ວັນທີ 24 ກຸມພາ 2021 ຜ່ານມານີ້ ສະພາບໍລິຫານທຸລະກິດລັດວິສາຫະກິດນໍ້າປະປາ ແຂວງອັດຕະປື ໄດ້ສະຫຼຸບການດຳເນີນທຸລະກິດ ປີ 2020 ແລະ ຜ່ານທິດທາງແຜນການ ປີ 2021 ຂື້ນທີ່ຫ້ອງປະຊຸມພະແນກໂຍທາທິການ ແລະ ຂົນສົ່ງແຂວງ ພາຍໃຕ້ການເປັນປະທານຂອງ ທ່ານ ທະນູໄຊ ບັນຊາລິດ ຮອງເຈົ້າແຂວງອັດຕະປື ປະທານສະພາບໍລິຫານລັດວິສາຫະກິດນໍ້າປະປາແຂວງ ມີຄະນະສະພາບໍລິຫານ ພະແນກການອ້ອມຂ້າງແຂວງ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ .


ທ່ານ ແກ້ວວິຊຽນ ສີຊານົນ ອຳນວຍການລັດວິສາຫະກິດນໍ້າປະປາ ແຂວງອັດຕະປື ໄດ້ຜ່ານບົດສະຫຼຸບວຽກງານການດຳເນີນເຄື່ອນໄຫວທຸລະກິດ ປີ 2020 ພ້ອມຜ່ານແຜນການປີ 2021 ເຊິ່ງປະຈຸບັນລັດວິສາຫະກິດນໍ້າປະປາແຂວງອັດຕະປື ມີການບໍລິການເປັນລະບົບນໍ້າປະປາ ມີ 2 ເມືອງ ຄື: ເມືອງສາມັກຄີໄຊ ມີ 12 ບ້ານ ແລະ ພະແນກການອ້ອມຂ້າງແຂວງ,ເມືອງໄຊເສດຖາ ມີ 7 ບ້ານ ແລະ ຫ້ອງການອ້ອມຂ້າງເມືອງ, ໃນປິ 2020 ຜະລິດນໍ້າໄດ້ 5 ແສນ 77.900 ກວ່າແມັດກ້ອນ, ຈຳໜ່າຍນໍ້າໄດ້ 4 ແສນ 64.173 ແມັດກ້ອນ, ນໍ້າສູນເສຍ ມີ 1 ແສນ 13.734 ແມັດກ້ອນ, ທົ່ວແຂວງມີຄົວເຮືອນທົ່ວໄປຊົມໃຊ້ໜໍ້ແທກນໍ້າທັງໝົດ ມີ 4.146 ໜ່ວຍ, ປີ 2020 ລາຍຮັບ ມີ 2 ຕື້ກວ່າກີບ, ໃນນີ້ລາຍຮັບຈາກການຂາຍນໍ້າ ມີ 2 ຕື້ກີບ ນອກນີ້ຍັງມີລາຍຮັບຈາກການຜະລິດສໍາຮອງອີກຈໍານວນໜຶ່ງ ນອກນັ້ນຍັງມີໜີ້ຕ້ອງຮັບທັງໝົດ ມີ 3 ຕື້ 9 ຮ້ອຍກວ່າລ້ານກີບ ເຊິ່ງສ່ວນໃຫຍ່ແລ້ວແມ່ນໜີ້ ຄ່ານໍ້າ ແລະ ຄ່ານໍ້າ ແລະ ໜີ້ຄ່າບູລະນະກົງເຕີ້,ສ່ວນໜີ້ຕ້ອງສົ່ງມີທັງໝົດ 9 ຕື້ 700 ລ້ານກວ່າກີບ,ເຊິ່ງປະກອບມີ ໜີ້ຕ້ອງສົ່ງໄລຍະຍາວ 6 ຕື້ກວ່າກີບ ໜີ້ຕ້ອງສົ່ງໃນທຸລະກິດມີ 2 ຕື້ກວ່າກີບ ແລະ ໜີ້ຕ້ອງສົ່ງງົບປະມານ ມີ 1 ຕື້ກວ່າກີບ.
ໃນກອງປະຊຸມຜູ້ເຂົ້າຮ່ວມໄດ້ຄົ້ນຄ້ວາປະກອບຄຳເຫັນບາງບັນຫາຍັງຄົງຄ້າງ ການເກັບລາຍຮັບ, ລາຍຈ່າຍ, ການຈົດນໍ້າ, ການເກັບເງີນບໍ່ທັນສອດຄ່ອງເທົ່າທີ່ຄວນ ເພື່ອເຮັດໃຫ້ການດໍາເນີນທຸລະກິດຂອງສະພາບໍລິຫານທຸລະກິດລັດວິສາຫະກິດນໍ້າປະປາ ແຂວງອັດຕະປື ໃນປີ 2021 ນີ້ໄດ້ຮັບການຈັດຕັ້ງປະຕິບັດຢ່າງມີປະສິດທິຜົນສູງ.
ຂ່າວ: ວັດທະນາ