ມິເດຍລາວ ແຂວງໄຊສົມບູນ ຂ່າວ: ຈິນລະວອນ ວໍລະສົມບູນ ກອງປະຊຸມ ສະຫຼຸບຖອດຖອນບົດຮຽນການຈັດຕັ້ງປະຕິບັດວຽກງານ ບາດກ້າວທີ 3 ແລະ ແຜນການບາດກ້າວທີ 4 ຂອງຄະນະກຳມະການເລືອກຕັ້ງ ຂັ້ນແຂວງໄຊສົມບູນ ໄດ້ຈັດຂຶ້ນໃນຕອນເຊົ້າຂອງວັນທີ 26 ກຸມພາ 2021 ນີ້ ທີ່ຫ້ອງປະຊຸມຫ້ອງວ່າການ ແຂວງ ໂດຍການເປັນປະທານຂອງທ່ານ ພົຕ ຄຳລຽງ ອຸທະໄກສອນ, ເຈົ້າແຂວງໄຊສົມບູນ, ປະທານຄະນະກຳມະການເລືອກຕັ້ງ ຂັ້ນແຂວງ, ມີທ່ານ ບຸນສຸກ ຈອມວິສານ, ປະທານສະພາປະຊາຊົນ ແຂວງ, ຮອງຄະນະກຳມະການເລືອກຕັ້ງ ຂັ້ນແຂວງ ພ້ອມດ້ວຍຄະນະກຳມະການເລືອກຕັ້ງ ຂັ້ນແຂວງ, ຂັ້ນເມືອງ ແລະ ພາກສ່ວນກ່ຽວຂ້ອງ ເຂົ້າຮ່ວມ.
ກອງປະຊຸມ ຄັ້ງນີ້ ຜູ້ເຂົ້າຮ່ວມໄດ້ຮັບຟັງການຜ່ານບົດສະຫຼຸບ-ຕີລາຄາ ການຈັດຕັ້ງປະຕິບັດວຽກງານ ບາດກ້າວທີ 3 ແລະ ແຜນການບາດກ້າວທີ 4 ຂອງຄະນະກຳມະການເລືອກຕັ້ງ ຂັ້ນແຂວງ ຈາກທ່ານ ຄຳແດງ ສີລາວົງ, ຮອງປະທານສະພາປະຊາຊົນ ແຂວງ, ຮອງຄະນະກຳມະການເລືອກຕັ້ງ ຂັ້ນແຂວງໄຊສົມບູນ ຊຶ່ງພາຍຫຼັງໄດ້ຮັບນິຕິກຳຈາກຄະນະກຳມະການເລືອກຕັ້ງ ລະດັບຊາດ, ຄະນະປະຈຳການ-ຄະນະກຳມະການເລືອກຕັ້ງລະດັບຊາດ ທັງໝົດ 54 ສະບັບ ຈາກນັ້ນ ຄະນະກຳມະການເລືອກຕັ້ງຂັ້ນແຂວງ ໄດ້ຫັນມາເປັນນິຕິກຳ ຂອງຕົນຢ່າງລະອຽດ ໃນການຈັດຕັ້ງປະຕິບັດ ໂດຍໄດ້ເຄື່ອນໄຫວໂຄສະນາ ແລະ ປຸກລະດົມຂະບວນການ ໃນທົ່ວແຂວງ ເປັນຕົ້ນ ຂະບວນການອອກແຮງງານ, ການແຂ່ງຂັນກິລາ, ສິລະປະ-ວັນນະຄະດີ, ປະດັບປະດາ, ຕິດປ້າຍຄຳຂວັນ, ອອກຂ່າວທາງໂທລະໂຄ່ງ, ວິທະຍຸ-ໂທລະພາບ, ໜັງສືພິມ ແລະ ຂະບວນການອື່ນໆ ຢ່າງກວ້າງຂວາງ.

ຈາກນັ້ນ ຜູ້ສະໝັກເລືອກຕັ້ງສະມາຊິກສະພາແຫ່ງຊາດ ແລະ ສະມາຊິກສະພາປະຊາຊົນ ແຂວງ ໄດ້ມີການເຄື່ອນໄຫວລົງໂຄສະນາຫາສຽງຕາມຈຸດຕ່າງໆ ຈົນສຳເລັດ ພ້ອມທັງປ່ອນບັດເລືອກຕັ້ງຢ່າງເປັນທາງການ ໃນວັນທີ 21 ກຸມພາ 2021 ແລະ ສຳເລັດການປ່ອນບັດເລືອກຕັ້ງໃນມື້ດຽວກັນ. ໃນນັ້ນ ຈຳນວນຜູ້ສະໝັກເລືອກຕັ້ງ ສະມາຊິກສະພາແຫ່ງຊາດ ຊຸດທີ IX ປະຈຳເຂດເລືອກຕັ້ງທີ 18 ແຂວງໄຊສົມບູນ ມີທັງໝົດ 9 ທ່ານ, ຍິງ 1 ທ່ານ, ມາຈາກສູນກາງ 2 ທ່ານ ແລະ ຜູ້ທີ່ໄດ້ຮັບເລືອກຕັ້ງເປັນສະມາຊິກສະພາແຫ່ງຊາດ ປະຈຳເຂດເລືອກຕັ້ງທີ 18 ແຂວງໄຊສົມບູນ ມີຈຳນວນ 8 ທ່ານ, ຍິງ 1 ທ່ານ. ສຳລັບຜູ້ສະໝັກເລືອກຕັ້ງສະມາຊິກສະພາປະຊາຊົນ ຂັ້ນແຂວງ ຊຸດທີ II ມີ 31 ທ່ານ, ຍິງ 8 ທ່ານ ຊຶ່ງຜູ້ທີ່ໄດ້ຮັບເລືອກຕັ້ງ ເປັນສະມາຊິກສະພາປະຊາຊົນ ຂັ້ນແຂວງໄຊສົມບູນ ມີຈຳນວນ 21 ທ່ານ ໃນນັ້ນ ຍິງ 8 ທ່ານ. ໂອກາດດຽວກັນນີ້ ຜູ້ເຂົ້າຮ່ວມໄດ້ຜັດປ່ຽນກັນປະກອບຄຳຄິດ-ຄຳເຫັນ ໃສ່ເນື້ອໃນຮ່າງບົດສະຫຼຸບ ຢ່າງກົງໄປກົງມາ ດ້ວຍຄວາມຮັບຜິດຊອບສູງ ທັງນີ້ ກໍເພື່ອພ້ອມກັນຕີລາຄາຢ່າງພາວະວິໄສ ຕໍ່ຈຸດດີ, ຈຸດອ່ອນ, ຂໍ້ສະດວກ, ຂໍ້ຫຍຸ້ງຍາກ ເພື່ອສະຫຼຸບຖອດຖອນບົດຮຽນຊຶ່ງກັນ ແລະ ກັນ ແນໃສ່ວາງທິດທາງແຜນການຈັດຕັ້ງປະຕິບັດບັ້ນເລືອກຕັ້ງໃນຕໍ່ໜ້າ ໃຫ້ລະອຽດຮັດກຸມ ແລະ ມີປະສິດທິພາບດີຂຶ້ນກວ່າເກົ່າ. ກອງປະຊຸມ ຄັ້ງນີ້ ຍັງເປັນການຄົ້ນຄວ້າ ແລະ ປຶກສາຫາລື ເພື່ອກະກຽມຄວາມພ້ອມໃຫ້ແກ່ກອງປະຊຸມ ຄັ້ງປະຖົມມະລືກ ທີ່ຈະໄດ້ໄຂຂຶ້ນໃນມໍ່ໆ ນີ້ ໃຫ້ມີຄວາມພ້ອມຮອບດ້ານ.