳຄັນໃນການໃຊ້ສິດປະຊາທິປະໄຕໃນການໄປປ່ອນ ບັດເລືອກຕັ້ງເອົາຜູ້ແທນຊຸດນີ້, ທ່ານຄິດສະເໝີວ່າ 1 ສິດ 1 ສຽງມີຄວາມໝາຍເຖິງສັງຂານບໍ່ໃຫ້ ແຕ່ໃຈຍັງຢາກໄປໃຊ້ສິດຂອງຕົນໃນການປ່ອນບັດເລືອກຕັ້ງເອົາຜູ້ແທນ ໂດຍສະເພາະເອົາຜູ້ມີຄວາມຮູ້-ຄວາມສາມາດໄປປະຕິບັດໜ້າທີ່ເປັນຕົວແທນຂອງປະຊາຊົນໃນສະພາ.

ມື້ນີ້, ເລີຍກຽມຈິດກຽມໃຈຕື່ນແຕ່ເຊົ້າ ເພື່ອມາເລືອກຕັ້ງເອົາຜູ້ແທນຕາມການຊີ້ນຳຂອງຂັ້ນເທິງໃຫ້ບັນລຸໄດ້ 300% ໂດຍສະເພາະເລືອກເອົາຜູ້ແທນ ປະກອບໄປດ້ວຍ 3 ຮຸ່ນຄື: ເລືອກເອົາຮຸ່ນອາວຸໂສ, ຮຸ່ນກາງ ແລະ ຮຸ່ນໜຸ່ມ ພິເສດປະຕິບັດໃຫ້ໄດ້ບົດບາດ ຍິງ-ຊາຍ, ໃຫ້ເລືອກເອົາເພດຍິງ ແລະ ຊົນເຜົ່າເຂົ້າຮ່ວມໃນການປະຕິບັດໜ້າທີ່ປົກປ້ອງສິດຜົນປະໂຫຍດ ໃຫ້ແກ່ປະຊາຊົນ ເພື່ອນໍາພາປະເທດຊາດກ້າວສູ່ຄວາມຈະເລີນຮຸ່ງເຮືອງ.

Medialaos MMD (ແຫຼ່ງຂໍ້ມູນຈາກ: ໜັງສືພິມປະຊາຊົນ)