ວັນທີ 23 ກຸມພາ 2021 ຜ່ານມານີ້ ກອງບັນຊາການທະຫານເມຶອງຊຽງເງິນໄດ້ຈັດພິທີໄຂຊຸດອົບຮົມວຽກງານສຶກສາປ້ອງກັນຊາດ – ປ້ອງກັນຄວາມສະຫງົບ ໃຫ້ແກ່ໂຮງຮຽນ ມັດທະຍົມສົມບູນ ກິ່ວກະຈໍາ ເມືອງຊຽງເງີນ ຫຼວງພະບາງ ໂດຍການເປັນປະທານຂອງ ສະຫາຍ ພັນໂທ ຄໍາແພງ ອານຸສຸກ ຄະນະປະຈໍາພັກເມືອງ ຫົວໜ້າການທະຫານ ກອງບັນຊາການທະຫານເມືອງຊຽງເງີນ ເປັນກຽດເຂົ້າຮ່ວມຂອງ ທ່ານ ສົມບັດ ຄອນຈະເລີນ ຮອງຫົວໜ້າຫ້ອງການສຶກສາທິການ ແລະ ກິລາເມືອງ, ຄະນະອໍານວຍການໂຮງຮຽນ, ຄູອາຈານ, ຄູຝຶກ ແລະ ນ້ອງນັກຮຽນເຂົ້າຮ່ວມ.


ໃນພິທີສະຫາຍ ພັນຕີ ທອງຈັນ ຍອດທະສອນ ໄດ້ຂື້ນຜ່ານຂໍ້ຕົກລົງຂອງທ່ານເຈົ້າເມືອງຊຽງເງີນ ສະບັບເລກທີ 026/ຈມ.ມຊງ ວ່າດ້ວຍການອານຸມັດໃຫ້ກອງບັນຊາການທະຫານເມືອງຊຽງເງີນ. ເປີດຊຸດອົບຮົມການຮຽນ – ການສອນວິຊາສຶກສາປ້ອງກັນຊາດ ໃຫ້ແກ່ນ້ອງນັກຮຽນຊັ້ນມໍປາຍ, ມສ ກິ່ວກະຈໍາ, ປະຈໍາປີ 2021 ພ້ອມທັງຜ່ານແຜນອົບຮົມ ເຊິ່ງໃນນັ້ນແມ່ນຈະໄດ້ຮຽນກ່ຽວກັບມູນເຊື້ອຂອງກອງທັບ, ກົດໝາຍພັນທະປ້ອງກັນຊາດ, 7 ຈັງຫວະພື້ນຖານ, ບຸກຄົນເຄື່ອນຍ້າຍອາໃສພູມມີປະເທດ, ຮຽນມ້າງປະກອບປື່ນ AK, CKC, ຄວາມຮູ້ພື້ນຖານກ່ຽວກັບໝາກແຕກ F1, ຈັງຫວະ ແລະ ຫຼັກການໃນການຍິງບົດເປີດສາກ, ຄວາມຮູ້ພື້ນຖານກ່ຽວກັບການຄ້າມະນຸດ, ລະບຽບການສັນຈອນເພື່ອຄວາມປອດໄພ, ຊຸດອົບຮົມຄັ້ງນີ້ ມີນ້ອງນັກຮຽນເຂົ້າອົບຮົມທັງໝົດ 235 ນ້ອງ, ຍິງ 76 ນ້ອງ, ໃນນັ້ນມີຊັ້ນ ມໍ5 ເຖິງຊັ້ນ ມໍ7. ການອົບຮົມຈະດໍາເນີນໄປເປັນເວລາ 9 ວັນຈິ່ງອັດລົງ.


ຕອນທ້າຍຂອງພິທີສະຫາຍ ພັນໂທ ຄໍາແພງ ອານຸສຸກ ຍັງໄດ້ຮຽກຮ້ອງໃຫ້ນ້ອງນັກຮຽນແຕ່ລະຄົນເພີ່ມທະວີນ້ຳໃຈມະນະອົດທົນ ເອົາໃຈໃສ່ຕິດຕາມສຶກສາຮໍ່າຮຽນນໍາຄູ ອາຈານ, ກໍາແໜ້ນບັນດາທ່າຈັ່ງຫວະເພື່ອນໍາໄປໝູນໃຊ້ເຂົ້າໃນພາກປະຕິບັດຕົວຈິງໃຫ້ໄດ້ຮັບຜົນສູງ, ປະຕິບັດກົດລະບຽບການອົບຮົມໃຫ້ເຂັ້ມງວດ, ຕໍ່ກັບຄະນະຊີ້ນໍາ ແລະ ຄູອາຈານ ໃຫ້ເອົາໃຈໃສ່ ຕິດຕາມຄຸ້ມຄອງດ້ານຈໍານວນພົນໃນການຂື້ນຫ້ອງ – ລົງຫ້ອງຢ່າງໃກ້ສິດ, ເຮັດໃຫ້ບັ້ນອົບຮົມໃນຄັ້ງນີ້ດໍາເນີນໄປດ້ວຍຜົນສໍາເລັດຕາມລະດັບຄາດໝາຍ ແລະ ມີຄວາມປອດໄພ 100%.
ຂໍ້ມູນ: ບຸນມາ ແກ້ວວິເສດ ຮຽບຮຽງ: ສົມພອນ ສຸວັນທອນ