ມິເດຍລາວແຂວງສາລະວັນ ຂ່າວພາບ: ວິໄລວອນ ສິດທິໄຊ ເມືອງຄົງເຊໂດນ ແຂວງສາລະວັນ ໄດ້ເປີດບໍລິການກິດຈະກຳລ່ອງເຮືອຕາມແມ່ນ້ຳເຊໂດນ ເພື່ອເປັນການບໍລິການ ແລະສົ່ງເສີມທາງດ້ານການທ່ອງທ່ຽວ, ກິດຈະກຳດັ່ງກ່າວແມ່ນເປີດຂື້ນເປັນຄັ້ງທຳອິດ ແລະເປັນກິດຈະກຳຮູບແບບໃໝ່ຂອງເມືອງ, ໂດຍນໍາໃຊ້ເຮືອທັງໝົດ 7 ລໍາ ໂດຍນໍາໃຊ້ເຮືອປະຊາຊົນເຂດບ້ານດັ່ງກ່າວ ເປັນຜູ້ບໍລິການ ແລະ ເກັບຄ່າບໍລິການ, ທັງເປັນການໝູນໃຊ້ທ່າແຮງທີ່ມີໃຫ້ຕິດພັນກັບວິຖີຊີວິດຂອງເຂົາເຈົ້າ, ເພື່ອໃຫ້ນັກທ່ອງທ່ຽວໄປຈັບຈ່າຍຊື້-ຂາຍ ຜົນຜະລິດກະສິກຳ ແລະ ຜະລິດຕະພັນຕ່າງໆ. ການລອງເຮືອແມ່ນເລີ່ມຈາກຈຸດຂົວຂ້າມນ້ຳເຊໂດນ ບ້ານທ່າເມືອງ-ບ້ານໂອກາດໃຫຍ່ ເພື່ອຊົມສວນໝາກແຕງ ເຂດບ້ານຕານດ່ຽວ ທີ່ເປັນຈຸດໝາຍປາຍທາງ, ສຳຜັດບັນຍາກາດທຳມະຊາດ ລຽບຕາມແມ່ນ້ຳເຊໂດນ, ຕິດພັນກັບການຊົມວິຖີຊີວິດ ແລະ ຜະລິດຕະພັນພູມປັນຍາຊາວບ້ານ, ຜົນລະປູກຕ່າງໆ ເຊັ່ນ: ໝາກແຕງ, ໝາກຖົ່ວ, ສາລີ ແລະຜຶດພັກຕ່າງໆ.

ການທອງທ່ຽວລ່ອງເຮືອ ຄັ້ງນີ້ ໄດ້ເລີ່ມເປີດຂຶ້ນໃນວັນທີ 2 ມີນາ 2021, ຢູ່ທີ່ທ່ານ້ຳບ້ານທ່າເມືອງ ເມືອງຄົງເຊໂດນ, ເຂົ້າຮ່ວມໂດຍ ທ່ານ ສົມໃຈ ອຸ່ນຈິດ ຮອງເຈົ້າແຂວງໆສາລະວັນ ຜູ້ຊີ້ນຳວຽກງານວັດທະນະທຳ-ສັງຄົມ, ທ່ານ ແຫວນເພັດ ລັດດາວົງ ຫົວໜ້າຄະນະຈັດຕັ້ງແຂວງ, ທ່ານ ປອ ສະໄໝ ໂພທິສານ ເຈົ້າເມືອງໆຄົງເຊໂດນ ພ້ອມດ້ວຍການນຳຂັ້ນແຂວງ, ເມືອງ, ຜູ້ຕາງໜ້າອົງການປົກຄອງບ້ານ ຕະຫຼອດຮອດປະຊາຊົນ ເຂົ້າຮ່ວມ.