ໃນຕອນເຊົ້າຂອງວັນທີ 24 ກຸມພາ 2021 ນີ້ຢູ່ສູນເທັກໂນໂລຊີສື່ສານຂໍ້ມູນຂ່າວສານ ( ICT) ທີ່ຂຶ້ນກັບພະແນກສຶກສາທິການ ແລະ ກິລາແຂວງຄໍາມ່ວນໄດ້ຈັດພິທີສອບເສັງຄັດເລືອກເອົານັກຮຽນເກັ່ງຂັ້ນແຂວງສາຍສາມັນສຶກສາ ( ປ5,ມ4,ມ7 ) ໂດຍການເຂົ້າຮ່ວມເປັນປະທານ ແລະ ເປີດຊອງຫົວບົດສອບເສັງຂອງທ່ານ ນັນຕະໄຊ ອິນທະສອນ ຫົວໜ້າພະແນກສຶກສາທິການ ແລະ ກິລາແຂວງ , ມີບັນດາທ່ານໃນຄະນະພະແນກ ,ຕາງໜ້າຫ້ອງການສຶກສາທິການ ແລະ ກິລາ 10 ຕົວເມືອງ, ຜູ້ອໍານວຍການໂຮງຮຽນ,ຕະຫອດພະນັກງານຄູ-ອາຈານ ,ຜູ້ປົກຄອງ ແລະ ນ້ອງນັກຮຽນທີ່ຜ່ານການສອບເສັງໃນຂັ້ນເມືອງຂອງຕົນເຂົ້າຮ່ວມ.

ໃນການສອບເສັງຄັດເລືອກເອົານັກຮຽນເກັ່ງສາຍສາມັນສຶກສາ ( ປ5,ມ4 ແລະມ7 ) ລວມມີ 10 ຕົວເມືອງໃນທົ່ວແຂວງ . ໃນນີ້ມີໂຮງຮຽນປະຖົມເຂົ້າຮ່ວມສອບເສັງຄັດເລືອກທັງໝົດ 23 ແຫ່ງ, ໂຮງຮຽນມັດທະຍົມໄດ້ເຂົ້າຮ່ວມການສອບເສັງຄັດເລືອກມີ 40 ແຫ່ງ ( ມັດທະຍົມຕອນປາຍ 30 ແຫ່ງ , ມັດທະຍົມສົມບູນ 28 ແຫ່ງ , ມັດທະຍົມຕອນຕົ້ນ 09 ແຫ່ງ ) , ມີນັກສອບເສັງທັງໝົດ 123 ຄົນ , ຍິງ 43 ຄົນ, ໃນນັ້ນຊັ້ນປະຖົມສຶກສາ ( ປ5 ) ມີຈໍານວນນັກສອບທັງໝົດ 32 ຄົນ , ຍິງ 09 ຄົນ , ຊັ້ນມັດທະຍົມສຶກສາມີຈໍານວນນັກສອບທັງໝົດ 91 ຄົນ,ຍິງ 34 ຄົນ ( ຂັ້ນມ 4 ຈໍານວນ 46 ຄົນ,ຍິງ 11 ຄົນ ແລະ ຂັ້ນມ 7ຈໍານວນ 45 ຄົນ,ຍິງ 23 ຄົນເຊິ່ງໃນນັ້ນໄດ້ແບ່ງອອກເປັນ 04 ຫ້ອງສອບເສັງຄື : ຊັ້ນປະຖົມສຶກສາ ( ປ5 ) ມີຈໍານວນ 01 ຫ້ອງສອບເສັງ ແລະ ຊັ້ນມັດທະຍົມສຶກສາ ( ຂັ້ນມ4 ແລະ ຂັ້ນມ7 ) ແບ່ງອອກເປັນ 03 ຫ້ອງສອບ.

ສໍາລັບຊັ້ນປະຖົມສຶກສາ ( ປ5 ) ວິຊາທີ່ນໍາມາສອບເສັງລວມມີ 03 ວິຊາຄື : ພາສາລາວ , ຄະນິດສາດ ແລະ ໂລກອ້ອມຕົວເຮົາໂດຍໃຊ້ເວລາສອບເສັງ 90 ນາທີ ; ຊັ້ນມັດທະຍົມສຶກສາ ( ມ4 ແລະ ມ7 ) ວິຊາທີ່ນໍາມາສອບເສັງລວມມີ 05 ວິຊາຄື : ພາສາລາວ – ວັນນະຄະດີ , ຄະນິດສາດ , ເຄມີສາດ, ຟີຊິກສາດ ແລະ ພາສາອັງກິດໂດຍໃຊ້ເວລາສອບເສັງ 120 ນາທີ . ນອກຈາກການສອບເສັງບັນດາວິຊາທີ່ໄດ້ກ່າວມາແລ້ວໃນພາກບ່າຍຂອງມື້ນີ້ຍັງໄດ້ຈັດກິດຈະກໍາຖາມ-ຕອບວິທະຍາສາດເຊິ່ງເຂົ້າຮ່ວມແຂ່ງຂັນທັງໝົດ 11 ທີມ . ສ່ວນວ່າຜົນຂອງການສອບເສັງໃນແຕ່ລະວິຊາຂອງແຕ່ລະຊັ້ນ,ແຕ່ລະຂັ້ນຈະເປັນແນວໃດນັ້ນທີມງານຂ່າວຂອງພວກເຮົາຈະໄດ້ລາຍງານໃຫ້ຮູ້ຕື່ມໃນຊ່ວງພາກແລງຂອງມື້ນີ້ເຊິ່ງເປັນການສະຫຼຸບຜົນການສອບເສັງ ແລະ ມອບລາງວັນໃຫ້ແກ່ນັກຮຽນແຕ່ລະລາຍວິຊາ. ພາບ-ຂ່າວ: ແດງສະຫວັດ