ມິເດຍລາວ ແຂວງສາລະວັນ ໂດຍ: ກິນດາວັນ ອ້ວນນາຄູ. ໃນວັນທີ 26 ກຸມພາ 2021 ທ່ານ ປອ ໂພໄຊ ໄຊຍະສອນ ເລຂາພັກ-ເຈົ້າແຂວງໆສາລະວັນ , ທ່ານ ຈັນສີລອນ ສີສົມບູນ ເຈົ້າເມືອງໆສາລະວັນ ພ້ອມດ້ວຍຄະນະ ໄດ້ລົງເຄື່ອນໄຫວ, ຢ້ຽມຢາມບໍລິສັດ ຈຸງຢາອີຊີ ຊີມັງລາວຈໍາກັດຜູ້ດຽວ ໂດຍໃຫ້ກຽດຕ້ອນຮັບຂອງທ່ານ ສີ ປິ່ນສຽງ ຫົວໜ້າຫ້ອງການ ບໍລິຫານ ບໍລິສັດ ຈຸງຢາອີຊີ ຊີມັງລາວຈໍາກັດຜູ້ດຽວ (ໂຮງງານຊີມັງ). ໂອກາດດຽວກັນນີ້ ທ່ານ ເຈົ້າແຂວງສາລະວັນ ພ້ອມຄະນະ ກໍໄດ້ຮັບຟັງການລາຍງານຫຍໍ້ກ່ຽວກັບບໍລິສັດ ຈຸງຢາອີຊີ ຊີມັງລາວຈໍາກັດຜູ້ດຽວ ເຊິ່ງໄດ້ສ້າງຕັ້ງຂຶ້ນໃນປີ 2010, ມີພະນັກງານທັງໝົດ 398 ຄົນ, ໃນນັ້ນມີພະນັກງານຄົນຈີນທັງໝົດ 72 ຄົນ, ພະນັກງານຄົນລາວ 326 ຄົນ, ພະນັກງານຍິງ 49 ຄົນ, ໃນປີຜ່ານມາທາງບໍລິສັດສາມາດຂຸດຖ່ານຫີນໄດ້ 180,000 ໂຕນ, ຂຸດຄົ້ນຫີນປູນ 490,000 ໂຕນ, ດິນໜຽວ 36,600 ກວ່າໂຕນ, ຜະລິດປູນຂຽວໄດ້ 108,000 ກວ່າໂຕນ, ປູນແດງ 180,000 ກວ່າໂຕນ, ປະຈຸບັນທາງບໍລິສັດມີຊັບສິນຄົງທີ່ 200 ລ້ານໂດລາສະຫະລັດ.

ຈາກນັ້ນ ທ່ານ ສັກດາ ແກ້ວດວງສີ ຮັກສາການ ຫົວໜ້າພະແນກ ຊັບພະຍາກອນທໍາມະຊາດ ແລະ ສິ່ງແວດລ້ອມ ກໍໄດ້ລາຍງານສະພາບຜົນກະທົບຕໍ່ສິ່ງແວດລ້ອມ ທີ່ເກີດຈາກໂຮງງານຊີມັງ ສາລະວັນ ມີຢູ່ 4 ບັນໃຫຍ່ຄື: ໃນລະດູຝົນ ມີນໍ້າເສຍໄຫຼອອກຈາກໂຮງງານ ລົງສູ່ດິນປະຊາຊົນທີ່ຢູ່ໃກ້ຄຽງ, ໃນລະດູແລ້ງ ມີຝຸ່ນລະອອງທີ່ເກີດຈາກຂະບວນການຜະລິດຊີມັງ ແລະ ການຂົນສົ່ງວັດຖຸດິບປ້ອນໂຮງງານ, ຊຶ່ງມີຢູ່ 2 ຈຸດ ຄື: ຈຸດໂຮງງານຊີມັງ ແລະ ຈຸດຂຸດຄົ້ນດິນແດງ ບ້ານຂະເໜົາ ເມືອງວາປີ, ການສັ່ນສະເທືອນ ທີ່ເກີດຈາກການລະເບີດຫີນ ຢູ່ເຂດບ້ານປາກປຸ໋ຍ ແລະ ບ້ານໜອງບົວ ເມືອງສາລະວັນ, ຕໍ່ກັບການສັ່ນສະເທືອນ ທີ່ເກີດຈາກຂະບວນການລະເບີດຫີນ ຢູ່ບ້ານປາກປຸ໋ຍ ແລະ ບ້ານໜອງບົວ ເມືອງສາລະວັນ ແມ່ນປະຕິບັດຕາມບົດບັນທຶກ ສະບັບລົງວັນທີ 16 ທັນວາ 2020 ລະຫວ່າງ ກອງບັນຊາການທະຫານແຂວງ ສາລະວັນ ກັບ ໂຮງງານຊີມັງ, ຊຶ່ງເນື້ອໃນບົດບັນທຶກໄດ້ລະບຸໄວ້ໃນຂໍ້ທີ 2 ວ່າ: ການລະເບີດຫີນແຕ່ລະວັນ ແມ່ນອະນຸຍາດໃຫ້ລະເບີດແຕ່ເວລາ 17-19 ໂມງ, ແຕ່ຕ້ອງແຈ້ງໃຫ້ທຸກພາກສ່ວນທີ່ກ່ຽວຂ້ອງ ແລະ ພໍ່ແມ່ປະຊາຊົນທີ່ຢູ່ໃກ້ຄຽງຮັບຊາບລ່ວງໜ້າ 2-3 ວັນ ເພື່ອເຮັດໃຫ້ສັງຄົມມີຄວາມເປັນລະບຽບຮຽບຮ້ອຍ, ຮັບປະກັນຄວາມປອດໄພ ແລະ ບໍ່ໃຫ້ສັງຄົມແຕກຕື່ນ ບັນຫາທັງໝົດ ທີ່ກ່າວມາຂ້າງນັ້ນ ແມ່ນພະແນກຊັບພະຍາກອນທຳມະຊາດ ແລະ ສິ່ງແວດລ້ອມ ໄດ້ຮັບການສະເໜີຈາກປະຊາຊົນທີ່ຢູ່ໃກ້ຄຽງບໍລິເວນດັ່ງກ່າວ ຊ່ວຍແກ້ໄຂ ພ້ອມທັງໄດ້ສົມທົບກັບພາກສ່ວນທີ່ກ່ຽວຂ້ອງ ແລະ ເຈົ້າຂອງໂຮງງານຊີມັງ ແກ້ໄຂບັນຫາທີ່ເກີດຂື້ນໃນແຕ່ລະຄັ້ງ.


ຕໍ່ກັບບັນຫາດັ່ງກ່າວ ທ່ານ ເຈົ້າແຂວງສາລະວັນ ກໍໄດ້ຮຽກຮ້ອງໃຫ້ທາງບໍລິສັດຕ້ອງໄດ້ປະຕິບັດລະບຽບຫຼັກການ ເຖິງຢ່າງໃດກໍຕາມເພື່ອເຮັດໃຫ້ການດໍາເນີນທຸລະກິດຖືກຕ້ອງ ສອດຄ່ອງ ທັງເຮັດໃຫ້ມີສະມັດຕະພາບໃນການຜະລິດແຕ່ລະປີໄດ້ມີການປັບປຸງ, ມີການຮັບປະກັນໄປຕາມຈັ່ງຫວະການຂະຫຍາຍຕົວຂອງເສດຖະກິດ ສໍາຄັນແມ່ນເນື້ອໃນບົດບັນທຶກທີ່ໄດ້ລົງນາມຮ່ວມກັນກັບອໍານາດການປົກຄອງ ແລະ ພໍ່ແມ່ປະຊາຊົນ ຕ່າງຝ່າຍຕ່າງໄດ້ຮັບຜົນປະໂຫຍດອັນຖືກຕ້ອງ, ທ່ານຍັງໄດ້ເນັ້ນໃຫ້ທາງບໍລິສັດຕ້ອງເອົາໃຈໃສ່ຕໍ່ສິ່ງແວດລ້ອມຢ່າງເປັນເຈົ້າການ ເພື່ອເຮັດໃຫ້ສະພາບແວດລ້ອມທີ່ໃກ້ຄຽງຮັກສາໄດ້ຄວາມອຸດົມສົມບູນ ແລະ ເປັນພື້ນທີ່ສີຂຽວ, ການຜະລິດ, ການຂົນສົ່ງ, ການລະເບີດບໍ່ຫີນຫຼືຂຸດຄົ້ນເຈາະຕ່າງໆ ຕ້ອງຮັບປະກັນຄວາມປອດໄພ, ຖືກຕ້ອງຕາມເຕັກນິກ, ມີການກວດກາຕິດຕາມຄວາມເປັນລະບຽບຮຽບຮ້ອຍ ພ້ອມທັງປະກອບສ່ວນເຂົ້າໃນການພັດທະນາດ້ານຕ່າງໆຂອງແຂວງ ແລະ ປະເທດຊາດ.