ກອງປະຊຸມສະຫຼຸບວຽກງານການປ້ອງກັນຄວາມປອດໄພ ໂຄງການກໍ່ສ້າງເສັ້ນທາງລາວ – ຈີນ ປະຈໍາປີ 2020 ແລະ ກໍານົດທິດທາງແຜນການປະຈໍາປີ 2021 ຂອງກົມສູ້ຮົບ, ກົມໃຫຍ່ເສນາທິການກອງທັບ ໄດ້ຈັດຂື້ນໃນຕອນເຊົ້າຂອງວັນທີ 3 ມີນາ 2021 ນີ້ ໂດຍການເປັນປະທານຂອງ ທ່ານ ພົນຕີ ສີດາລໍ່ ຈົ່ງເຕັງເຈຍຊ່າ ກໍາມະການຄະນະພັກກະຊວງ, ຮອງຫົວໜ້າກົມໃຫຍ່ເສນາທິການກອງທັບ ທັງເປັນຫົວໜ້າຄະນະຊີ້ນໍາໂຄງການກໍ່ສ້າງເສັ້ນທາງລົດໄຟລາວ-ຈີນ ມີຕາງໜ້າກົມສູ້ຮົບ, ກົມກວດກາ, ກົມປ້ອງກັນຄວາມສະຫງົບ, ມີຄະນະອານຸກໍາມະການຮັບຜິດຊອບປ້ອງກັນໂຄງການກໍ່ສ້າງເສັ້ນທາງລົດໄຟລາວ – ຈີນຈາກກອງພົນທີ I, ກອງບັນຊາການທະຫານນະຄອນຫຼວງວຽງຈັນ, ກອງບັນຊາການທະຫານແຂວງວຽງຈັນ, ກອງບັນຊາການທະຫານແຂວງຫຼວງພະບາງ, ກອງບັນຊາການທະຫານແຂວງອຸດົມໄຊ ແລະ ກອງບັນຊາການທະຫານແຂວງຫຼວງນໍ້າທາ ເຂົ້າຮ່ວມ.


ກອງປະຊຸມໄດ້ຮັບຟັງການຜ່ານບົດສະຫຼຸບຕີລາຄາ ການຈັດຕັ້ງເຄື່ອນໄຫວປ້ອງກັນກໍາລັງຫຼວງ ແລະ ກໍາລັງທ້ອງຖິ່ນ ເຊິ່ງ ສະຫາຍ ພັນເອກ ວົງມະນີຈັນ ສາມະວົງ ຮອງຫົວໜ້າກົມສູ້ຮົບ ໄດ້ກ່າວວ່າ: ໂຄງການກໍ່ສ້າງເສັ້ນທາງລົດໄຟລາວ – ຈີນ ເປັນເສັ້ນທາງແຫ່ງມິດຕະພາບ, ເປັນເສັ້ນທາງຕົວແບບ, ເປັນເສັ້ນທາງແຫ່ງຄວາມຂາວສະອາດ ແລະ ເປັນບູລິມະສິດຂອງລັດຖະບານລາວ – ຈີນ ໃຫ້ຄວາມສໍາຄັນ ເຊິ່ງນອນໃນຍຸດທະສາດ ໜຶ່ງແລວທາງ ໜຶ່ງເສັ້ນທາງ ໃນອາຊີຕາເວັນອອກ ເປັນໂຄງການລົງທຶນຂະໜາດໃຫຍ່ ຫຼາຍປະເທດໃນໂລກໃຫ້ຄວາມສົນໃຈ. ການປ້ອງກັນໃນຄັ້ງນີ້ແມ່ນໃນທາມກາງບັນຍາກາດທີ່ທົ່ວພັກ ທົ່ວກໍາລັງປະກອບອາວຸດ ແລະ ທົ່ວປວງຊົນລາວ ພວມຈັດຕັ້ງຜັນຂະຫຍາຍມະຕິກອງປະຊຸມໃຫຍ່ຄັ້ງທີ X ຂອງພັກ ເພື່ອສູ້ຊົນເຮັດໃຫ້ປະເທດຊາດຫຼຸດພົ້ນອອກຈາກສະຖານະດ້ອຍພັດທະນາໃນປີ 2020 ແລະ ເຮັດໃຫ້ປະເທດຊາດໄດ້ຮັບການພັດທະນາຢ່າງຮອບດ້ານຕໍ່ເນື່ອງ ໂດຍສະເພາະໃນຂົງເຂດວຽກງານປ້ອງກັນຊາດພວກເຮົາ ແມ່ນໄດ້ສຸມໃສ່ເຄື່ອນໄຫວຈັດຕັ້ງປະຕິບັດ 4 ໜ້າທີ່ໃຫຍ່ 26 ແຜນງານທີຄະນະພັກກະຊວງປ້ອງກັນປະເທດວາງອອກຢ່າງມີຜົນສໍາເລັດ ເຮັດໃຫ້ກອງທັບໄດ້ຮັບການປັບປຸງດີຂື້ນ ດ້ວຍບາດກ້າວທີ່ໜັກແໜ້ນ ສາມາດເຮັດສໍາເລັດໜ້າທີ່ປົກປັກຮັກສາຄວາມສະຫງົບ ແລະ ຄວາມເປັນລະບຽບຮຽບຮ້ອຍຂອງສັງຄົມ, ຮັບປະກັນໃຫ້ປະເທດຊາດມີສະຖຽນລະພາບທາງດ້ານການເມືອງ, ສ້າງໄດ້ຄວາມເຊື່ອໝັ້ນໄວ້ວາງໃຈຈາກພາກພື້ນ ແລະ ສາກົນ ເຮັດໃຫ້ນັກລົງທຶນຈາກຕ່າງປະເທດໄດ້ເຂົ້າມາລົງທຶນພາຍໃນປະເທດໃຫ້ນັບມື້ເພີ່ມຂື້ນ ປີ 2020 ຜ່ານມາຈຸດປ້ອງກັນມີທັງໝົດ 83 ຈຸດ ໃນນັ້ນ ກອງພົນທີ I ຮັບຜິດຊອບປ້ອງກັນ 10 ຈຸດ, ກອງບັນຊາການທະຫານນະຄອນຫຼວງວຽງຈັນ 6 ຈຸດ, ກອງບັນຊາການທະຫານແຂວງວຽງຈັນ 19 ຈຸດ, ກອງບັນຊາການທະຫານແຂວງຫຼວງພະບາງ 22 ຈຸດ, ກອງບັນຊາການທະຫານແຂວງອຸດົມໄຊ 21 ຈຸດ ແລະ ກອງບັນຊາການທະຫານແຂວງຫຼວງນໍ້າທາ 5 ຈຸດ. ບົດສະຫຼຸບຍັງໄດ້ຍົກໃຫ້ເຫັນສະພາບອັນພົ້ນເດັ່ນ ໂດຍສະເພາະແມ່ນສະພາບທີ່ກ່ຽວຂ້ອງວຽກງານປ້ອງກັນຊາດ – ປ້ອງກັນຄວາມສະຫງົບ, ສະພາບປະຊາຊົນ ແລະ ບັນຫາປະກົດການຫຍໍ້ທໍ້ຕື່ມອີກຈໍານວນໜຶ່ງ, ຂໍ້ສະດວກ – ຂໍ້ຫຍຸ້ງຍາກ, ດ້ານດີ – ດ້ານອ່ອນ ແລະ ບົດຮຽນທີ່ຖອດຖອນໄດ້. ໂອກາດນີ້ຜູ້ເຂົ້າຮ່ວມຍັງໄດ້ພ້ອມກັນຄົ້ນຄ້ວາການສໍາຫຼວດອອກແບບກໍ່ສ້າງ ເຮືອນຢູ່, ເຮືອນນອນ ແລະ ປ້ອມຍາມຢູ່ບັນດາຈຸດຕ່າງໆໃຫ້ມີຄວາມແໜ້ນໜາຖາວອນ ແລະ ທັນສະໄໝ, ພ້ອມທັງພັດປ່ຽນກັນຂື້ນປະກອບຄໍາຄິດຄໍາເຫັນ ໃສ່ບົດສະຫຼຸບໃຫ້ມີເນື້ອໃນຄົບຖ້ວນສົມບູນ ແລະ ເອກະພາບນໍາໄປຈັດຕັ້ງປະຕິບັດໃນທິດທາງຕໍ່ໜ້າໃຫ້ໄດ້ຮັບໝາກຜົນສູງຂື້ນລື່ນເກົ່າ.


ໂອກາດເຂົ້າຮ່ວມກອງປະຊຸມ ທ່ານ ພົນຕີ ສີດາລໍ່ ຈົ່ງເຕັງເຈຍຊ່າ ໄດ້ຮຽກຮ້ອງໃຫ້ຄະນະພັກ – ຄະນະບັນຊາໃນບັນດາຫົວໜ່ວຍກົມທັງກອງທັງກໍາລັງຫຼວງ ແລະ ກໍາລັງທ້ອງຖິ່ນ ຕ້ອງຈັດຕັ້ງກໍາລັງຫັນລົງກໍ່ສ້າງຮາກຖານການເມືອງ ປະຊາຊົນ ທີ່ຢູ່ລຽບຕາມເສັ້ນທາງລົດໄຟ ສົມທົບກັບອໍານາດການປົກຄອງບ້ານ ແລະ ເມືອງ ເຮັດວຽກງານສຶກສາອົບຮົມການເມືອງນໍາພາແນວຄິດໃຫ້ປະຊາຊົນບັນດາເຜົ່າ ຢ່າງຕໍ່ເນື່ອງລຽນຕິດ ເຮັດໃຫ້ເຂົາເຈົ້າຮັບຮູ້ເຊື່ອມຊຶມຕໍ່ແນວທາງແຜນນະໂຍບາຍປ່ຽນແປງໃໝ່ຂອງພັກ, ເປັນເຈົ້າການເສີມຂະຫຍາຍສິດເປັນເຈົ້າຂອງປະເທດຊາດ ປະກອບສ່ວນເຄື່ອນໄຫວເຮັດວຽກງານປ້ອງກັນຊາດ – ປ້ອງກັນຄວາມສະຫງົບຢ່າງຕັ້ງໜ້າ, ສືບຕໍ່ສຶກສາອົບຮົມການເມືອງນໍາພາແນວຄິດໃຫ້ພະນັກງານ – ນັກຮົບ ທີ່ປະຈໍາການຢູ່ບັນດາຈຸດຕ່າງໆ ໃຫ້ຮັບຮູ້ເຂົ້າໃຈຢ່າງເລິກເຊິ່ງເຖິງທອງ ແລະ ເຄື່ອນໄຫວຕາມພາລະບົດບາດ, ສິດ ແລະ ໜ້າທີຂອງຕົນຢ່າງເຂັ້ມງວດ, ລະຫວ່າງກໍາລັງປ້ອງກັນຊາດ – ປ້ອງກັນຄວາມສະຫງົບໃນແຕ່ລະຈຸດແມ່ນໃຫ້ປະສານງານກັນແໜ້ນ ເພື່ອພ້ອມກັນແກ້ໄຂບາງບັນຫາປະກົດການຫຍໍ້ທໍ້ທີ່ອາດຈະເກີດຂື້ນໃຫ້ທັນກັບສະພາບການຢ່າງຄອງຕົວ. ໂອກາດນີ້ ພິທີຍັງໄດ້ມອບພາຫະນະປະເພດລົດໃຫ້ບັນດາກົມກອງກໍາລັງທ້ອງຖິ່ນ ຈໍານວນ 5 ຄັນເພື່ອເຄື່ອນໄຫວເຮັດໜ້າທີ່ປ້ອງກັນຄວາມປອດໄພ ໃນໂຄງການກໍ່ສ້າງເສັ້ນທາງລົດໄຟລາວ – ຈີນໃຫ້ມີຄວາມສະດວກວອງໄວຂື້ນຕື່ມ.
ພາບ-ຂ່າວ: ສົມພອນ ສຸວັນທອນ.