ມິເດຍລາວ ແຂວງເຊກອງ ຂ່າວ:ພຸດທະສອນ ໃນໂອກາດ ທີ່ທ່ານ ເຫຼັກໄຫຼ ສີວິໄລ ເລຂາພັກແຂວງ, ເຈົ້າແຂວງເຊກອງ ໄດ້ເຂົ້າຮ່ວມການເປັນປະທານພິທີປິດກອງປະຊຸມວຽກງານແຜນການ-ການລົງທຶນ ແລະການເງິນແຂວງ ໃນວັນທີ 26 ກຸມພາ ນີ້ ທ່ານໄດ້ໃຫ້ກຽດໂອ້ລົມໃຫ້ທິດຊີ້ນໍາຫຼາຍບັນຫາ ຕໍ່ບັນດາສະຫາຍພະນັກງານຫຼັກແຫຼ່ງ ຕະຫຼອດຮອດພະນັກງານວິຊາການທຸກຂະແໜງການ ຕ້ອງໄດ້ກຳແໜ້ນ ແລະເອົາໃຈໃສ່ບັນຫາສຳຄັນຕ່າງໆ ເປັນຕົ້ນຕ້ອງໄດ້ກຳແໜ້ນມະຕິກອງປະຊຸມໃຫ່ຍ ຄັ້ງທີ 10 ຂອງອົງຄະນະພັກແຂວງ ໂດຍສະເພາະຄາດໝາຍໃຫ່ຍທີ່ໄດ້ກຳນົດໄວ້ໃນມະຕິ ແລະແຜນພັດທະນາເສດຖະກິດ-ສັງຄົມ 5 ປີ ຄັ້ງທີ 9 (2021-2025) ສະເພາະຂອງແຂວງເຊກອງ.
ໃນນີ້ ກຳແໜ້ນອັນທີໜຶ່ງ ຄາດໝາຍໃຫຍ່ 2021-2025, ຄາດໝາຍ GDP ຂະຫຍາຍຕົວ 7% ລວມຍອດມູນຄ່າ GDP ໃຫ້ບັນລຸໄດ 2.821 ຕື້ກີບ, ສະເລ່ຍໃສ່ຫົວຄົນ 20,7 ລ້ານ ຫຼື ເທົ່າກັບ 2.300 ໂດລາ, ຄາດໝາຍການລົງທຶນລວມ 4.630 ຕື້ກີບ, ການເກັບລາຍຮັບເຂົ້າງົບປະມານແຫ່ງລັດ 480,78 ຕື້ກີບ, ການຄຸ້ມຄອງລາຍຈ່າຍງົບປະມານແຫ່ງລັດ 1.529,92 ຕື້ກີບ; ກໍາແໜ້ນອັນທີສອງ ປັບປຸງກົນໄກການຄຸ້ມຄອງແຜນການ-ການເງິນ ໄປສູ່ຄຸນນະພາບຢ່າງແທ້ຈິງ, ໃຫ້ທຸກຫົວໜ່ວຍງົບປະມານຂັ້ນແຂວງ-ຂັ້ນເມືອງ ກໍ່ຄືຫົວໜ່ວຍແຜນການ-ການເງິນຂັ້ນແຂວງ-ຂັ້ນເມືອງ ເປັນເຈົ້າການເຂັ້ມງວດ ໃນການປະຕິບັດວິໄນແຜນການ-ການເງິນ ແລະ ເຂົ້າໃຈແຈ້ງບັນຫາທີ່ເກີດຂຶ້ນ; ກໍາແໜ້ນອັນທີສາມ : ຕ້ອງກໍາແໜ້ນເນື້ອໃນ 6 ເປົ້າໝາຍ ແລະ 8 ແຜນງານບູລິມະສິດຂອງແຂວງທີ່ກໍານົດໄວ້.

ພ້ອມນີ້ ຕ້ອງເອົາໃຈໃສ່ວຽກງານສຶກສາອົບຮົມການເມືອງນຳພາແນວຄິດ ໃຫ້ແກ່ຖັນແຖວສະມາຊິກພັກ, ພະນັກງານ-ລັດຖະກອນ ພາຍໃນຂະແໜງແຜນການ-ການເງິນ ໃຫ້ເລິກເຊິ່ງເຖິງຖອງ ຕິດພັນກັບກາສຳຫຼວດກວດກາ ການດຳເນີນຊີວິດການເມືອງພາຍໃນພັກຂະແໜງການຕົນເປັນປົກກະຕິ ໃນແຕ່ລະເດືອນ; ຍົກສູງຄວາມເປັນແບບຢ່າງນຳໜ້າຂອງຄະນະພັກ-ຄະນະນຳແຕ່ລະຂັ້ນ ນັບແຕ່ຂັ້ນແຂວງ ລົງຮອດຂັ້ນເມືອງ ໃນການເຄື່ອນໄຫວປະຕິບັດໜ້າທີ່ວິຊາສະເພາະ ກໍຄືໜ້າທີ່ການເມືອງ ທີ່ພັກ-ລັດ ແລະ ປະຊາຊົນມອບໝາຍໃຫ້; ເອົາໃຈໃສ່ຄົ້ນຄ້ວາຮ່ຳຮຽນ, ມະຕິ, ຄຳສັ່ງຂອງພັກ-ລັດ ແຕ່ລະຂັ້ນ ກໍ່ຄືລະບຽບກົດໝາຍຂອງຂະແໜງການຕົນ ແລະ ຂະແໜງການທີ່ກ່ຽວຂ້ອງ ໃຫ້ຮັບຮູ້ເຂົ້າໃຈຢ່າງເລິກເຊິ່ງ ຕິດພັນກັບການຄົ້ນຄ້ວາຮ່ຳຮຽນວິຊາສະເພາະ ໃຫ້ເປັນລະບົບຕໍ່ເນື່ອງ ຕາມເງື່ອນໄຂຕົວຈິງຂອງແຕ່ລະຂະແໜງການ; ນັບທັງພາສາຕ່າງປະເທດ; ສືບຕໍ່ເອົາໃຈໃສ່ວຽກງານປັບພັກ, ສ້າງພັກ ໃຫ້ປອດໃສ, ເຂັ້ມແຂງ ແລະ ໜັກແໜ້ນ ໃນທຸກດ້ານ ຕິດພັນກັບການສ້າງພະນັກງານສືບທອດປ່ຽນແທນ ໃຫ້ໄດ້ທາງດ້ານປະລິມານ ແລະ ຄຸນນະພາບ; ເພີ່ມທະວີວຽກງານກວດກາພັກ-ລັດ ໃຫ້ເລິກເຊິ່ງໃນທຸກຂົງເຂດວຽກງານ, ຍົກສູງບົດບາດຂອງປະທານກວດກາຂອງໜ່ວຍພັກ, ຂະແໜງກວດກາລັດ ທີ່ສັງກັດໃນພະແນກການຕົນ ໃຫ້ສູງເດັ່ນຂຶ້ນ, ສິ່ງສຳຄັນ, ໃຫ້ສຸມໃສ່ແກ້ໄຂຜົນຂອງການກວດສອບ-ການກວດກາ ຕາມຜົນການກວດສອບ ໃຫ້ສຳເລັດເປັນກ້າວໆ.
ນອກນີ້ ຕ້ອງໄດ້ເອົາໃຈໃສ່ສືບຕໍ່ຄຸ້ມຄອງໂຄງການລົງທຶນທີ່ໄດ້ອະນຸມັດແລ້ວ ໃນໄລຍະຜ່ານມາ ໃຫ້ໄດ້ຮັບການຈັດຕັ້ງປະຕິບັດໃຫ້ສຳເລັດ, ທັງຮັບປະກັນໃຫ້ໄດ້ຄຸນະພາບ, ປັບປຸງຄະນະກຳມະການຄຸ້ມຄອງການລົງທຶນຂອງລັດ ໃຫ້ສຳເລັດໂດຍໄວ ເວົ້າສະເພາະບັນດາໂຄງການສືບຕໍ່ ທີ່ໄດ້ຮັບການຮັບຮອງຈາກສະພາແຫ່ງຊາດແລ້ວ ແລະ ສະພາປະຊາຊົນແຂວງ ໃນໄລຍະຜ່ານມາ; ສູ້ຊົນສຸດຂີດໃນການຈັດຕັ້ງປະຕິບັດ ການຈັດເກັບລາຍຮັບທີ່ມີຖານຂໍ້ມູນແລ້ວຢູ່ຂັ້ນແຂວງ-ຂັ້ນເມືອງໃຫ້ໄດ້ຄົບຖ້ວນ; ພ້ອມທັງ ຜັນຂະຫຍາຍ 8 ແຜນງານບຸລິມະສິດ ທີ່ແຂວງທີ່ກໍານົດໄວ້ ໃຫ້ປະກົດຜົນເປັນຈິງເທື່ອລະກ້າວ.