ມິເດຍລາວແຂວງຄຳມ່ວນ ຂ່າວ: ເພັດສາຄອນ ສິມມະວົງ ວັນທີ 5 ມີນາ 2021 ທີ່ຫ້ອງປະຊຸມສະພາປະຊາຊົນ ເຂດເລືອກຕັ້ງທີ 6 ແຂວງຫຼວງພະບາງ ໄດ້ຈັດຖະແຫຼງຜົນການເລືອກຕັ້ງສະມາຊິກສະພາແຫ່ງຊາດ ຊຸດທີ IX ແລະສະມາຊິກສະພາປະຊາຊົນແຂວງຫຼວງພະບາງ ໂດຍໃຫ້ຄໍາຖະແຫຼງການຂອງທ່ານ ນາງ ວຽນວິໄລ ດີລະພັນ ຄະນະປະຈໍາສະພາປະຊາຊົນແຂວງ, ຮອງປະທານສະພາ ປະຊາຊົນແຂວງ ທັງເປັນອານຸກໍາມະການເລຂານຸການ ປະຈໍາສະພາປະຊາຊົນແຂວງຫຼວງພະບາງ.ໂດຍມີບັນດາສື່ມວນຊົນຈາກວິທະຍຸ,ໂທລະພາບ ແລະ ໜັງສືພິມ ພ້ອມດ້ວຍ ສື່ມວນຊົນຊາວໜຸ່ມແຂວງ,ສະຫະພັນແມ່ຍິງ,ກໍາມະບານ,ໂຄສະນາອົບຮົມແຂວງ,ທະຫານ ຕໍາຫຼວດ ແລະ ສື່ມວນຊົນປະຈໍາສະພາແຂວງຫຼວງພະບາງ ເຂົ້າຮ່ວມ.
ທ່ານ ນາງ ວຽນວິໄລ ດີລະພັນ ກ່າວວ່າ: ໃນນາມຫົວໜ້າ ອານຸກໍາມະການເລຂານຸການ, ຮອງປະທານສະພາປະຊາຊົນແຂວງ ຮູ້ສຶກເປັນກຽດຢ່າງຍິ່ງ ທີ່ໄດ້ຮັບການມອບໝາຍຈາກ ຄະນະກໍາມະການເລືອກຕັ້ງຂັ້ນແຂວງ ໃຫ້ຈັດການຖະແຫຼງຂ່າວຕໍ່ສື່ມວນຊົນທຸກພາກສ່ວນ, ເພື່ອໃຫ້ພະນັກງານ, ທະຫານ, ຕຳຫຼວດ, ນັກທຸລະກິດ,ປະຊາຊົນບັນດາເຜົ່າ ຜູ້ມີສິດເລືອກຕັ້ງທົ່ວແຂວງຫຼວງພະບາງຊາບ ກ່ຽວກັບຜົນຂອງການເລືອກຕັ້ງສະມາຊິກສະພາແຫ່ງຊາດ ຊຸດທີ IX ປະຈໍາເຂດ 6 ແລະ ສະມາຊິກສະພາປະຊາຊົນແຂວງຫຼວງພະບາງ ຊຸດທີ II ຢ່າງເປັນທາງການ.


ສໍາລັບຜົນການປ່ອນບັດເລືອກຕັ້ງເອົາສະມາຊິກສະພາແຫ່ງຊາດ ຊຸດທີ IX ປະຈໍາເຂດເລືອກຕັ້ງທີ 6 ແລະ ສະມາຊິກສະພາແຂວງຊຸດທີ II ,ພາຍຫຼັງ ອະນຸກໍາມະການເລຂານຸການ ຂອງຄະນະກໍາມະການເລືອກຕັ້ງລະດັບຊາດ ໄດ້ມີພິທີຖະແຫຼງຂ່າວຢູ່ນະຄອນຫຼວງວຽງຈັນ ໃນຕອນເຊົ້າຂອງມື້ນີ້ ໃຫ້ປະຊາຊົນລາວບັນດາເຜົ່າ ແລະ ຜູ້ມີສິດເລືອກຕັ້ງໃນທົ່ວປະເທດຮັບຮູ້ຢ່າງເປັນ ທາງການແລ້ວ, ໃນຕອນແລງວັນທີ 5 ມີນາ ແຂວງຫຼວງພະບາງກໍໄດ້ມີການຖະແຫຼງການ ເພື່ອໃຫ້ປະຊາຊົນພາຍໃນແຂວງຮັບຮູ້ທົ່ວເຖິງກັນ. ທົ່ວປະເທດມີສະມາຊິກສະພາແຫ່ງຊາດ ແລະສະມາຊິກສະພາຂັ້ນແຂວງ ທັງໝົດ 164 ທ່ານ, ຍິງ 36 ທ່ານ,ໃນນີ້ ສະມາຊິກສະພາແຫ່ງຊາດ ປະຈໍາເຂດ 6 ແຂວງຫຼວງພະບາງ ເລືອກໄດ້ 10 ທ່ານ, ຍິງ 3 ທ່ານ,ມີລາຍຊື່ດັ່ງນີ້: ທ່ານ ວົງສະຫວັນ ເທບພະຈັນ,ທ່ານ ປອ ສີນາວາ ສຸພານຸວົງ,ທ່ານ ນາງ ມະນີວັນ ເຢຍປາວເຮີ,ທ່ານ ນາງ ວຽນວິໄລ ດີລະພັນ,ທ່ານ ນາງ ວັນດີ ບຸດທະສະວົງ,ທ່ານ ປອ ກໍລະກັນ ພົມມະວົງ,ທ່ານ ສົມພອນ ສີອຸດົມພັນ,ທ່ານ ສົມມະລີ ຄຳເກັ່ງ,ທ່ານ ປອ ວົງເພັດ ອຸດົມລິດ,ທ່ານ ພັອ ສີວິໄຊ ເພັງສັນຕິສຸກ ແລະ ສະມາຊິກສະພາປະຊາຊົນແຂວງ ຊຸດທີ 2 ທັງໝົດ 33 ທ່ານ, ຍິງ 9 ທ່ານ, ເທົ່າກັບ 27,27% ,ຈາກພະແນກ 06 ທ່ານ, ຍິງ 01 ທ່ານ,ຂັ້ນເມືອງ 27 ທ່ານ, ຍິງ 08 ທ່ານ.ເຊິ່ງມີລາຍຊື່ ດັ່ງນີ້: ປະຈໍາເຂດເລືອກຕັ້ງ ນະຄອນ-ຫຼວງພະບາງ: ມີ 3 ທ່ານ, ຍິງ 1 ທ່ານ.ປະກອບມີທ່ານ ບຸນລຽງ ແກ້ວມະນີ, ທ່ານ ນາງ ສຸທາ ທອງສະໝຸດ,ທ່ານ ພອນເລີດ ໄຊຍະນາ; ເຂດເລືອກຕັ້ງ ເມືອງຊຽງເງິນ: ມີ 3 ທ່ານຄື: ທ່ານ ສິງຕັນ ໄຊລືຊົ່ງ , ທ່ານ ສົມລິດ ສີປະເສີດ, ທ່ານ ເພັດລະຄອນ ໄຊຍະຈັນ; ເຂດເລືອກຕັ້ງ ເມືອງນານ: ມີ 3 ທ່ານ, ຍິງ 1 ທ່ານຄື: ທ່ານ ທອນ ສີອຳພອນ, ທ່ານ ບຸນມີ ບຸນທັນແສງງາມ, ທ່ານ ນາງ ແກ້ວລາ ມະນີຈິດ; ເຂດເລືອກຕັ້ງ ເມືອງປາກອູ: ມີ 3 ທ່ານ, ຍິງ 1 ທ່ານຄື: ທ່ານ ນາງ ສຸກສະຫວັນ ສີສຸພັນທອນ ,ທ່ານ ໄຊເຢ່ຍ ເຊັງທ່າວ, ທ່ານ ພັທ ສົມພານ ສຸລິຍະເດດ; ເຂດເລືອກຕັ້ງ ເມືອງນໍ້າບາກ: ມີ 3 ທ່ານຄື: ທ່ານ ຫຸມເພັງ ໂທທິທຳ, ທ່ານ ບຸນທັນ ສີລິລັດ, ທ່ານ ສີວອນ ວົງຄຳຈັນ; ເຂດເລືອກຕັ້ງ ເມືອງງອຍ: ມີ 3 ທ່ານຄື: ທ່ານ ພັທ ກິ່ງແກ້ວ ແກ້ວມະນີ, ທ່ານ ສຸວິລັດ ພັນສຸເດດ, ທ່ານ ບຸນເຕັມ ອາໄພສະຫວັດ; ເຂດເລືອກຕັ້ງ ເມືອງປາກແຊງ: ມີ 3 ທ່ານ, ຍິງ 1 ທ່ານຄື: ທ່ານ ດວງເພັດ ຢວນໄຊສົມແພງ, ທ່ານ ນາງ ແສງຈັນ ວົງວຽງຄຳ, ທ່ານ ພັທ ໄຈເພັດ ສີລິວັນ; ເຂດເລືອກຕັ້ງ ເມືອງໂພນໄຊ: ມີ 3 ທ່ານ, ຍິງ 1 ທ່ານຄື: ທ່ານ ຊາຍພອນ ສຸອຸໄທ, ທ່ານ ນາງ ສີອຳພອນ ຄຸນພານິດ, ທ່ານ ຈັນທົມ ສຸລິຍະສັກ; ເຂດເລືອກຕັ້ງ ເມືອງຈອມເພັດ: ມີ 3 ທ່ານ, ຍິງ 2 ທ່ານຄື: ທ່ານ ນາງ ຈັນທອນ ມີລາວັນ,ທ່ານ ນາງ ຈັນດີ ເຢັງວື່, ທ່ານ ສົມສິດ ບຸນທອງສີ; ເຂດເລືອກຕັ້ງ ເມືອງວຽງຄຳ: ມີ 2 ທ່ານ, ຍິງ 1 ທ່ານຄື: ທ່ານ ສອນສັກ ສຸລິເສີມ, ທ່ານ ນາງ ບົວໄລ ແພງສະຫວັນ; ເຂດເລືອກຕັ້ງ ເມືອງພູຄູນ: ມີ 2 ທ່ານ, ຍິງ 1 ທ່ານຄື: ທ່ານ ຄຳພັນ ພະນິນທອງ, ທ່ານ ນາງ ສີສະຫງວນ ທຳມະວົງ; ເຂດເລືອກຕັ້ງ ເມືອງໂພນທອງ: ມີ 2 ທ່ານຄື: ທ່ານ ສົມວອນ ແກ້ວຄໍາພອນ,ທ່ານ ບຼົ່ງວ່າງ ຫວ່າງເຈ່ຍຊ່າ.
ທັງໝົດນັ້ນ ແມ່ນການຖະແຫຼງຂ່າວ ເພື່ອປະກາດຜົນຂອງການປ່ອນບັດເລືອກຕັ້ງ ສະມາຊິກສະພາປະຊາຊົນແຂວງຫລວງພະບາງ ຊຸດທີ II ຕໍ່ບັນດາສື່ມວນຊົນທຸກພາກສ່ວນ, ເພື່ອໃຫ້ພະນັກງານ, ທະຫານ, ຕໍາຫຼວດ, ຜູ້ປະກອບການ ແລະ ພໍ່ແມ່ພີ່ນ້ອງປະຊາຊົນບັນດາເຜົ່າ ຜູ້ມີສິດເລືອກຕັ້ງທົ່ວແຂວງຫຼວງພະບາງ ໄດ້ຮັບຊາບຢ່າງເປັນທາງການ.


ໂອກາດດັ່ງກ່າວນີ້ທ່ານ ນາງ ວຽນວິໄລ ດີລະພັນ ຍັງໄດ້ສະແດງຄວາມຂອບໃຈມາຍັງບັນດາທ່ານ ການນໍາພັກ-ລັດ ທຸກຂັ້ນ, ຕະຫຼອດຮອດພໍ່ແມ່ພີ່ນ້ອງປະຊາຊົນບັນດາເຜົ່າ ຜູ້ມີສິດເລືອກຕັ້ງທົ່ວແຂວງ ຫຼວງພະບາງ, ທີ່ໄດ້ຮ່ວມແຮງ, ຮ່ວມໃຈສ້າງທຸກເງື່ອນໄຂເຮັດໃຫ້ການເລືອກຕັ້ງຄັ້ງນີ້, ໄດ້ປະຕິບັດຖືກຕ້ອງຕາມລະບຽບ, ກົດໝາຍຢ່າງເຂັ້ມງວດ ແລະ ທັນກັບກໍານົດເວລາ, ພ້ອມທັງຮັບປະກັນຄວາມຖືກຕ້ອງ, ໂປ່ງໃສ, ຍຸດຕິທໍາໃຫ້ແກ່ຜູ້ສະໝັກຮັບເລືອກຕັ້ງ; ພ້ອມດຽວກັນນັ້ນ, ປະຊາຊົນບັນດາເຜົ່າ ແລະ ຜູ້ມີສິດເລືອກຕັ້ງທັງໝົດໄດ້ເຊີດຊູ ສະຕິຊາດ, ມີຄວາມຕື່ນຕົວ, ສະໝັກໃຈໄປນໍາໃຊ້ສິດ ແລະ ປະຕິບັດພັນທະຂອງພົນລະເມືອງຂອງຕົນ ໄປປ່ອນບັດເລືອກຕັ້ງ ເອົາບຸກຄົນທີ່ມີມາດຖານຄົບຖ້ວນເຂົ້າມາໃນສະພາແຫ່ງຊາດ ແລະ ສະພາປະຊາຊົນຂັ້ນແຂວງ ເພື່ອເປັນຕົວແທນສິດອຳນາດຂອງປະຊາຊົນລາວບັນດາເຜົ່າ, ປະກອບສ່ວນເຂົ້າໃນການສືບຕໍ່ສ້າງ ແລະ ປັບປຸງ, ຍົກສູງຂີດຄວາມສາມາດຂອງສະພາ ແຫ່ງຊາດ ແລະ ສະພາປະຊາຊົນຂັ້ນແຂວງ ໃນຖານະເປັນອົງການອຳນາດລັດໜຶ່ງໃນລະບົບການເມືອງຂອງ ສປປ ລາວ ໃຫ້ນັບມື້ໜັກແໜ້ນເຂັ້ມແຂງ, ຢູ່ແຂວງຫຼວງພະບາງ ການເລືອກຕັ້ງຄັ້ງນີ້ ເຕັມໄປດ້ວຍບັນຍາກາດຟົດຟື້ນ ແລະ ສາມາດປະຕິບັດໄດ້ຕາມຈຸດປະສົງ ແລະ ຄາດໝາຍທີ່ວາງໄວ້ເຊັນ: ຜູ້ມີສິດປ່ອນບັດເລືອກຕັ້ງ ໄປໃຊ້ສິດເລືອກຕັ້ງໄດ້ຮ້ອຍສ່ວນຮ້ອຍ,ຮັບປະກັນບໍ່ມີບັດຕາຍ ຮ້ອຍສ່ວນຮ້ອຍ ແລະ ແຕ່ລະໜ່ວຍປ່ອນບັດເລືອກຕັ້ງ ຮັບປະກັນໄດ້ຄວາມສະຫງົບປອດໄພຮ້ອຍສ່ວນຮ້ອຍ.ອັນສຳຄັນແມ່ນສາມາດເລືອກຕັ້ງໄດ້ສະມາຊິກສະພາແຫ່ງຊາດ ແລະ ສະມາຊິກສະພາປະຊາຊົນແຂວງ ຜູ້ທີ່ມີມາດຖານຄົບຖ້ວນໄດ້ຕາມລະດັບຄາດໝາຍຄື: ສະມາຊິກສະພາແຫ່ງຊາດ ປະຈຳເຂດເລືອກຕັ້ງທີ 6 ຈຳນວນ 10 ທ່ານ, ຍິງ 3 ທ່ານ ແລະ ສະມາຊິກສະພາປະຊາຊົນແຂວງ ຊຸດທີ II ຈຳນວນ 33 ທ່ານ, ຍິງ 9 ທ່ານ, ດ້ານໂຄງປະກອບແມ່ນຮັບປະກັນມີເພດ, ເຜົ່າຕາມໝວດພາສາ, ດ້ານອາຍຸກະສຽນ ມີທັງຮຸ່ນໜຸ່ມ, ກາງ ແລະ ອາວຸໂສ, ມີຕົວແທນຈາກສູນກາງ, ພະແນກການຂອງແຂວງ, ເມືອງ ຊຶ່ງປະກອບດ້ວຍຫຼາຍສາຂາວິຊາຊີບ.
ໃນໂອກາດທ້າຍນີ້, ຂ້າພະເຈົ້າຂໍອວຍພອນໄຊອັນປະເສີດ ມາຍັງບັນດາທ່ານການນໍາພັກ, ລັດ ແລະ ຄະນະນຳທຸກຂັ້ນພາຍໃນແຂວງ ພະນັກງານ, ທະຫານ, ຕຳຫຼວດ, ນັກທຸລະກິດ, ພໍ່ຄ້າຊາວຂາຍ, ຕະຫຼອດຮອດພໍ່ແມ່ປະຊາຊົນບັນດາເຜົ່າທົ່ວແຂວງຫຼວງພະບາງ ຈົ່ງມີສຸຂະພາບແຂງແຮງ, ມີຄວາມຜາສຸກສົມຫວັງໃນຊີວິດ, ສືບຕໍ່ປະສົບຜົນສຳເລັດໃນໜ້າທີ່ວຽກງານ ກໍ່ຄືການດໍາເນີນທຸລະກິດ, ການຜະລິດເປັນສິນຄ້າ, ພ້ອມກັນປະກອບສ່ວນເຂົ້າໃນການສ້າງສາ ພັດທະນາແຂວງຫຼວງພະບາງ ໃຫ້ນັບມື້ກ້າວຂຶ້ນຢ່າງບໍ່ຢຸດຢັ້ງ.