ມິເດຍລາວແຂວງເຊກອງ ຂ່າວ:ພຸດທະສອນ
ວັນທີ 05 ມີນາ 2021 ໜ່ວຍສະຫະພັນແມ່ຍິງພະແນກຖະແຫຼງຂ່າວ,ວັດທະນະທໍາ ແລະທ່ອງທ່ຽວແຂວງເຊກອງ ໄດ້ຈັດພິທີປາຖະກະຖາເລົ່າຄືນມູນເຊື້ອວັນແມ່ຍິງສາກົນ(ວັນທີ 8 /3/1910-ວັນທີ 8 /3/ 2021 ໂດຍໃຫ້ກຽດເປັນປະທານຂອງທ່ານ ຈັນໄທ ຄໍາມະນີວົງ ຮອງຫົວໜ້າພະແນກ ຖວທ ແຂວງ, ມີທ່ານ ນາງ ວຽງສະໄໝ ວົງວິຈິດ ຮອງຫົວໜ້າພະແນກ ຖວທ, ຜູ້ຊີ້ນໍາວຽກງານອົງການຈັດຕັ້ງມະຫາຊົນ ພ້ອມດ້ວຍຄອບຄົວການນໍາພະແນກ, ຄະນະອົງການຈັດຕັ້ງມະຫາຊົນ, ຄະນະປະທານສະຫະພັນແມ່ຍິງ ແລະ ສະມາຊິກສະຫະພັນແມ່ຍິງພາຍໃນໜ່ວຍເຂົ້າຮ່ວມຢ່າງພ້ອມພຽງ.

ໃນພິທີ ທ່ານ ນາງ ພອນດາແກ້ວ ບຸນທະວີ ປະທານໜ່ວຍສະຫະພັນແມ່ຍິງພະແນກ ຖວທ ໄດ້ເລົ່າຄືນມູນເຊື້ອວັນແມ່ຍິງສາກົນ ເຊິ່ງທ່ານໄດ້ຍົກໃຫ້ເຫັນປະຫັວດຄວາມເປັນມາຂອງວັນແມ່ຍິງສາກົນວັນທີ 08 ມີນາ ແມ່ນເຫດການເມືອງທີ່ສຳຄັນ,ເປັນຂີດໝາຍແຫ່ງໄຊຊະນະອັນພື້ນຖານຂອງຂະບວນການແມ່ຍິງສາກົນໃນການຕໍ່ສູ້ເອົາສິດຜົນປະໂຫຍດອັນຊອບທຳໃຫ້ແກ່ແມ່ຍິງຊາວຜູ້ອອກແຮງງານໃນທົ່ວໂລກ,ເປັນວັນລະນຶກເຖິງການຕໍ່ສູ້ຂອງແມ່ຍິງເພື່ອປົດປ່ອຍຕົນເອງ ແລະ ທວງໃຫ້ສິດສະເໝີພາບປະຊາທິປະໄຕຄືກັບຜູ້ຊາຍ ທວງໃຫ້ນາຍທືນແກ້ໄຂຊີວິດການເປັນຢູ່ພາຍໃຕ້ຄຳຂັວນ(ຜູ້ໜື່ງເຮັດວຽກມື້ລະ 8 ຊົ່ວໂມງ) ຍິງ ແລະ ຊາຍເຮັດວຽກຄືກັນຕ້ອງໄດ້ຮັບເງິນເດືອນເທົ່າກັນ,ຕ້ອງມີລະບອບປ້ອງກັນສຸຂະພາບຂອງແມ່ຍິງ ແລະ ເດັກນ້ອຍ,ຕ້ານສົງຄາມຮຸກຮານ ປົກປັກຮັກສາສັນຕິພາບຂອງໂລກ.ນັບແຕ່ນັ້ນມາ ວັນທີ8 ມີນາຂອງທຸກໆປີ ຈື່ງເປັນວັນແມ່ຍິງສາກົນ.


ໂອກາດນີ້ ທ່ານ ຈັນໄທ ຄໍາມະນີວົງ ໄດ້ຮຽກຮ້ອງໃຫ້ຄະນະນໍາຂອງໜ່ວຍສະຫະພັນແມ່ຍິງ ເປັນເຈົ້າການສຶກສາອົບຮົມການເມືອງ-ແນວຄິດ ໃຫ້ແກ່ສະມາຊິກຢ່າງທົ່ວເຖິງ, ເອົາໃຈໃສ່ພັດທະນາຕົນເອງທັງ 4 ດ້ານຄືດ້ານຮ່າງກາຍ, ຈິດໃຈ, ຄວາມຮູ້-ຄວາມສາມາດ ແລະວິຊາຊີບສີມືແຮງງານ ຢ່າງບໍ່ຢຸດຢັ້ງ, ຝຶກຝົນຫຼໍ່ຫຼອມຕົນເອງໃນທຸກດ້ານ, ປັບປຸງກົງຈັກການຈັດຕັ້ງໃຫ້ໜັກແໜ້ນ, ເຂັ້ມແຂງຂຶ້ນກວ່າເກົ່າ, ປຸກລະດົມໃຫ້ສະມາຊິເຂົ້າຮ່ວມກອງທຶນປະກັນສັງຄົມ, ກອງທຶນພັດທະນາຊ່ວນເຫຼືອເຊິ່ງກັນແລະກັນໃຫ້ໄດ້100%, ເອົາໃຈໃສ່ຮັກສາມູນເຊື້ອວັດທະນະທໍາອັນດີງາມຂອງຊາດ-ຂອງທ້ອງຖິ່ນ ໃຫ້ຍືນຍົນຄົງຢູ່ກັບຄົນລາວຕະຫຼອດໄປ.