ເມື່ອເວົ້າເຖີງບຸກຄົນທີ່ຍາມໃດເວລາໃດກໍ່ນັບຖືການຈັດຕັ້ງເປັນຫຼັກ, ມີທັດສະນະໃນການອອກແຮງງານທີ່ດີຢູ່ຕະຫຼອດເວລາ, ມີຄວາມດຸໝັ່ນຂະຫຍັນພຽນ, ມີຄວາມສູ້ຊົນ, ມີຄວາມບຸກບືນຫ້າວຫັນໃນການເຮັດວຽກວິຊາສະເພາະຂອງຕົນໃຫ້ສຳເລັດ ແລະ ຊອກຫາລາຍຮັບເຂົ້າສູ່ຕົນເອງ ສະຫາຍ ຮ້ອຍໂທ ມອງຕາ ທອນນຸລາດ ໜ້າທີ່ຮັບຜິດຊອບຮອງໝວດ II ກອງຮ້ອຍທີ I ກອງພັນ 227 (ສື່ສານ) ທີ່ຂຶ້ນກັບກອງພົນທີ 4 ກໍ່ນັບໄດ້ວ່າເປັນບຸກຄົນໜຶ່ງທີ່ເປັນທີ່ຍອມຮັບຂອງໝູ່ເພື່ອນ, ການຈັດຕັ້ງວ່າເປັນບຸກຄົນທີ່ເດັ່ນກວ່າຄົນອື່ນມາຕະຫຼອດ.

ສະຫາຍ ຮ້ອຍໂທ ມອງຕາ ທອນນຸລາດ ອາຍຸ 32 ປີເປັນລູກຫຼານຊາວ ບ້ານນາຮັງນ້ອຍ ເມືອງອາດສະພອນ ແຂວງສະຫວັນນະເຂດ ພາຍຫຼັງທີ່ຈົບ ມໍ6 ໃນປີ 2006-2007 ຍ້ອນເຫັນໄດ້ເຖິງແນວທາງອັນສະຫຼາດສ່ອງໃສຂອງພັກ ຢາກປະກອບສ່ວນເຂົ້າຮັບໃຊ້ຊາດຮັບໃຊ້ກອງທັບ ສະຫາຍ ຈຶ່ງຕັດສິນໃຈສະໝັກເຂົ້າເປັນທະຫານອາຊີບໃນປີ 2008 ພາຍຫຼັງຈົບອົບຮົມໄລຍະສັ້ນ 3 ເດືອນ ໄດ້ຖືກສັບຊ້ອນມາຢູ່ກອງກອງພັນ 227 (ສື່ສານ) ສະຫາຍ ໄດ້ເອົາໃຈໃສຕັ້ງໜ້າເຝິກຝົນຫຼໍ່ຫຼອມຕົນເອງໃນທຸກດ້ານ, ມີຄວາມດຸໝັ່ນວ່ອງໄວບໍ່ເລືອກວຽກ, ໜັກເອົາເບົາສູ້, ແລະ ເວລາໃດກໍ່ມີສະຕິກຽມພ້ອມສູ້ລົບຕະຫຼອດໃນການປະຕິບັນຄຳສັ່ງຂອງຜູ້ບັນຊາ, ປະຕິບັດລະບອບກຽມພ້ອມສູ້ຮົບຂອງກົມກອງໂດຍສະເພາະປະຕິບັດຂໍ້ກຳນົດ 7 ລະບອບ 18 ວຽກໃນມື້ໜຶ່ງຂອງກອງທັບວາງອອກຢ່າງເຂັ້ມງວດ ແລະ ໄດ້ຮັບຄວາມໄວ້ເນື້ອເຊື່ອໃຈຈາກຄະນະພັກ-ຄະນະບັນຊາກົມກອງຈຶ່ງນຳສະເໜີເພື່ອຄົ້ນຄວ້ານຳສະເໜີສົ່ງສະຫາຍໄປຮຽນນາຍທະຫານໃນປີ 2011-2014 ຢູ່ທີ່ໂຮງຮຽນສື່ສານ 205 ນະຄອນຫຼວງ ພາຍຫຼັງຈົບຫຼັກສູດ 3 ປີ ສະຫາຍໄດ້ກັບຄືນມາເຮັດໜ້າທີ່ຢູ່ກົມກອງ. ຈາກຜົນງານອັນດີເດັ່ນຂອງສະຫາຍ ຄະນະພັກ-ຄະນະບັນຊາກອງພັນ 227 (ສື່ສານ) ຈຶ່ງໄດ້ມອບໝາຍໜ້າທີ່ໃຫ້ສະຫາຍຮັບຜິດຊອບ ຮອງໝວດ II ກອງຮ້ອຍທີ I ກອງພັນ 227 (ສື່ສານ) ທີ່ຂຶ້ນກັບກອງພົນທີ 4 ທີ່ເປັນໜ້າທີ່ໜຶ່ງທີ່ສະຫາຍມີຄວາມພາກພູມໃຈເປັນຢ່າງຍິ່ງ ແລະ ໄດ້ປະຕິບັດຕາມສິດໜ້າທີ່ຂອງຕົນຮັບຜິດຊອບທີ່ຄະນະພັກ-ຄະນະບັນຊາມອບໝາຍໃຫ້ດ້ວຍຄວາມຮັບຜິດຊອບສູງ. ນອກຈາກຈະເດັ່ນດ້ານໜ້າທີ່ຮັບຜິດຊອບ ແລະ ວິຊາສະເພາະຂອງຕົນແລ້ວ, ຍັງເປັນຜູ້ທີ່ຢືນຢູ່ແຖວໜ້າເປັນແບບຢ່າງໃຫ້ໃນການເພີ່ມພູນຜະລິດຜົນທາງດ້ານການປູກ-ການລ້ຽງ ທີ່ກົມໃຫຍ່ພາລາທິການວ່າງອອກ ດັ່ງຄຳຂວັນທີ່ວ່າ ເພິ່ງຕົນເອງ ກຸ້ມຕົນເອງ ແລະ ສ້າງຄວາມເຂັ້ມແຂງດ້ວຍຕົນເອງ ເຊິ່ງສະແດງອອກໃນໄລຍະຜ່ານມາ ສະຫາຍໄດ້ປູກຜັກຊະນິດລົ້ມລຸກທົ່ວໄປໃນພື້ນທີ່ 15X5 ແມັດ ສາມາດສົ່ງຂາຍເຂົ້າເຮືອນຄົວລວມ ແລະ ຂາຍໃຫ້ແມ່ຄ້າ ສະເລ່ຍ 2.000.000 ກີບຕໍ່ປີ, ລ້ຽງເປັດ 40 ໂຕ ແລະ ໄກ່ 60 ໂຕ ຂາຍໄດ້ 4.100.000ກີບຕໍ່ປີ, ລ້ຽງປາດຸກພັນໃສ່ທໍ່ປູນຊີມິນ 2 ບໍ ຂະໜາດທໍ່ 200 ຊັງຕີແມັດ ແຕ່ລະທໍ່ໄດ້ປ່ອຍປາໃສ່ 100-200 ໂຕ ແລະ ອ່າງຊີມັງ ຂະໜາດ 5X5 ແມັດ ປ່ອຍປາໃສ່ 500-600 ໂຕ ສະເລ່ຍແລ້ວໃນປີໜຶ່ງເອົາປາຂຶ້ນຂາຍໄດ້ 3 ຊຸດ, ຊຸດໜຶ່ງບໍ່ຫຼຸດ100 ກິໂລ ລວມໃນໜຶ່ງປີສາມາດຂາຍປາດຸກທັງໝົດໄດ້ 300 ກິໂລ ຄິດເປັນເງິນ 7.500.000 ກີບ, ນອກຈາກນັ້ນ ສະຫາຍ ຍັງໄດ້ບິແບ່ງເວລາວ່າງ ຍັງໄດ້ຊອກແຫຼ່ງລາຍຮັບເພີ່ມອີກດ້ວຍການ ສານແຫຂາຍໃນໜຶ່ງປີສະເລ່ຍໄດ້ 6 ຜືນຕໍ່ປີ ຜືນໜຶ່ງຂາຍໃນລາຄາ 350.000 ພັນກີບຕໍ່ຜືນລວມມູນຄ່າທັັງໝົດເປັນເງິນ 2.100.000 ກີບຕໍ່ປີ ລວມມູນຄ່າຈາກການປູກ-ການລ້ຽງ ແລະ ຊອກຫາແຫຼ່ງລາຍຮັບຕ່າງໆ 15.750.000 ກີບຕໍ່ປີ, ເງິນຈຳນວນດັ່ງກ່າວ ສະຫາຍ ຮ້ອຍໂທ ມອງຕາ ທອນນຸລາດ ໄດ້ແບ່ງອອກເປັນ 3 ສ່ວນ ສ່ວນໜຶ່ງແມ່ນຝາກໃຫ້ພໍ່ແມ່ຢູ່ທາງບ້ານເພື່ອແບ່ງເບົາພາລະຄອບຄົວ, ສ່ວນໜຶ່ງໝູນໃຊ້ເປັນທຶນຮອນປະກອບສ່ວນເຂົ້າໃນການປູກ-ການລ້ຽງ ແລະ ອີກສ່ວນໜຶ່ງຝາກທະນາຄານ ນອກນັ້ນສະຫາຍຍັງໄດ້ຊື້ລົດຈັກໄດ້ 1 ຄັນ, ຊື້ນດິນໄດ້ 1 ຕອນ ເພື່ອເປັນບ່ອນປຸກສ້າງ ແລະ ປູກຝັກ-ລ້ຽງສັດໃນຕໍ່ໜ້າ.

ສະຫາຍ ພັນຕີ ສີມອນ ວົງພະຈັນ ວົງະຈັນ ຄະນະພັກກອງພັນ ຮອງຫົວໜ້າການທະຫານກອງພັນ 227 (ສື່ສານ) ໃຫ້ຮູ້ວ່າ: ສະຫາຍ ຮ້ອຍໂທ ມອງຕາ ທອນນຸລາດ ໜ້າທີ່ຮັບຜິດຊອບຮອງໝວດ II ກອງຮ້ອຍທີ I ກອງພັນ 227 (ສື່ສານ) ແມ່ນອີກພະນັກງານຜູ້ໜຶ່ງຍາມໃດເວລາໃດກໍ່ມີສະຕິຕໍ່ການຈັດຕັ້ງ, ມີທັດສະນະໃນການອອກແຮງງານທີ່ດີຢູ່ຕະຫຼອດເວລາ ນອກຈາກເຮັດສຳເລັດໜ້າທີ່ວິຊາສະເພາະຂອງຕົນຮັບຜິດຊອບແລ້ວ ສະຫາຍ ຍັງໄດ້ບຸກບືນຫ້າວຫັນໃນການເຮັດວຽກວິຊາສະເພາະຂອງຕົນໃຫ້ສຳເລັດ ແລະ ຊອກຫາລາຍຮັບເຂົ້າສູ່ຕົນເອງ ໂດຍການໝູນໃຊ້ເວລາວ່າງໃຫ້ເກີດປະໂຫຍດສູງສຸດດ້ວຍການປູກ-ການລ້ຽງເປັນອາຊີບເສີມ ໂດຍບໍ່ເອື້ອອີງໃສ່ເເຕ່ເງິນເດືອນດ້ານດຽວ ສະນັ້ນ ຄະນະພັກ-ຄະນະບັນຊາກອງພັນ227 (ສື່ສານ) ກໍ່ຄືຄະນະກອງຮ້ອຍ ຈຶ່ງຍົກໃຫ້ເປັນອີກບຸກຄົນໜຶ່ງທີ່ເປັນເເບບຢ່າງນຳໜ້າ ແລະ ເປັນບຸກຄົນທີ່ເດັ່ນກວ່າຄົນອື່ນມາຕະຫຼອດ ແລະ ສ້າງເປັນພະນັກງານສືບທອດຂອງກົມກອງໃນສະເພາະໜ້າ.