ມິເດຍລາວແຂວງຄຳມ່ວນ ພິທີມອບ-ຮັບໜ້າທີ່ຫົວໜ້າພະແນກການ 07 ພາກສ່ວນພາຍໃນແຂວງຄໍາມ່ວນລະຫວ່າງຜູ້ເກົ່າ ແລະ ຜູ້ໃໝ່ ໄດ້ຈັດຂຶ້ນໃນຕອນບ່າຍຂອງວັນທີ 05 ມີນາ 2021 ຢູ່ທີ່ສະໂມສອນໃຫຍ່ຂອງແຂວງ ( ຫຼັກ 04 ) ໂດຍເປັນກຽດເຂົ້າຂອງທ່ານ ວັນໄຊ ພອງສະຫວັນ ເຈົ້າແຂວງຄໍາມ່ວນ, ມີບັນດາທ່ານໃນຄະນະບໍລິຫານງານພັກແຂວງ , ຫົວໜ້າ, ຮອງຫົວໜ້າພະແນກການ, ພະນັກງານວິຊາການທີ່ກ່ຽວຂ້ອງເຂົ້າຮ່ວມ.

ທ່ານ ນາງ ມຸນທາ ລັດຖະຈັກ ຮອງຫົວໜ້າຄະນະຈັດຕັ້ງແຂວງໄດ້ຜ່ານມະຕິຕົກລົງຂອງຄະນະປະຈໍາພັກແຂວງວ່າດ້ວຍການສັບຊ້ອນພະນັກງານ-ລັດຖະກອນໄປຮັບໜ້າທີ່ໃໝ່ເຊິ່ງປະກອບມີ: ທ່ານ ສົມໃຈ ພານີຈັນ ອາດີດເຈົ້າເມືອງໜອງບົກ ມາເປັນຫົວໜ້າຄະນະຈັດຕັ້ງແຂວງ, ທ່ານ ນາງ ບັງອອນ ໄຊຍະສິດ ຮັກສາການຫົວໜ້າຄະນະຈັດຕັ້ງແຂວງ ແມ່ນຖືກສັບຊ້ອນໄປຮັບໜ້າທີ່ໃໝ່ຢູ່ຂະແໜງການອື່ນ, ທ່ານ ຄໍາສອນ ອ້ວນທະວີ ຫົວໜ້າພະແນກຊັບພະຍາກອນທຳມະຊາດ ແລະ ສິ່ງແວດລ້ອມ ມາເປັນປະທານກວດກາພັກ-ລັດແຂວງ, ທ່ານ ຄໍາຜົງ ວົງພະຈັນ ປະທານກວດກາພັກ-ລັດແຂວງ (ຜູ່ເກົ່າ) ແມ່ນໄດ້ອອກພັກຜ່ອນຮັບອຸດໜຸນບໍານານ, ທ່ານ ຄໍາໝັ້ນ ສໍປະເສີດ ເຈົ້າເມືອງຄູນຄຳ ມາເປັນຫົວໜ້າພະແນກຊັບພະຍາກອນທໍາມະຊາດ ແລະ ສິ່ງແວດລ້ອມແຂວງ, ທ່ານ ນາງ ອາລີ ບົວຈູມ ປະທານສະຫະພັນແມ່ຍິງແຂວງ ມາເປັນຫົວໜ້າພະແນກພາຍໃນແຂວງ, ທ່ານ ແກ້ວວິໄລ ໄຊຍະບຸດ ຫົວໜ້າພະແນກພາຍໃນແຂວງ ແມ່ນຖືກສັບຊ້ອນໄປຮັບໜ້າທີ່ໃໝ່ເປັນເຈົ້າເມືອງຄູນຄໍາ, ທ່ານ ນາງ ກຽນຕາ ວັນມະລາ ຮອງປະທານສະຫະພັນແມ່ຍິງແຂວງ ຂຶ້ນເປັນປະທານສະຫະພັນແມ່ຍິງແຂວງ, ທ່ານ ແກ້ວວັນໄຊ ສຸກແສນທອງ ຫົວໜ້າຄະນະໂຄສະນາອົບຮົມແຂວງ ມາເປັນຫົວໜ້າໂຮງຮຽນການເມືອງ ແລະ ການປົກຄອງແຂວງ, ທ່ານ ນາງ ອານົງໄຊ ສັງທອງເພັດ ຫົວໜ້າໂຮງຮຽນການເມືອງ ແລະ ການປົກຄອງແຂວງ (ຜູ້ເກົ່າ) ແມ່ນຖືກສັບຊ້ອນໄປຮັບໜ້າທີ່ໃໝ່ຢູ່ຫ້ອງວ່າການແຂວງ ແລະ ທ່ານ ສົມພົງ ວັນໄພທອງ ຮອງປະທານກວດກາພັກ-ລັດແຂວງ ເປັນຫົວໜ້າຄະນະໂຄສະນາອົບຮົມແຂວງ.