ມິເດຍລາວແຂວງເຊກອງ ຂ່າວ: ສັນຍາ
ການແຂ່ງຂັນບານເຕະຊາຍທົ່ວໄປ ເພື່ອເປັນການສ້າງຂະບວນການຂໍານັບຮັບຕ້ອນບັ້ນເລືອກຕັ້ງສະມາຊິກສະພາແຫ່ງຊາດ (ສສຊ) ຊຸດທີ IX ແລະສະມາຊິກສະພາປະຊາຊົນຂັ້ນແຂວງ (ສສຂ) ຊຸດທີ II ໃນວັນທີ 21 ກຸມພາ 2021 ຜ່ານມາ.
ຄູ່ຊິງຊະນະເລີດແຂ່ງຂັນໃນວັນທີ 5 ມີນາ 2021 ທີ່ສະໜາມກິລາແຂວງເຊກອງ, ເຮືອນພັກພັນໄຊ ເອັຟຊີ ພົບກັບ ບໍລິສັດວິນນີດາກຈຶງ ຊຶ່ງການແຂ່ງຂັນທັງສອງທິມບໍ່ສາມາດເຮັດຫຍັງກັນໄດ້ຈົບ 90 ນາທີ ສະເໝີກັນ 0-0 ຕ້ອງຕັດສິນດ້ວຍການຍິງຈຸດໂທດ ເປັນເຮືອພັກພັນໄຊ ເອັຟຊີ ທີ່ຍິງດີກວ່າເອົາຊະນະໄປ 4-2 ປະຕູ, ຄວ້າແຊ້ມໄປຄອງໄດ້ຮັບຫຼຽນ, ຂັນແຊ້ມ, ເງິນລາງວັນ 5.000.000 ກີບ, ສ່ວນຮອງແຊ້ມໄດ້ຮັບຫຼຽນ ແລະເງິນລາງວັນ 3.000.000 ກີບ.


ຂະນະທີ່ຄູ່ຊິງທີ 3 ແຂ່ງຂັນໃນວັນທີ 3 ມີນາ 2021 ລະຫວ່າງທິມເມືອງທ່າແຕງ ພົບກັບ ພອນສະຫວັນ ເຄິ່ງເວລາທີໜຶ່ງ ເມືອງທ່າແຕງໄດ້ປະຕູຂຶ້ນນໍາ 2-0 ຈາກຕຸລີ່ ແລະເຄນ, ມາເຄິ່ງເວລາທີສອງ ພອນສະຫວັນ ທີ່ຫຼິ້ນດີກວ່າຍິງ 2 ປະຕູລວດຈາກ ອ໋ອງ ແລະຫຼຸດ ຈົບ 90 ນາທີ ສະເໝີກັນ 2-2 ແລະຕັດສິນດ້ວຍການຍິງຈຸດໂທດເຊັ່ນດຽວກັບຄູ່ຊິງຊະນະເລີດເປັນເມືອງທ່າແຕງທີ່ຍິງຄົມກວ່າເອົາຊະນະໄປ 5-4 ຜົນປະຕູລວມ 7-5 ເມືອງທ່າແຕງຄວ້າອັນດັບ 3 ໄດ້ຮັບເງິນລາງວັນ 1.500.000 ກີບ.

ໃຫ້ກຽດເຂົ້າຮ່ວມຊົມຮ່ວມເຊຍ, ມອບຫຼຽນ, ຂັນ ແລະເງິນລາງວັນໃຫ້ແກ່ນັກກິລາມີທ່ານ ເຫຼັກໄຫຼ ສີວິໄລ ເຈົ້າແຂວງໆເຊກອງ, ປະທານຄະນະກໍາມະການເລືອກຕັ້ງ ສສຊ ຊຸດທີ IX ແລະ ສສຂ ຊຸດທີ II ຂັ້ນແຂວງ, ທ່ານ ຂັນຕີ ສີລະວົງສາ ຮອງເຈົ້າແຂວງເຊກອງ, ທ່ານ ສີສຸພັນ ມະຫາວົງ ຫົວໜ້າຫ້ອງວ່າການແຂວງ, ທ່ານ ວົງເດືອນ ຈັນທະບຸດຊຽງ ເຈົ້າເມືອງໆລະມາມ, ທ່ານ ຄໍາໄພ ສິມມາວັດ ຫົວໜ້າພະແນກສຶກສາທິການ ແລະກິລາແຂວງ, ບັນດາທ່ານຮອງເຈົ້າເມືອງທ່າແຕງ, ກະລຶມ, ດາກຈຶງ, ປະທານ-ຮອງປະທານຄະນະບໍລິຫານງານສະຫະພັນບານເຕະແຂວງ ແລະມວນຊົນເຂົ້າຮ່ວມຊົມຮ່ວມເຊຍຢ່າງຫຼວງຫຼາຍ.