ມິເດຍລາວແຂວງເຊກອງ ຂ່າວ: ເຈີນ ແດນວົງວິຈິດ
ໃນຕົ້ນເດືອນ ມີນາ ປີ 2021 ກອງບັນຊາການປ້ອງກັນຄວາມສະຫງົບເມືອງທ່າແຕງ ໄດ້ຈັດກອງປະຊຸມສະຫຼຸບວຽກງານປະຈໍາປີ 2020 ແລະ ວາງທິດທາງແຜນການປີ 2021. ໂດຍການເປັນປະທານຂອງ ທ່ານ ສົມເພັດ ເອີດລັດດາກຳມະການພັກແຂວງ,ເຈົ້າເມືອງໆທ່າແຕງ,ມີຫົວໜ້າກອງບັນຊາການປ້ອງກັນຄວາມສະຫງົບເມືອງ,ມີຄະນະພັກ,ຄະນະບັນຊາ,ນາຍ ແລະ ພົນຕໍາຫຼວດ,ພະນັກງານ-ນັກຮົບພາຍໃນກົມກອງ ແລະ ເຂດຈຸດສຸມພັດທະນາເຂົ້າຮ່ວມ.


ພັທ ດໍລະຫົງ ສິງຫາວົງ ຄະນະພັກຮາກຖານກອງບັບຊາການປ້ອງກັນຄວາມສະຫງົບເມືອງທ່າແຕງ,ຫົວໜ້າຫ້ອງການ,ໄດ້ຕີລາຄາໃຫ້ຮູ້ເຖິງການເຄື່ອນໄຫວວຽກງານ ປ້ອງກັນຄວາມສະຫງົບ ໃນໄລຍະປີ 2020 ຜ່ານມາ; ຊິ່ງສາມາດຮັກສາໄດ້ສະຖຽນລະພາບທາງດ້ານການເມືອງ ຄວາມສະຫງົບ – ຄວາມປັນລະບຽບຮຽບຮ້ອຍ ທາງດ້ານສັງຄົມ ສາມາດສະກັດກັ້ນ ແລະ ຕ້ານອາດຊະຍາກໍາ, ຕ້ານ ແລະ ສະກັດກັ້ນການຄ້າ – ຂາຍຢາເສບຕິດໃຫ້ຫຼຸດໜ້ອຍຖອຍລົງເທື່ອລະກ້າວ. ເຊິ່ງໃນໜຶ່ງປີ ມີຄະດີເກີດຂຶ້ນທັງໝົດ 17 ລາຍ, ກັກຕົວຜູ້ຕ້ອງຫາໄດ້ 31 ຄົນ,ຄະດີຄ້າ – ຂາຍຢາເສບຕິດ ມີ 13 ລາຍ, ຕ້ອງຫາ 15 ຄົນ, ຢຶດຂອງກາງໄດ້ 951 ເມັດ,ສະກັດກັ້ນ ແລະ ແກ້ໄຂອຸປະຕິເຫດທີ່ເກີດຂຶ້ນຕາມທ້ອງຖະໜົນຫຼວງໄດ້ 57 ລາຍ, ມີຄົນບາດເຈັດທັງໝົດ 84 ຄົນ. ໃນນັ້ນ ບາດເຈັບສາຫັດ 2 ຄົນ ເສຍຊີວິດ 6 ຄົນ. ພາຫະນະເປ້ເພທັງໝົດ 88 ຄັນ,ມູນຄ່າເສຍຫາຍທັງໝົດ 5 ຮ້ອຍ 65 ລ້ານກວ່າກີບ. ຄຽງຄູ່ກັບຜົນສໍາເລັດທາງດ້ານນວຽກງານວິຊາສະເພາະນັ້ນ; ກອງບັນຊາການປ້ອງກັນຄວາມສະຫງົບ ເມືອງທ່າແຕງ ຍັງໄດ້ຖືສໍາຄັນໃນການຫັນພະນັກງານ-ນັກຮົບລົງ ກໍ່ສ້າງຮາກຖານການເມືອງ ຕິດພັນກັບວຽກງານສາມສ້າງ ແລະ ພັດທະນາຊົນນະບົດຮອບດ້ານ ຢູ່ 6 ເຂດຈຸດສຸມພັດທະນາຂອງເມືອງ. ເຊິ່ງມາຮອດປັດຈຸບັນສາມາດສ້າງຄອບຄົວ ແລະ ບ້ານປ້ອງກັນຄວາມສະຫງົບດີໄດ້ທັງ 27 ບ້ານ ມີຈໍານວນຄອບຄົວທັງໝົດ 6.209 ຄອບຄົວ.


ໂອກາດນີ້,ທ່ານ ສົມເພັດ ເອີດລັດດາ ເຈົ້າເມືອງໆທ່າແຕງກໍ່ໄດ້ໃຫ້ກຽດໂອ້ລົມເຊິ່ງກ່ອນອື່ນທ່ານໄດ້ສະແດງຄວາມຍ້ອງຍໍຊົມເຊີຍຕໍ່ຜົນງານທີ່ຍາດມາໄດ້ໄລຍະ 1 ປີຜ່ານມາ ພ້ອມເນັ້ນໃຫ້ຄະນະພັກ-ຄະນະບັນຊາ,ພະນັກງານນັກຮົບ ທັງໝົດຈົ່ງພ້ອມກັນເປັນເຈົ້າການໃນການລົງຊີ້ນຳຕົວຈິງໃນແຕ່ລະວຽກງານໃຫ້ແທດເຖິງ,ມີການກວດກາຢ່າງເປັນປະຈຳ ມີການສະຫຼຸບທອດຖອນບົດຮຽນເປັນແຕ່ລະໄລຍະພ້ອມກັນນີ້ກໍ່ຕ້ອງສືບຕໍ່ຈັດຕັ້ງປະຕິບັດບັນດາແຜນງານທີ່ວາງອອກໃນ ຊຸມປີຕໍ່ໜ້າໃຫ້ໄດ້ຮັບຜົນສຳເລັດສູງຂື້ນກວ່າເກົ່າ.